ليفتكە قايتىس بولعان اقتوبەلىك ءجۋرناليستىڭ كۇيەۋى قايعىلى وقيعانى ءوز كوزىمەن كورگەن 3 جاستاعى قىزىنىڭ قازىرگى جاعدايى تۋرالى ايتتى، دەپ حابارلايدى Qamshy.kz اقپارات اگەنتتىگى mgorod.kz سايتىنا سىلتەمە جاساپ. 

مارقۇمنىڭ جولداسى سول قايعىلى وقيعا ءقازىر قىزىنىڭ ەسىنە تۇسەتىنىن ايتادى. 3 جاستاعى قىز ليفتكە جۇگىرىپ كىرىپ ۇلگەرگەن. ال ونىڭ ارتىندا كەلە جاتقان اناسى ليفتكە كىرۋگە ۇلگەرمەي، ەسىگى جابىلىپ، بىردەن جوعارى كوتەرىلىپ كەتىپتى. مارقۇمنىڭ دەنەسىن جولداسى قايىرجان ەرقاسىموۆتىڭ ءوزى العان. 

«ايەلىم ليفتكە كىرىپ ۇلگەرمەگەن. تەك دەنەسى عانا كىرگەن دە، اياعى سىرتتا قالىپ قويعان. كەۋدەسى مەن ءىشىن قىسىپ قالعان. ءولىمنىڭ سەبەبى – قىسىلۋدان بولعان اسفيكسيا. بۇل تۋرالى سوت ساراپتاماسىن العاندا ءبىلدىم»، – دەيدى مارقۇمنىڭ جولداسى قايىرجان ەرقاسىموۆ. 

وتكەن سەنبىدە تۋىستارى ايزات ءابدىساماتتى جەر قوينىنا تاپسىردى. مارقۇمدى سوڭعى ساپارعا شىعارىپ سالۋعا جاقىندارى مەن تانىستارى عانا ەمەس، جۇزدەگەن تانىس ەمەس ادام كەلگەن. ال مارقۇمنىڭ جولداسى قايىرجان اناسىنىڭ ءولىمىن ءوز كوزىمەن كورگەن 3 جاستاعى قىزىنىڭ جاعايىن ويلاپ، ۋايىمداپ ءجۇر. قايىرجان ەرقاسىموۆتىڭ ايتۋىنشا، قىز 3 جاستا بولسا دا قورقىنىشتى جاعدايدىڭ بولعانىن تۇسىنەدى. بۇلدىرشىنمەن پسيحولوگتار جۇمىس ىستەپ ۇلگەرگەن. 

«ءبىرىنشى كۇنى قيىن بولدى. ۇيىقتاي المادىق. ەكىنشى كۇنى دە ەسىنە ءتۇسىپ كەتە بەرەدى. «انامدى قىسىپ قالدى»، — دەپ ايتادى. «انام قۇلادى، سوسىن مەن جىلادىم»، - دەيدى. ءبىراق اناسىن سۇرامايدى. مەنىڭشە، ول دا سەزەدى. نە دەگەنمەن قورقىنىشتى جايتتى ءوز كوزىمەن كوردى عوي. وقيعا ءالى قىزىمنىڭ كوز الدىندا»، – دەيدى مارقۇمنىڭ جولداسى. 

قايعىلى وقيعادان كەيىن وبلىس اكىمى بەردىبەك ساپاربايەۆ بارلىق جەدەلساتىنى تەكسەرۋدى تاپسىردى. ال ىشكى ىستەر دەپارتامەنتى بولعان وقيعانىڭ سەبەبى مەن كىنالىلەردى ىزدەستىرىپ جاتىر. 

ەستەرىڭىزگە سالا كەتەيىك، بىرنەشە كۇن بۇرىن اقتوبەدەگى تۇرعىن ۇيلەردىڭ بىرىندە ايەل ليفتكە قىسىلىپ، قايتىس بولعان ەدى. وقيعانىڭ بارلىعىن 3 جاستاعى قىزى ءوز كوزىمەن كورگەن.