"Missis World-2018" اتانعان قىرعىزستاندىق سانيا شاكيروۆا قىرعىزستاندا جول اپاتىنان قايتىس بولدى. بۇل جايىندا تەلەجۇرگىزۋشى اسسول مولدوكماتوۆا حابارلادى.
اپات بالىقشى – انانيەۆو – قاراكول تاسجولىندا بولعان. تاكسي جۇرگىزۋشىسى كولىكتى باسقارا الماي، مازاردىڭ قابىرعاسىنا بارىپ سوعىلعان. كولىكتە ءۇش ادام بولعان. شاكيروۆا وقيعا ورنىندا بىردەن كوز جۇمعان. ال قالعان ەكى ادامنىڭ ءومىرى ءۇشىن دارىگەرلەر كۇرەسىپ جاتىر.
سۇلۋلىق بايقاۋلارىنىڭ جەڭىمپازدارى بىردەن جۇرت نازارىنا ىلىگەدى. اتاق پەن داڭق، تابىسقا جەتەدى، الايدا ول اتاق ەشتەڭەگە كەپىلدىك بەرە المايدى. ءتىپتى ومىرىنە دە. وكىنىشكە قاراي سۇلۋلىق بايقاۋلارىنىڭ جەڭىمپازدارى جۇمباق جاعدايدا ءجيى قازا تابادى.
22 جاسىندا كوز جۇمعان
وتكەن جىلدىڭ شىلدەسىندە 22 جاستاعى جىبەك نۋكەيەۆا ۇزاق ۋاقىت اۋرۋدان كەيىن قايتىس بولعان. ول — "ميسس قىرعىزستان" بايقاۋىنىڭ جەڭىمپازى. نۋكەيەۆانىڭ ارتىندا 8 ايلىق بالاسى قالدى. ول ءوزىنىڭ ناۋقاس ەكەنىن جۇكتىلىكتىڭ جەتىنشى ايىندا بىلگەن. ول الەۋمەتتىك جەلىدە اۋرۋىن اشىق ايتىپ، كۇرەسىپ جۇرگەنىن جازعان.
ءوزى مە الدە باسقا ما؟
وتكەن جىلدىڭ كۇزىندە قىزدار جاتاقحاناسىندا 21 جاستاعى كەليي نەلسوننىڭ دەنەسى تابىلعان. ول «ميسس اليانس»، «ميسس چادرون» اتانعان جانە «ميسس نەبراسك» بايقاۋىنا دايىندالىپ جۇرگەن.
پوليسيا بويجەتكەن ءوزىن ءولتىردى دەپ شەشىم قابىلداعان. قىلمىستىق ءىس قوزعاماعان.
2010 جىلدىڭ جازىندا مۋمبايدا 37 جاستاعى سانبيكە ۆيۆەكا بابادجانىڭ دەنەسى پاتەردەن تابىلعان. ول «الەم ارۋى – ماۆريكيي-1993» پەن «Miss Universe – ماۆريكيي-1994» بايقاۋلارىنىڭ جەڭىمپازى بولعان.
2016 جىلدىڭ تامىزىندا «الەم ارۋى-2016» بايقاۋىنىڭ فينالىنا شىققان 17 جاستاعى ەليس ميللەر-كەننەدي جانتۇرشىگەرلىك جولا اپتىنان كوز جۇمعان.
بويجەتكەننىڭ كولىگى باسقا كولىكپەن سوقتىعىسىپ، اۋرۋحاناعا تۇسەدى. الەمنىڭ تۇپكىر-تۇپكىرىنەن بويجەتكەننىڭ ەمىنە اقشا جىبەرىلگەنىمەن، دارىگەرلەر ونى امان الىپ قالا المايدى.
ولتىرۋگە ادام جالداعان
1996 جىلى «رەسەي ارۋى» بايقاۋىن 16 جاستاعى الەكساندرا پەتروۆا جەڭىپ الادى. سول ساتتەن باستاپ ۇلكەن تانىمالدىلىققا يە بولعان بويجەتكەنگە گولليۆۋدتا جۇمىس ىستەۋ ۇسىنىلادى. جان-جاقتان كەلگەن ۇسىنىستاردى قابىلداماعان ارۋ كونستانتين چۋۆيلين ەسىمدى كاسىپكەرگە تۇرمىسقا شىققالى جۇرەدى. ءبىر كۇنى اۆتوكولىكتەن ءتۇسىپ، پاتەرگە كوتەرىلە بەرگەندە ارنايى جالدانعان قىلمىسكەر جاستاردىڭ الدىنان شىعىپ، الەكساندراعا وق اتادى. 20 جاسقا تولۋىنا 2 كۇن قالعاندا بويجەتكەن اۋرۋحاناعا بارار جولدا كوپ قان جوعالتىپ، كوز جۇمادى.
