اقتوبە اكىمدىگى اقتوبە جاڭا ەكى اۋداننىڭ «الماتى» جانە «استانا» دەپ اتاۋدىڭ سەبەبىن ءتۇسىندىردى. قالا اكىمىنىڭ ورىنباسارى گۇلبارشىن ايدارحانوۆانىڭ ايتۋىنشا، وسى كۇندەرى جاڭا اۋدانداردى اتاۋ جونىندە اقتوبەدە قوعامدىق تىڭداۋ وتكەن.

«ونوماستيكالىق جۇمىس ورتالىعىنان بىرنەشە ۇسىنىس كەلىپ ءتۇستى. ۇسىنىستاردىڭ ىشىندە ەلەك، بوگەنباي باتىر، اباي، ەسەت باتىر جانە باسقا دا اتاۋلار بولدى. سونداي-اق «الماتى» مەن «استانا» اتاۋلارىن قولدايتىن اقتوبە تۇرعىندارىنىڭ جازباشا تۇردەگى حاتتارى كەلدى. كەيىن قوعامدىق تالقىلاۋ ءوتتى، وندا دا وسى اتاۋلاردى قولداعانداردىڭ قاراسى كوپ بولدى. ءماسليحات سەسسياسىندا دەپۋتاتتار «استانا» جانە «الماتى» اتاۋلارىن ءبىراۋىزدان قولدادى. ەندىگى ناقتى شەشىمدى رەسپۋبليكالىق ونوماستيكالىق كوميسسيا قابىلدايدى. ناقتى ۋاقىتىن ايتا المايمىن»، - دەپ ءتۇسىندىردى ايدارحانوۆا.

ايتا كەتەيىك، 6 ساۋىردە ءماسليحات سەسسياسىندا دەپۋتاتتار ءبىراۋىزدان اقتوبەدەگى ەكى اۋداندى «الماتى»، «استانا» دەپ اتاۋدى شەشكەن.

ال الەۋمەتتىك جەلى قولدانۋشىلارى دەپۋتاتتاردىڭ ۇسىنىسىنا قارسى ەكەندەرىن جارىسا جازدى، ءتىپتى ولاردىڭ كوپتىگى سونشا، كىمنىڭ قولداعانىن تۇسىنبەي دال. ەڭ بەلسەندىلەرى اۋداندارعا ەكى استانانىڭ ەمەس، اقتوبە تاريحىنا قاتىسى بار اتاۋلاردى بەرۋدى ۇسىنىپ، حات جازدى. حات جازعانداردىڭ قاتارىنا تاريحشىلار، جۋرناليستەر، مۇعالىمدەر مەن وزگە دە ينتەلليگەنسيا وكىلدەرى قوسىلدى.