اقتاۋ قالاسىندا كاسپيي ماڭى ەلدەرىنىڭ بەسىنشى سامميتىنە اقتاۋ قىزۋ دايىندالىپ جاتىر. يلحام الييەۆ، حاسان روۋحاني، گۋربانگۋلى بەردىمۇحامەدوۆ، ۆلاديمير پۋتين سياقتى قوناقتاردىڭ كەلۋى قۇرمەتىنە اقتاۋدا 7 ميلليوننان استام گۇل وتىرعىزىلىپتى. جەرگىلىكتى باسىلىمداردىڭ جازۋىنشا بۇل تۋرالى «جاسۋلان فلورا» ج ش س ديرەكتورى جۇماگۇل وماروۆا ايتقان. ەگىلگەن گۇلدىڭ 40 پايىزى عانا كوپ جىلدىق بولسا، 60 پايىزى ءبىر جازدىق ماۋسىمعا عانا ارنالعان.

كاسىپكەر ديرەكتوردىڭ ايتۋىنشا، ساياسي شارانى وتكىزۋ ءۇشىن قالانى گۇلمەن بەزەندىرۋگە شاقىرۋ قالالىق اكىمدىكتەن تۇسكەن. تاپسىرىسقا ساي، قالالىق اكىمشىلىك الدىنا، 4، 14، 15 شاعىن اۋداندارداعى جاعالاۋعا، Renaissance قوناق ءۇيى ماڭىنا، «گرين پارك»، «وازيس» تۇرعىن ءۇي كەشەندەرىنە، دوستىق ءۇيى مەن مەديسينالىق كوللەدجگە 25-تەن استام گۇل ءتۇرى ەگىلىپتى. الايدا، گۇل ەگۋشى كومپانيا باسشىسى بۇل جۇمىستىڭ وڭايعا سوقپاعانىن، گۇل وتىرعىزۋعا قاجەتتى جەرلەردەن 200-دەن استام جۇك كولىگى قوقىس شىعارعانىن ايتقان. ءتىپتى، اقتاۋ قالاسىنىڭ 55 جىلدىعىنا «جاسۋلان فلورا» كومپانياسى ءوز ەسەبىنەن 100 ميلليونداي قاراجات جۇمساپ، 1،3 ميلليوننان استام گۇل وتىرعىزعان.

ايتا كەتەتىن بولساق، قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ شاقىرۋىمەن سامميتكە ازەربايجان رەسپۋبليكاسىنىڭ پرەزيدەنتى يلحام الييەۆ، يران يسلام رەسپۋبليكاسىنىڭ  حاسان رۋحاني، رەسەي فەدەراسياسىنىڭ پرەزيدەنتى ۆلاديمير پۋتين جانە تۇركىمەنستان پرەزيدەنتى گۋربانگۋلى بەردىمۇحامەدوۆ كەلەدى.

سامميت بارىسىندا تاراپتار كاسپيي تەڭىزىنىڭ قۇقىقتىق ستاتۋسى، كاسپييدە ەكونوميكا، كولىك، ەكولوگيا، قاۋىپسىزدىك سالالارىندا ىنتىماقتاستىق ورناتۋ جانە باسقا دا ماسەلەلەردى تالقىلايدى.

ءسامميتتىڭ نەگىزگى قورىتىندى قۇجاتى كاسپيي تەڭىزىنىڭ قۇقىقتىق ستاتۋسى تۋرالى كونۆەنسيا بولادى.

كونۆەنسيانى ازىرلەۋ جۇمىسى 20 جىل بويى جۇرگىزىلدى. قۇجات جوباسىندا  تاراپتاردىڭ كاسپيي تەڭىزىندەگى قىزمەتىنىڭ نەگىزگى قاعيداتتارى، تەڭىز اكۆاتورياسىن، ۇلتتىق سۋ ءتۇبى سەكتورلارىن ءبولۋ ماسەلەلەرى، بيولوگيالىق رەسۋرستاردى، سۋ ءتۇبى مەن جەر قويناۋلارىن يگەرۋمەن بايلانىستى اسكەري ىنتىماقتاستىق جانە شارۋاشىلىق-ەكونوميكالىق قىزمەتتى جۇرگىزۋ، كەمە جۇرگىزۋ، قورشاعان ورتانى قورعاۋ، تەڭىزگە قاتىستى عىلىمي زەرتتەۋلەر ت.س.س. ناقتىلانعان.

كاسپيي تەڭىزىنىڭ قۇقىقتىق ستاتۋسىن رەتتەۋ كاسپيي ايماعىنىڭ ساياسي تۇراقتىلىعى مەن ەكونوميكالىق دامۋىن قامتاماسىز ەتۋ، ونىڭ تابيعي بايلىعىن ساقتاۋ جانە كوبەيتۋ، بىرەگەي گەوگرافيالىق ورنالاسۋىن پايدالانۋ، جاعالاۋ ماڭىنداعى بەس مەملەكەتتىڭ جان-جاقتى ىنتىماقتاستىق ورناتۋى تۇرعىسىنان ستارتەگيالىق ماڭىزدى بولىپ تابىلادى.

ءسامميتتىڭ الدىندا اقتاۋدا 10-11 تامىز ارالىعىندا ارنايى جۇمىس توبىنىڭ وتىرىسى جانە كاسپيي ماڭى مەملەكەتتەرىنىڭ سىرتقى ىستەر مينيسترلەرىنىڭ كەڭەسى وتەدى. 

كاسپيي ماڭى ەلدەرىنىڭ بۇعان دەيىنگى ءسامميتى 2014 جىلى 29 قىركۇيەكتە استراحاندا وتكەن بولاتىن. الايدا كاسپيي تەڭىزىنىڭ ستاتۋسىن انىقتاۋ ناتيجە بەرمەگەن ەدى.