«قازاقستان» تەلەارناسىندا كورسەتىلەتىن «كەلىن» ءۇندى تەلەحيكاياسىنىڭ باستى رولدەرىنىڭ ءبىرى، شيۆا ءرولىن سومداۋشى (باستى رولدەردىڭ ءبىرى - ءانانديدىڭ كۇيەۋى) سيدحارت شۋكحلا 27 اقپان - 2  ناۋرىز ارالىعىندا استانا قالاسىنا كەلدى. سيدحارت استاناعا اناسىمەن كەلدى. ريتوي شۋحلا سونىمەن قوسا  سيدحاردتىڭ اگەنتى بولىپ تابىلادى.

استانا حالىقارالىق اۋەجايىندا سيدحارتتى «قازاقستان» تەلەارناسىنىڭ تانىمال جۇرگىزۋشىلەرى نۇرلان قويانبايەۆ، ءلايلا سۇلتان قىزى قارسى الدى.

ءوزىنىڭ سۋرەتتەرى مەن باسپا ءسوز بەتتەرىندە جارىق كورگەن ماقالالارىن كورىپ، قازاقستاندىقتاردىڭ اراسىندا اسا تانىمال ەكەنىنە شىن كوڭىلدەن تاڭ قالعانىن جاسىرمادى.

سيدحارتتىڭ ايتۋىنشا، مۋمبايدان شىققاندا اۋا تەمپەراتۋراسى +30 گرادۋس بولعان ەكەن. استانادا ءبىراز توڭعانىن جاسىرمادى. سوعان قاراماستان، قازاق حالقىنىڭ قوناقجايلىعى دالاداعى ايازدى قولمەن جۇلىپ العانداي. سونىمەن قوسا، ەلوردانىڭ ءزاۋلىم عيماراتتارى مەن قالىڭ قارلارى سيدحارتقا ەرەكشە اسەر ەتكەن كورىنەدى. سەبەبى، ول قىس مەزگىلىندە شاڭعى سپورتىمەن اينالىسقاندى ۇناتاتىنىن جاسىرمادى.

28 اقپان، سەنبى كۇنى، ساعات 15.00-دە «حان شاتىر» ساۋدا-ويىن ساۋىقتىرۋ ورتالىعىندا اكتەر كورەرمەندەرمەن كەزدەسىپ، افتوگراف-سەسسيا وتكىزدى. اكتەرمەن كەزدەسۋگە «حان شاتىرعا» 23 مىڭنان استام ادام كەلدى.

سيدحارت شۋكحلا مۋمبايدا دۇنيەگە كەلگەن. 34 جاستا. 2008 جىلدان بەرى اكتەر شەبەرلىگىن شىڭداپ كەلەدى. بۇدان بۇرىن ءسان بيزنەسىندە قىزمەت اتقارعان. سىرتقى كەلبەتى، بويى (188 سم.) دا بۇل قىزمەتكە ساي كەلەدى. «جۇلدىزدارمەن بي بيلەۋ» شوۋىنا قاتىسقان. ۇستەل تەننيسىمەن جانە فۋتبولمەن شۇعىلدانادى. 2013 جىلى ءۇندىنىڭ تەليەۆيزيا اكادەمياسى سيدحارتقا «جىل ءارتىسى» اتاعىن بەرگەن بولاتىن. سول جىلى جىل سايىنعى «Zee Gold Awards» تۆ سىيلىعىنىڭ نۇسقاسى بويىنشا ول ەڭ «دەنەلى» اكتەر اتاندى. ءۇندىنىڭ «Stardust» كينو تۋرالى جۋرنالى 2014 جىلى ونى كينويندۋسترياد  اعى «ءۇمىت كۇتەتىن جاس اكتەرلەردىڭ ءبىرى» دەپ باعالاعان بولاتىن. ال ءۇندىنىڭ جىل سايىنعى «Filmfare Awards» كينوسىيلىعى ءۇندى تىلىندە تۇسىرىلگەن فيلمدەردەگى جەتىستىكتەرى ءۇشىن سيدحارتتى «ەرلەر دەبيۋتى-2015» سىيلىعىنا ۇسىندى. قازىرگى ۋاقىتتا سيدحارت ءۇندىنىڭ بەلگىلى پروديۋسەرى كاران دجوحارمەن ءۇش فيلمگە ءتۇسۋ ءۇشىن شارتقا قول قويدى.