الماتى قالاسىنىڭ مەملەكەتتىك قۋىرشاق تەاترى – رەسپۋبليكامىزداعى 83 جىلدىق تاريحى بار ۇلكەن ۇجىمداردىڭ ءبىرى. قازاق جەرىندە وتكەن عاسىردىڭ باسىندا پايدا بولعان قارا شاڭىراق بىرنەشە بۋىن جاستاردى تاربيەلەپ، بالدىرعانداردىڭ جان-جاقتى ازامات بولىپ قالىپتاسۋىنا ءوز ۇلەسىن قوسىپ كەلەدى. بيىلعى ماۋسىمنىڭ وزىندە «انا جۇرەگى» (اۆت. ە.يونوۆ، رەج. ا.زايسيەۆ)، «اكۆا ەرتەگى» (اۆت. ا.سەرگەيەۆ، رەج. و.اقجارقىن-سارسەنبەك)، «انا-جەر انا» (اۆت.ش.ايتماتوۆ، رەج. د.جۇمابايەۆا)، «توبا» (اۆت.ە.جۋاسبەك، رەج.ج.جۇمانباي)، «ساعىنىش ءشوبى» (اۆت. ر.وتاربايەۆ، رەج. ر.جانىامانوۆ) سىندى سان ءتۇرلى وقيعالاردى ساحنالايتىن قويىلىمدار كورەرمەن نازارىنا ۇسىنىلىپ، كوپشىلىكتىڭ زور قوشەمەتىنە بولەندى. ونەر ورداسى ۇلتتىڭ رۋحاني قاجەتتىلىگىن وتەۋمەن قاتار، بىرنەشە رەسپۋبليكالىق، حالىقارالىق فەستيۆالدەردە توپ جارىپ، قازاقتىڭ قۋىرشاق ونەرىن وركەندەتۋ جولىندا تولاسسىز ەڭبەك ەتۋدە. وسى رەتتە، مەملەكەتتىك قۋىرشاق تەاترى 21 ناۋرىز – حالىقارالىق تەاتر كۇنىنە وراي العاش رەت 15-18 ناۋرىز كۇندەرى ارالىعىندا «قۋىرشاقتار شاقىرادى – 2018» فەستيۆالىن وتكىزدى.

وسىلايشا، ءداستۇرلى قۋىرشاق ونەرىن جاڭعىرتىپ، جاس ۇرپاقتى ىزگىلىك يدەيالارىنا تاربيەلەۋ جولىندا ەڭبەك ەتىپ جۇرگەن قۋىرشاق تەاترىنىڭ ۇجىمى بيىل جىل باسى، جاڭارۋ مەن جاسارۋدىڭ، بەرەكە-بىرلىكتىڭ مەيرامى – ءاز-ناۋرىزدى ەرەكشە تۇرپاتتا اتاپ وتپەك. ءبىر اي كولەمىندە تويلاتۋ ماقساتىندا ۇيىمداستىرىلىپ وتىرعان ۇلتتىق مەرەكەمىزدىڭ اياسىندا ونەر ورداسى 14 ساۋىردە، ساعات 20:00-دە «مىڭ ءبىر ءتۇن» ەرتەگىسىنىڭ جەلىسى بويىنشا انتون زايسيەۆتىڭ رەجيسسەرلىگىمەن «ناۋرىزدىڭ سيقىرلى ءتۇنى» اتتى مەرەكەلىك جاڭا قويىلىمدى كورەرمەن نازارىنا ۇسىنباق.

شارانىڭ باستى ەرەكشەلىگى – كۇن باتىپ، ءىڭىر باسىپ، كەش قونعاندا تەاتر اۋلاسىنا ەكى بىردەي قازاق اۋىلدارىنىڭ قونىس قۇرىپ، حايۋاناتتار باعى مەن سيركتەن سيقىرلى ونەرپازداردىڭ كەلۋى بولماق. كەشتە «قازاق اۋىلى» مەرەكەلىك قويىلىم ۇسىنىپ، ۇلتتىق قۇندىلىقتارىمىزدى دارىپتەسە، «شەبەرلەر» اۋىلىنىڭ كەيىپكەرلەرى سان ءتۇرلى اسپاپتاردا ويناپ، ولاردىڭ جاسالۋ جولدارىن كورسەتىپ، شەبەرلىك ساعاتتارىن وتكىزۋمەن قاتار، جارمەڭكە دە ۇيىمداستىرماق.

مەملەكەتتىك قۋىرشاق تەاترى الماتى قالاسىنىنىڭ تۇرعىندارى مەن قالا قوناقتارىنا سان عاسىرلىق ءداستۇرلى مەيرامدى كەڭىنەن دارىپتەپ، ادەپ-عۇرىپتى ۇلىقتاۋ ماقساتىندا ءقادىرلى ونەر سۇيەر جانداردىڭ جانىنا رۋحاني ازىق سىيلاپ، كوڭىل پەردەسىن ادەمى كۇيگە بولەۋ ءۇشىن اتالمىش مەرەكەنى بىرگە تويلاۋعا شاقىرادى.

گۇلىم كوپباي قىزى