كەشەلى بەرى الەۋمەتتىك جەلى قولدانۋشىلارى اراسىندا رەزونانس تۋدىرعان استانالىق اۋرۋحاناداعى جاعداي ءالى دە ءورشىپ تۇر. ەمدەلۋشى مۇقاعالي بالقىبايەۆ اۋرۋحانا قىزمەتكەرىنەن مەملەكەتتىك تىلدە سويلەۋىن تالاپ ەتكەن ەدى. الايدا 50-دەن اسقان قىزمەتكەرگە قۇرمەتسىزدىك تانىتقان ەمدەلۋشىنىڭ ءوزىن كىنالادى.

بولعان جاعدايعا ءبىر كوز جۇگىرتىپ وتسەك... مۇقاعاليعا 27 تامىز قۇلاعىنا وپەراسيا جاساتىپ، سول كۇنى كەشكە «وتولارينگولوگيا» بولىمشەسىنىڭ 9-پالاتاسىنا جاتقىزىلعان. 28 تامىز پالاتاعا تازالىق ساقتاۋشى ورىس ايەل كىرىپ، ەمدەلۋشىلەرگە ورىسشا سويلەي باستايدى. مۇقاعالي ءوزىنىڭ ورىسشا تۇسىنبەيتىنىن ايتىپ، مەملەكەتتىك تىلدە سويلەۋىن تالاپ ەتەدى. الايدا ايەل قازاق تىلىندە سويلەي المايتىنىن ايتىپ، ەمدەلۋشىمەن سوزگە كەلىپ قالادى. ارتىنشا پالاتاعا دارىگەر اسحات نيكولايۇلىن ەرتىپ كەلەدى. «دارىگەرىم مەنى قورعايتىن شىعار» دەپ سەنگەن ەمدەلۋشىنىڭ ءۇمىتى اقتالمادى. ءمۇقاعاليدىڭ ايتۋىنشا، دارىگەر ەمدەلۋشىنىڭ وزىنە تاپ بەرگەن. ءتىپتى «قازاقشا سويلە دەپ قاقساي بەرسەڭ، اۋرۋحانادان شىعاسى، شىعارۋ تۋرالى انىقتامانى دا ورىس تىلىندە جازىپ بەرەمىن» دەپ «قوقان-لوقى» كورسەتكەن كورىنەدى.

مۇقاعاليمەن  تىلدەسكەن ءبىز دارىگەرى اسحات نيكولاي ۇلىنىڭ دا پىكىرىنە قۇلاق اسپاق بولىپ، حابارلاستىق. ەمدەلۋشىسىنە، قالا بەردى مەملەكەتتىك تىلگە اراشا ءتۇسىپ، قولدايىن دەگەن دارىگەردى كورمەدىك. كەرىسىنشە، «50-دەن اسىپ قالعان تازالىق ساقتاۋشىعا قۇرمەتسىزدىك كورسەتتى» دەپ ءمۇقاعاليدىڭ ءوزىن ايىپتاي باستادى.

«ءوزىڭىز ويلاپ قاراڭىزشى؟! ول ورىس ايەل ءارى 50-دەن اسقان. قازاق ءتىلىن تۇسىنبەيدى. ونداي ادامنان قالايشا مەملەكەتتىك تىلدە سويلە دەپ تالاپ ەتە الاسىڭ.. ول ايەل ەمدەلۋشىگە «قازاقشا بىلمەيمىن» دەپ تۇسىندىرگەن، ءبىراق ەمدەلۋشى ءوز ايتقانىنان قايتپادى»، - دەيدى دارىگەر.

ال «ەمدەلۋشىنىڭ ورىس ءتىلىن بىلمەيتىنىن ەسكەرسەك شە؟» دەگەن ساۋالىمىزعا اسحات نيكولاي ۇلى ەلباسىنىڭ ءۇش تىلدىلىك ساياساتىن ايتىپ، قۇتىلعان بولدى. «نازاربايەۆتىڭ ءوزى ورىسشا سويلەيدى. قازاقشا سويلەي المايتىن ادامعا سول تىلدە سويلە دەپ تالاپ ەتە المايسىڭ. سول سياقتى ورىسشا بىلمەيتىن ادامنان دا ورىسشا سويلەۋىن تالاپ ەتە المايسىڭ» دەپ جاۋاپ قاتتى.

سونىمەن قاتار قازاقستاننىڭ كوپ ۇلتتى مەملەكەت ەكەنىن ايتىپ، ءار ۇلتتىڭ تىلىنە قۇرمەت تانىتۋ كەرەكتىگىن تۇسىندىرۋگە تىرىستى. بۇعان ورىس تىلىندە تازا سويلەپ، حالقىن قۇرمەتتەگەن ابايدى مىسالعا كەلتىردى.

ال «ەمدەلۋشىنى اۋرۋحانادان شىعارىپ جىبەرەمىن، انىقتامانى ورىس تىلىندە جازامىن» دەپ ايتقانىڭىز راس پا؟» دەگەن ساۋالىمىزعا «جالا» دەپ قانا جاۋاپ قاتتى. «ول مەنىڭ ەمدەلۋشىم. ونىڭ دەنساۋلىعى ءۇشىن مەن جاۋاپتىمىن. سول ءۇشىن ونى شىعارىپ جىبەرەم دەگەن اڭگىمە بوس ءسوز»، - دەدى اسحات نيكولاي ۇلى.

بۇل ديالوگتان تۇسىنگەنىمىز، ءوزى ىسىنە وكىنىپ، ەمدەلۋشىدەن كەشىرىم سۇرايتىن دارىگەردى بايقامادىق.