وڭتۇستىك قازاقستان وبلىسىنىڭ اكىمى ج.تۇيمەبايەۆ جۇڭگو حالىق رەسپۋبليكاسىنىڭ الماتىداعى باس كونسۋلى چجان ۆەي مىرزا باستاعان قىتايلىق كونسۋلدىق وكىلدەرىمەن كەزدەستى.
كەزدەسۋ بارىسىندا تاراپتار ەكى ەل اراسىنداعى ساۋدا-ەكونوميكالىق، مادەني-گۋمانيتارلىق جانە تۋريزم سالاسىنداعى ىنتىماقتاستىقتىڭ پەرسپەكتيۆالى باعىتتارىن كەڭەيتۋ ماسەلەلەرىن تالقىلادى. ءوز كەزىندە وبلىس اكىمى ءوڭىردىڭ الەۋمەتتىك-ەكونوميكالىق دامۋ جاعدايى، بولاشاقتاعى دامۋ مۇمكىندىكتەرى مەن قولعا الىنىپ جاتقان ىرگەلى جوبالار تۋرالى باياندادى.
قازاقستان مەن جۇڭگو اراسىندا ستراتەگيالىق سەرىكتەستىك پەن ءتۇرلى سالالاردا تىعىز قارىم-قاتىناس ورناعانىن ايتقان وبلىس اكىمى شيرەك عاسىردا ەكى مەملەكەتتىڭ سەنىمدى جانە مازمۇندى ديالوگى ورناتىلعانىن اتاپ ءوتتى.
«بۇگىندە ەكى ەلدىڭ ەكونوميكالىق ىنتىماقتاستىعى ايتارلىقتاي العا جىلجىپ، قوس ەلدىڭ اراسىنداعى قارىم-قاتىناس نىعايا ءتۇستى. ماسەلەن، قازاقستان مەن جۇڭگو اراسىنداعى يندۋستريالاندىرۋ جانە ينۆەستيسيالار سالاسىنداعى ىنتىماقتاستىق تۋرالى كەلىسىمنىڭ شەڭبەرىندە ەلىمىزدە 51 جوبا جۇزەگە اسىرىلۋدا. ونىڭ ىشىندە ءبىزدىڭ وبلىستا كورشى ەلمەن بىرلەسكەن 5 جوبا قولعا الىندى. ول مودەرنيزاسيادان وتكەن شىمكەنت مۇناي زاۋىتى مەن ماقتادان ءجىپ وندىرەتىن «حلوپكوپروم سەلليۋلوزا» زاۋىتى، مەتاللۋرگيا وندىرىسىندەگى «امير-ا» جشس-گى مەن پوليەتيلەن قالدىقتارىن قايتا وڭدەپ، شتاپەلدى تالشىق شىعاراتىن «Green Technology Industries» كاسىپورىنى جانە تۇيە ءسۇتىن وڭدەيتىن «Golden Camel Group LTD» زاۋىتى»،-دەدى ايماق باسشىسى.
سونىمەن قاتار اكىم وڭتۇستىك قازاقستان وبلىسى مەن قىتايدىڭ وڭىرلەرى اراسىنداعى ءوزارا ءتيىمدى ساۋدا-ەكونوميكالىق جانە ينۆەستيسيالىق ىنتىماقتاستىقتى دامىتۋعا زور مۇمكىندىكتەر بار ەكەنىنە سەنىم ءبىلدىرىپ، اۋىل شارۋاشىلىعى مەن ونەركاسىپ جانە تۋريزم سالاسىندا ارىپتەستىك بايلانىستى دامىتۋعا دايىن ەكەنىن جەتكىزدى.
وڭتۇستىك قازاقستان وبلىسىنا جاساعان ءتورتىنشى ساپارى ەكەنىن ايتقان باس كونسۋل ءاربىر كەلگەن كەزىندە ءوڭىردىڭ بارلىق باعىت بويىنشا دامىپ جاتقانىنا كۋا بولاتىندىعىن ايتتى.
«وڭتۇستىك قازاقستان ەلدەگى كوپتەگەن كورسەتكىشتەر بويىنشا كوش ىلگەرى ەكەندىگىن ءبارى بىلەدى. مۇندا ينۆەستورلار ءۇشىن قولايلى جاعداي جاسالعان. سوندىقتاندا ەكى تاراپتىڭ مۇددەلەرىنە ساي كەلەتىن ءبىرقاتار ۇسىنىستاردى جەتكىزسەم دەيمىن. ماسەلەن، اۋىل شارۋاشىلىعى ونىمدەرى مەن ازىق-تۇلىك ونىمدەرىن قايتا وڭدەۋ سالاسى مەن تۇرمىستىق قالدىقتاردى قايتا وڭدەۋ، ەنەرگيا كوزدەرىن دامىتۋ جانە قالالىق جانە نارىقتىق ينفراقۇرىلىم قۇرىلىسى اياسىنداعى ىنتىماقتاستىقتى كەڭەيتۋ»،-دەدى چجان ۆەي.
وبلىس اكىمى ج.تۇيمەبايەۆ جالپى ەكى تاراپتىڭ دا الەۋمەتتىك-ەكونوميكالىق دامۋى تۇرعىسىنان ءوز تيىمدىلىگىن كورسەتەتىن بۇل ۇسىنىستاردى قولدايتىندىعىن ايتىپ، ەكى ەلدىڭ مەملەكەت باسشىلارىنىڭ باستاماسىمەن قولعا الىنعان «نۇرلى جول» باعدارلاماسى مەن «جىبەك جولىن» جاڭعىرتۋ جوبالارىن ساپالى ورىنداۋ باعىتىندا ىنتىماقتاسا جۇمىس ىستەۋگە نيەت ءبىلدىردى.
پىكىر قالدىرۋ