مەملەكەتتىك حاتشى گۇلشارا ءابدىقالىقوۆا بوسنيا جانە گەرسەگوۆينانىڭ قازاقستانداعى توتەنشە جانە وكىلەتتى ەلشىسى قىزمەتىن قوسا اتقارۋشى مۋستافا مۋەزينوۆيچتەن، ەل-سالۆادور رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى قىزمەتىن قوسا اتقارۋشى ەفرەن ارنولدو بەرنال چيەۆەزدەن، نيگەريا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى قىزمەتىن قوسا اتقارۋشى يبراحيم حامزاتتان سەنىم گراموتالارىن قابىلدادى.

گۇلشارا ءابدىقالىقوۆا بوسنيا جانە گەرسەگوۆينانىڭ ەلشىسىمەن كەزدەسۋدە يۋنەسكو-نىڭ ماتەريالدىق ەمەس مادەني مۇراسى كوميتەتىنىڭ بيىلعى 4-6 ماۋسىمدا پاريجدە وتكەن سايلاۋىندا ءبىزدىڭ ەلگە قولداۋ كورسەتكەنى ءۇشىن العىس ءبىلدىردى. قازاقستان اتالعان كوميتەتكە العاش رەت سايلانىپ وتىر جانە بۇكىل جەر شارىنداعى مادەني مۇرالاردى ساقتاۋ ءىسىنىڭ تەورياسى مەن تاجىريبەسىن جەتىلدىرۋگە ءوز ۇلەسىن قوسۋعا نيەتتى.  

– تىكەلەي ىسكەرلىك بايلانىستى دامىتۋ ماڭىزدى. ەكى ەلدىڭ ساۋدا-ونەركاسىپ پالاتالارى اراسىندا ىنتىماقتاستىق ورناتىپ، ىسكەر توپتار وكىلدەرىنىڭ كەزدەسۋلەرىن وتكىزۋدى ۇسىنامىز، – دەدى گۇلشارا ءابدىقالىقوۆا.

ەل-سالۆادور ەلشىسىمەن اڭگىمەلەسۋ بارىسىندا مەملەكەتتىك حاتشى قازاقستان ەكىجاقتى ىنتىماقتاستىقتى دامىتۋعا مۇددەلى ەكەنىن اتاپ ءوتتى.

– ءسىزدىڭ ەلدى بۇگىنگى كۇنى ەكسپو كورمەسىنىڭ پلاتفورماسىندا بۇۇ جانە ءىت-ستارتاپتار حالىقارالىق تەحنوپاركىنىڭ قولداۋىمەن «جاسىل» تەحنولوگيالار مەن ينۆەستيسيالىق جوبالاردى دامىتۋ جونىندەگى حالىقارالىق ورتالىعىندا،  استانا حالىقارالىق قارجى ورتالىعىندا جۇزەگە اسىرىلىپ جاتقان جوبالار بويىنشا ىنتىماقتاستىققا شاقىرامىز، – دەدى گ.ءابدىقالىقوۆا.  

نيگەريا ەلشىسىمەن كەزدەسۋ كەزىندە مەملەكەتتىك حاتشى قازاقستان قاۋىپسىزدىك كەڭەسىنىڭ 2017-2018 جىلدارداعى تۇراقتى ەمەس مۇشەسى ەكەنىنە، باسقالارمەن بىرگە سومالي مەن ەريترەيا بويىنشا دا ءبىرقاتار سانكسيالىق كوميتەتتەردى باسقارعانىنا نازار اۋداردى.

– ءبىز نيگەريانى يسلام ىنتىماقتاستىعى ۇيىمىنىڭ، افريكا وداعىنىڭ، باسقا دا كوپ جاقتى قۇرىلىمداردىڭ وڭىرلىك جانە حالىقارالىق اۋقىمدا سىندارلى ورنى بار ماڭىزدى مۇشەسى رەتىندە بىلەمىز، – دەدى گۇلشارا ءابدىقالىقوۆا.