الماتىدا 4 جاسار ۇل بالا جوعالىپ كەتتى، — دەپ حابارلايدى Qamshy.kz اقپارات اگەنتتىگى الماتى ءىىد باسپا ءسوز قىزمەتىنە سىلتەمە جاساپ.

 ءىىد مالىمەتىنشە، 2014 جىلى تۋعان كومەكوۆ ارسەن 17 مامىردا الماتى قالاسى الاتاۋ اۋدانىنداعى شاڭىراق شاعىن اۋدانىندا جوعالىپ كەتكەن. ول كۇننىڭ ەكىنشى جارتىسىندا ءۇي قورشاۋىنىڭ سىرتىندا ەرەسەكتەردىڭ قاراۋىنسىز ويناپ ءجۇرىپ، بەلگىسىز باعىتقا كەتىپ قالعان.

«بالانىڭ جوعالىپ كەتكەنىن ونىڭ تۋىستارى تۇنگى ساعات ون شاماسىندا حابارلادى، ولاردىڭ ءوز بەتىنشە ىزدەگەن جۇمىستارى ناتيجە بەرمەگەن. قىلمىستىق پوليسيا، كامەلەتكە تولماعانداردىڭ ىستەرى جونىندەگى ۋچاسكەلىك پوليسيا، ۋچاسكەلىك ينسپەكتورلار، جول-پاترۋلدىك پوليسيا، ارنايى دايىندالعان يتتەرىمەن كينولوگتار جانە ۇلتتىق گۆارديانىڭ اسكەري قىزمەتكەرلەرىنەن شۇعىل تۇردە ىزدەۋ توبى قۇرىلدى. باستاپقىدا ولار 23 بولعان، ءقازىر توپ سانى 34-كە جەتتى. بالانى ىزدەۋگە جۇمىلدىرىلعان پوليسەيلەردىڭ سانى جۇزدەن اسادى»، — دەپ حابارلادى الماتى ءىىد رەسمي وكىلى، پوليسيا پودپولكوۆنيگى سالتانات ازىربەك.

ونىڭ ايتۋىنشا، ەڭ الدىمەن بالا ءۇشىن ءقاۋىپتى جەرلەر تەكسەرىلدى: كارىز ليۋكتەرى، قۇدىقتار، ارىقتار، كانالدار، ترانشەيالار، توعايلار مەن وزەندەردىڭ ماڭى، توعاندار، يەسىز قالعان ۇيلەر، شاتىرلار جانە تاعى دا باسقا.

«26 600 ءۇيدى ارالاپ، 18 مىڭ ادامنان سۇرالدى. ءبىر ايەل سول كۇنى كەشكى ساعات 20.00 شاماسىندا دۇكەننىڭ جانىندا جىلاپ تۇرعان بالانى كورگەنىن ءبىراق، نەگە ەكەنى، نازار اۋدارماعانىن ايتتى. ماماندار وسى شاعىن اۋدانداعى ۆيدەو باقىلاۋ كامەرالارىنداعى مالىمەتتەردى تەكسەرىپ جاتىر»، — دەدى ازىربەك.

بالاعا قاتىستى مالىمەتتەر جاقىن ماڭداعى اۋداندار مەن وبلىستارعا تاراتىلدى. پوليسيانىڭ حابارلاۋىنشا، ارسەن جوعالىپ كەتكەن كۇنى ونىڭ ۇستىندە قارا ءتۇستى فۋتبولكا بولعان، كەۋدەسىندە قىزىل جولاقتارى بار، قارا كوك ءتۇستى تريكو، اياعىندا قارا ءتۇستى كروسسوۆكا بولعان. بالانىڭ بويى — شامامەن 100 سانتيمەتر، ەرەكشە بەلگىلەرى جوق.

«بالاعا قاتىستى قانداي دا ءبىر ماعلۇماتى بار نەمەسە كەزدەسكەن ازاماتتار بولسا مىنا تەلەفون نومەرلەرىنە حابارلاسۋدى سۇرايمىز: 227-55-00؛ 227-55-01؛ 227-55-02؛ 8-701-523-17-07 نەمەسە 102»، — دەدى ازىربەك.