بۇگىن «ازاماتتارعا ارنالعان ۇكىمەت» مەملەكەتتىك كورپوراسياسىندا بىرنەشە ادامنىڭ ءومىرىن قۇتقارعان ەرجۇرەك جىگىتتەر ايدار مۇستافين، دياس راحمەتوۆ جانە رۋسلان قۇرمانوۆ ماراپاتتالدى. ولار قىسىلتاياڭ شاقتا باتىرلىق تانىتىپ، ەرلىك جاساعاندارى ءۇشىن اقپارات جانە كوممۋنيكاسيالار ءمينيسترى داۋرەن ابايەۆتىڭ العىس حاتىنا يە بولدى. سونداي-اق مەملەكەتتىك كورپوراسيانىڭ باسقارما ءتوراعاسى ابىلايحان وسپانوۆ ارىپتەستەرىنە قۇرمەت گراموتاسى مەن اقشالاي سىيلىق تابىس ەتتى.

قوستاناي قالاسىندا 21 تامىزدا تۇندە بولعان وقيعادان كەيىن مامانداندىرىلعان حالىققا قىزمەت كورسەتۋ ورتالىعىنىڭ قاراپايىم وپەراتورلارىنىڭ ەسىمدەرى كۇللى قازاقستانعا تانىلعان بولاتىن. سول ءتۇنى كاربىشيەۆ كوشەسىندەگى كوپقاباتتى ءۇي ورتكە ورانىپ، الاڭسىز كەلە جاتقان ارىپتەستەر وقىستان كومەككە شاقىرعان بالالاردىڭ داۋىسىن ەستيدى. جانايقاي شىققان جاققا جۇگىرگەن جىگىتتەر ءورت ءسوندىرۋ قىزمەتىنىڭ كەلۋىن كۇتپەستەن، ادامداردىڭ ءومىرىن قۇتقارۋعا ۇمتىلادى.

«مەن سونشالىقتى باتىرلىق تانىتتىم دەپ ويلامايمىن، وزگەگە كومەكتەسۋ اركىمنىڭ مىندەتى»، - دەيدى ايدار مۇستافين. ول تەمىر تورلار ارقىلى تۇتىنگە تولعان پاتەردىڭ تەرەزەسىنە ورمەلەپ شىعىپ، تومەندە تۇرعان ارىپتەستەرىنە بالا مەن ءجاسوسپىرىمدى تابىستاعان بولاتىن. سوسىن تۇتىنگە تۇنشىعىپ جاتقان قاريالارعا كومەكتەسۋ ءۇشىن پاتەرگە كىرگەن. ەكى ورامالدى سۋلاپ، ءبىرىن قارت كىسىلەرگە بەرسە، ەكىنشىسىمەن ءتۇتىن كىرىپ جاتقان ەسىكتى قىمتايدى.

وقيعا ورنىنا جەتكەن ءورت سوندىرۋشىلەر مەن جقاج (جىلدام قيمىلدايتىن ارنايى جاساق) قىزمەتكەرلەرى ءورت شىققان ۇيدەگى ادامداردى سىرتقا شىعارادى. سونداي-اق ولار وزگەنى قۇتقارۋ ءۇشىن ءوز ءومىرىن قاۋىپكە تىگىپ، تۇتىنگە ۋلانا باستاعان ايدارعا دا كومەك كورسەتتى.

ايدار، دياس جانە رۋسلان «ازاماتتارعا ارنالعان ۇكىمەتتىڭ» قوستاناي قالاسىنداعى مامانداندىرىلعان حالىققا قىزمەت كورسەتۋ ورتالىعىندا جۇمىس ىستەيدى. ولار كۇندەلىكتى قىزمەت بارىسىندا اۆتوكولىك يەلەرىنە انىقتامالىق اقپارات بەرىپ، ازاماتتاردىڭ قۇجاتتارىن راسىمدەيدى.  ايدار حقو جۇيەسىندە 9 جىلدان بەرى جۇمىس ىستەپ، جاس ماماندارعا ۇلگى بوپ كەلەدى. ەندى ول تەك ەڭبەكتە عانا ەمەس، ومىردە دە وزگەگە ونەگە بولۋدا.

ايتا كەتسەك، قازىرگى تاڭدا مەملەكەتتىك كورپوراسيانىڭ فرونت-وفيستەرىندە 8 مىڭنان استام ادام جۇمىس ىستەيدى. حقو وپەراتورلارى اپتاسىنا التى كۇن ساعات 9.00-دەن 20.00-گە دەيىن ءۇزىلىسسىز قىزمەت كورسەتەدى. فرونت-وفيستەر ارقىلى اي سايىن شامامەن 3 ميلليونعا تارتا مەملەكەتتىك قىزمەت ۇسىنىلادى.