كەمەروۆو وبلىسى حالىقتىق دەپۋتاتتار سوۆەتى سەيسەنبىدە وتكەن كەزەكتەن تىس سەسسيا بارىسىندا ءوڭىردىڭ بۇرىنعى گۋبەرناتورى امان تولەيەۆتى كۋزباسس پارلامەنتىنىڭ ءتوراعاسى ەتىپ ءبىراۋىزدان تاعايىندادى.

امان تولەيەۆتىڭ كانديداتتىعىنا 39 ادامنىڭ 38ء-ى داۋىس بەرگەن، ءبىر ادام عانا قارسى داۋىس بەردى.

تولەيەۆتىڭ ءوزى «زيمنيايا ۆيشنيا» ويىن-ساۋدا ورتالىعىندا بولعان وقيعادان كەيىن قۇداي الدىنداعى ارىن تازا دەپ ەسەپتەيدى. ءوزىنىڭ ايتۋىنشا، قولىنان كەلگەننىڭ ءبارىن ىستەگەن.

«قايعى بولعاندا ادام سىنالادى. ءبىراق سىزدەر مەنى تاستاپ كەتپەدىڭىزدەر. سىزدەردىڭ تاراپتارىڭىزدان قولداۋ بولعانىن سەزىندىم. كوپ راقمەت! مەنىڭ تاعايىندالعانىمدى حالىق قاتتى تالقىلايتىن، ءتىپتى قارالايتىن بولادى، بىلەمىن»، - دەدى تولەيەۆ پارلامەنتتە ءسوز سويلەۋ بارىسىندا. 

سونداي-اق كۋزباسس ءۇشىن تالماي ەڭبەكتەنەتىنىن جەتكىزدى.

«بۇگىنگى كۇنى دەپۋتاتتاردىڭ، كوماندانىڭ ەڭبەگىنىڭ ارقاسىندا ءبىز گۇلدەنىپ كەلە جاتقان كۋزباسسپەن ماقتانا الامىز. وبلىستى جاڭا گۋبەرناتورعا تاپ-تازا، تىرشىلىگى قايناپ تۇرعان قالپى تاپسىرامىن»، - دەدى تولەيەۆ.

ايتا كەتەيىك، كەمەروۆو وبلىسىن 20 جىل باسقارعان تولەيەۆ «زيمننيا ۆيشنيا» ويىن-ساۋىق ورتالىعىنداعى ورتتەن كەيىن وتستاۆكاعا كەتكەن. ءورت سالدارىنان 64 ادام قازا تاپتى، ولاردىڭ كوبى بالالار.