بۇگىن پاۆلوداردا كۋتۋزوۆ كوشەسىنىڭ اتىن تاۋەلسىزدىك دەپ اۋىستىرۋعا بايلانىستى قوعامدىق تىڭداۋ ءوتتى. حالىقتىڭ كوبى بۇل وزگەرىستى قولداعانىمەن، ءارتۇرلى كوزقاراستار دا ايتىلدى، دەپ حابارلايدى Qamshy.kz اقپارات اگەنتتىگى. 

جارىسسوزگە شىققان كەرەكۋلىكتەر كەزەك-كەزەك پىكىر ءبىلدىرىپ جاتتى.

قازاقستان جازۋشىلار وداعى پاۆلودار وبلىستىق فيليالىنىڭ ديرەكتورى ارمان قاني تاريحي دەرەكپەن بۇلتارتپاس ءۋاج كەلتىردى.

— قۇرمەتتى جەرلەستەر! مەن كۋتۋزوۆتىڭ ۇلى قولباسى ەكەنىن تۇسىنەمىن، ءبىراق قازاقستان ءۇشىن ەمەس، رەسەي ءۇشىن (دۋ قول شاپالاق). ونىڭ قازاقستانعا ەشقانداي قاتىسى جوق. پاۆلودارعا ءتىپتى بەس قايناسا سورپاسى قوسىلمايدى. بۇل جەرگە ناپولەون ەمەس، جوڭعارلار شابۋىل جاساعان. جوڭعارلاردان ءبىزدى مالايسارى، ولجاباي، جاسىباي سىندى باتىرلار قورعادى. وكىنىشتىسى، ولاردىڭ ەشبىرىنىڭ اتىنا پاۆلوداردا كوشە بەرىلگەن جوق. ارينە، مەن كۋتۋزوۆ كوشەسىن تاۋەلسىزدىك داڭعىلى دەپ وزگەرتۋدى جاقتايمىن! — دەدى اقىن.

تاۋەلسىزدىك اتاۋىنا نەگىزىنەن وزگە ۇلت وكىلدەرى، اسىرەسە، ەتنيكالىق ورىستار قارسى شىقتى. پاۆلودار تۇرعىنى ليۋبوۆ دوبرىنينا كوشە اتاۋىن وزگەرتۋ ۇلكەن شىعىن ەكەنىن ايتا كەلىپ، «بيلىك سول اقشاعا جولداردى جوندەپ، كوشەنى كوركەيتسىن» دەگەن تالاپ قويدى.

كوشەنىڭ بۇرىنعى اتاۋىن قالدىرۋ ءۇشىن: «كۋتۋزوۆتىڭ اتاسىنىڭ اتى – قۇتۇز، تۇقىمى – تۇركى»، — دەۋشىلەر دە بولدى.

ال كەرەكۋلىك جۋرناليست ەسەنبەك سانات ۇلى: «تاۋەلسىزدىك اتاۋىنا قارسى ادامدار – قازاقتىڭ تاۋەلسىزدىگىنە قارسى ادامدار»، — دەپ توتەسىنە كوشتى.

پاۆلوداردىڭ قۇرمەتتى ازاماتى احمەت دەمەسىنوۆ قالاداعى لەرمونتوۆ كوشەسىنە قونايەۆتىڭ ەسىمىن بەرۋدى ۇسىندى.

جيىن سوڭىندا كوپشىلىكتىڭ داۋىس بەرۋىمەن كۋتۋزوۆ كوشەسىنىڭ اتاۋىن تاۋەلسىزدىك دەپ وزگەرتۋ ماقۇلداندى. قوعامدىق تىڭداۋدا ايتىلعان ءار پىكىر حاتتاماعا تىركەلەدى. حاتتاما جەتى كۇن ىشىندە باق-تا جانە رەسمي ينتەرنەت-رەسۋرستاردا جاريالانادى. قاجەتتى قۇجاتتار ونوماستيكالىق كوميسسياعا جولدانادى.