جاقىندا دوڭگەلەك دۇنيەنىڭ سوناۋ وڭتۇستىك-شىعىس قيىرىندا جاتقان ۆەتنام جەرىندە ۇلتىمىزدىڭ تاريحى مەن بۇگىنگى جەتىستىكتەرىن، بيىك مادەنيەتى مەن عىلىمىن ناسيحاتتايتىن ايرىقشا ءمانى بار رۋحاني شاڭىراق بوي كوتەردى. اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ رەكتورى، اكادەميك س.ج.پىرالييەۆ پەن حانوي ۇلتتىق پەداگوگيكالىق ۋنيۆەرسيتەتىنىڭ رەكتورى نگۋەن ۆەت تحين مىرزالاردىڭ باستاماسىمەن ەكى وقۋ ورنى اراسىنداعى مادەني جانە وقۋ-ادىستەمەلىك، عىلىمي بايلانىستار ورناتۋ جونىندەگى كەلىسىم-شارتقا سايكەس حانوي قالاسىندا اباي اتىنداعى مادەني جانە عىلىمي ورتالىق ءوز جۇمىسىن باستادى. بۇل جايلى قازاقستان جازۋشىلار وداعىنىڭ سايتى حابارلادى اباي ورتالىعىنىڭ سالتاناتتى اشىلۋ راسىمىندە حانوي ۇلتتىق پەداگوگيكالىق ۋنيۆەرسيتەتىنىڭ رەكتورى، پروفەسسور مين مىرزا، اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ءبىرىنشى پرورەكتورى، پروفەسسور م.ە.ەرماعانبەتوۆ مىرزا ءسوز سويلەپ، مەرەكەلىك لەنتانى قيدى. سونداي-اق ورتالىقتى اشۋ سالتاناتىنا فيلولوگيا فاكۋلتەتىنىڭ دەكانى، پروفەسسور ب.ءابدىعازي ۇلى، پروفەسسورلار س.ب.بەگالييەۆا مەن ت.ايتقازينالار قاتىستى. شاڭىراق كوتەرگەن جاڭا ورتالىقتىڭ باستى ماقساتى – ۆەتنام جۇرتشىلىعىنا ۇلى اباي ەسىمى ارقىلى قازاق حالقىنىڭ رۋحاني بولمىسى، ادەبيەتى مەن مادەنيەتى، عىلىمى مەن ءبىلىمى جونىندە كەڭىنەن ماعلۇمات بەرۋ. الداعى ۋاقىتتا ەكى ەل عالىمدارىنىڭ بىرلەسكەن عىلىمي جوبالارىن جۇزەگە اسىرۋ، ۋنيۆەرسيتەتتەر اراسىندا وقىتۋشىلار مەن ستۋدەنتتەر الماسۋ، ارنايى توپتاردا ۆەتنام ستۋدەنتتەرىنە قازاق جانە ورىس تىلدەرىن ۇيرەتەتىن كۋرستار اشۋ، لەكسيالىق ساباقتار، ءتۇرلى كورمەلەر ۇيىمداستىرۋ دا جوسپارلانۋدا. بۇل شارالاردىڭ بارلىعى اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ عالىم-پروفەسسورلارىنىڭ كۇشىمەن جۇزەگە اسپاق. ۆەتنام توپىراعىندا شاڭىراق كوتەرگەن بۇل وتاۋ اباي مۇرالارىن ناسيحاتتاۋ، تانىستىرۋ ماقساتىندا اشىلىپ وتىرعان ەكىنشى ورتالىق. بۇدان بۇرىن كورشى جۇڭگو حالىق رەسپۋبليكاسىنىڭ قۇلجا قالاسىنداعى ىلە پەداگوگيكالىق ۋنيۆەرسيتەتىندە وسىنداي اباي ورتالىعى اشىلعان بولاتىن. اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ ۇجىمى بولاشاقتا مۇنداي ورتالىقتاردى تۇركيا، رەسەي، ت.ب. ەلدەردەن دە اشپاق نيەتتە. BAQ.KZ