قازاقستان قارىمدى قادام جاساپ، جاڭا سيفرلىق داۋىرگە كىرىپ، ەل ەكونوميكاسىنا ەلەۋلى وزگەرىستەر ەنگىزىپ وتىرعانى كوپشىلىكتىڭ نازارىندا ەكەنىنىن ءبىرى بىلسە، ءبىرى بىلمەي جاتادى. بۇگىنگى تاڭدا ەلەكتروندى ساۋدانىڭ ءورشىپ تۇرعان زامانىندا «سيفرلىق قازاقستان» مەملەكەتتىك باعدارلاماسىنىڭ دا ەلگە بەرەرى مول ەكەنى كۇننەن كۇنگە ايقىندالىپ، دالەلدەنىپ كەلۋدە. باعدارلاما اياسىندا ەلدە قارقىندى تۇردە دامىپ وتىرعان «قازپوشتا» اق ءبىزدىڭ عانا ەمەس شەتەلدىك مامانداردىڭ دا نازارىنا ءىلىنىپ وتىر. ەلوردامىز استانا قالاسىندا دۇنيەجۇزىلىك پوشتا وداعىنىڭ (دپو) العاشقى «سيفرلىق تەحنولوگيالارعا كوشۋ جانە ەۋروپا مەن ورتا ازيا ەلدەرىندە پوشتا قىزمەتتەرىن ءارتاراپتاندىرۋ» سەمينارى ءوتتى.

دۇنيەجۇزىلىك ۇيىم ۇيىمداستىرعان سەميناردىڭ كوزدەگەنى نە بولدى؟ قازىرگى ءتورتىنشى يندۋستريالدىق ريەۆوليۋسيا بۇرىنعىدان ەرەكشە. ول ناقتى، سيفرلىق جانە بيولوگيالىق الەمدەردى بايلانىستىراتىن، بارلىق رەتتەۋشى شارالارعا، ەكونوميكا مەن ونەركاسىپكە اسەر ەتەتىن تەحنولوگيالارمەن سيپاتتالادى.

وسى ماقساتتا دامۋشى جانە دامىعان ەلدەردىڭ اراسىنداعى ءبىرقاتار سالالاردا تاجىريبە الماسۋ، مامانداردىڭ پىكىرلەرىن ءبىلۋ ماڭىزدى. سول سەبەپتى ۇيىمداستىرىلعان سەمينار الەمدىك پوشتا سالاسىن ودان ءارى دامىتۋ مەن دامۋ باعىتىن انىقتاۋعا ارنالعان بولاتىن.

سەميناردىڭ العاشقى كۇنىندە سيفرلىق ەكونوميكانى دامىتۋدىڭ ۇزاق مەرزىمدى جوسپارى تالقىلانىپ، مامانداردىڭ پىكىرلەرى ورتاعا سالىندى. جيىندا العاشقى بولىپ «قازپوشتا» اق بيزنەس بيزنەس جوندەگى باسقارۋشى ديرەكتورى - باسقارما مۇشەسى ازات ەركىن ۇلى ماشابايەۆ ءسوز باستاپ، ەلىمىزدەگى سيفرلاندىرۋ جايىنا شولۋ جاسادى.

ونىڭ ايتۋىنشا ەلەكتروندى ساۋدانىڭ الەم ەكونوميكاسىندا ورنى ارتىپ كەلەدى. كوش باسىندا بولۋ ءۇشىن الەمدىك تالاپتاردان اسىپ جۇمىس جاساۋ قاجەت.

«قازاقستان رەسپۋبليكاسى دۇنيەجۇزىلىك پوشتا وداعىنداعى سيفرلاندىرۋعا اسا ءمان بەرىپ وتىرعان ءارى ونى جۇزەگە اسىرىپ وتىرعان مەملەكەتتەردىڭ ءبىرى. بارشامىز كورىپ وتىرعانداي ءقازىر ساۋدانىڭ كوپشىلىگى ينتەرنەت ارقىلى جۇزەگە اسىرىلادى. مۇنداي مۇمكىندىكتەر الدا تۇرعاندا پوشتانىڭ ودان ءارى داميتىنى ءسوزسىز. ەلەكتروندى داعدىلاردى مەڭگەرىپ، بۇگىنگى كۇنگى كوپ مۇمكىندىكتەرگە يە بولۋداعى نەگىزگى سەبەپ ەلىمىزدە قابىلدانعان «سيفرلىق قازاقستان» مەملەكەتتىك باعدارلاماسى. باعدارلاما 2018-2022 جىلدار ارالىعىندا جۇزەگە اسىرىلىپ، قويىلعان ماقساتتارعا جەتۋ بويىنشا جۇمىستار اتقارىلىپ جاتىر. باعدارلاما تولىقتاي ەلدە ءومىر ءسۇرىپ جاتقان ءاربىر قازاقستاندىقتىڭ ءومىر ءسۇرۋ دەڭگەيىن جاقسارتۋعا باعىتتالعان. بۇل باعىتتا قازپوشتانىڭ دا ىقپالى اسەر ەتۋدە دەپ ايتساق قاتەلەسپەيتىنىمىز انىق. الەم ءسات سايىن تاڭعالارلىق جاڭالىقتارمەن رەڭىن وزگەرتۋدە. قازىردە ەلىمىزدە ەلەكتروندىق كوممەرسيا نارىعى ەكى ەسەگە ارتىپ وتىر. ءبىزدىڭ كومپانيادا 2014 جىلدان باستاپ ترانسفورماسيالاۋ باعدارلاماسى ىسكە اسىرىلىپ كەلەدى، سوعان سايكەس كومپانيا قىزمەتىنىڭ بارلىق پروسەسستەرىن وزگەرتۋ جوسپارلانعان»، – دەدى ازات ەركىن ۇلى.

سونداي-اق، سەمينار بارىسىندا سيفرلىق تەحنولوگيالارعا كوشۋ جانە پوشتا قىزمەتتەرىن انىقتاۋ جايىن دپو ەۋروپا مەن ورتالىق ازيا بويىنشا ايماقتىق جوباسىنىڭ ۇيلەستىرۋشىسى جانە ساراپشىسى يۋريي سپەرييەۆ بايانداماسىندا كورسەتىپ ءوتتى.

«دۇنيەجۇزىلىك پوشتا وداعىنىڭ العا قويعان ماقساتىن ستامبۇلدا وتكەن كونگرەسستە قابىلدانعان قۇجاتتار ايقىندايدى. 2016 جىلى بولعان كونگرەسس بىزگە پوشتا جونەلتىلىمدەرىن ءبىرىڭعاي پوشتالىق كەڭىستىكتە ەركىن دامىتۋعا كەپىلدىك بەرەتىن تەلەكوممۋنيكاسيالارمەن بايلانىس ورناتۋ ءۇشىن ەلەكتروندى پوشتاعا نەگىزدەلگەن تاسىلدەردى انىقتاۋعا كومەكتەستى. سونداي-اق مۇددەلى ەلدەردىڭ ىنتىماقتاستىعىن ناسيحاتتايتىن زاماناۋي تەحنولوگيالاردى، ءبىرىڭعاي ستاندارتتاردى قابىلداۋدى دامىتۋعا ىقپال ەتەدى. پوشتا قىزمەتتەرى بۇل مىندەتتى ءبىزدىڭ سيفرلىق داۋىردە جۇزەگە اسىرۋعا مۇمكىندىك بەرەدى»، – دەدى دۇنيەجۇزىلىك پوشتا ۇيىمىنىڭ ساراپشىسى.

بۇل ىنتىماقتاستىق جوباسىنىڭ باستى ماقساتى – قاتىسۋشىلارعا جانە ولاردىڭ وپەراتورلارىنا ءوز بيزنەسىن ترانسفورماسيالاۋ ءۇشىن بازالىق جانە ءبىلىمدى داعدىلارعا قاتىستى پراكتيكالىق بىلىمدەردى دايىنداۋعا جانە جاساۋعا كومەكتەسۋ. پوشتا وپەراتورلارىنا ۇلتتىق جانە ايماقتىق سيفرلىق ستراتەگياعا سايكەس سيفرلىق ەكونوميكاعا قاتىسۋ ءۇشىن ءوز مودەلدەرىن ازىرلەۋگە كومەكتەسۋ دە كىرەدى. دۇنيەجۇزىلىك پوشتا وداعى جۇرگىزەتىن ترەنينگتەرى مەن سەمينارلارى قىسقا كونسۋلتاسيالىق ميسسيالارعا نەگىزدەلىپ، ەلدەگى ءقاۋىپسىز ورتانى دامىتۋعا باعىتتالعان.

«سونداي-اق، جوبا پوشتا وپەراتورلارىنىڭ بارلىق سيفرلىق ەكونوميكاداعى مەملەكەتتىك بيزنەس تۇتىنۋشىلارىنىڭ قاجەتتىلىكتەرىنە جاۋاپ بەرە الاتىندىعىن قامتاماسىز ەتەدى. اتاپ ايتقاندا، بارلىق وڭىرلەر بويىنشا پوشتانىڭ ينكليۋزيۆتى قىزمەتتەردە اتقاراتىن ءرولىنىڭ ماڭىزدىلىعىن ەرەكشە اتاپ ءوتۋ كەرەك» – دەيدى ەكسپەرت.

اتالمىش دوڭگەلەك ۇستەل بارىسىندا «قازپوشتا» اق-نىڭ سيفرلىق قىزمەتتەرى نازارعا ۇسىنىلدى. وندا جالپى ەلىمىزدەگى قازپوشتانىڭ اتقارىپ وتىرعان ناتيجەلى ىستەرى تانىستىرىلدى. اتاپ ايتساق وسى كۇنگە دەيىن «قازپوشتا» اق ارقىلى 223 ملن. گازەتتەر مەن حاتتار، پوشتا جونەلتىلىمدەرى مەن شوتتار جىبەرىلىپ، 90،1 ملن. قىزمەتتەر كورسەتىلىپ، 486 442 تولەم كارتالارى شىعارىلعان ەكەن. مۇنان وزگە قازپوشتا ەلىمىزدىڭ بارلىق ايماقتارىن 100 پايىزدىق كورسەتكىشپەن، ياعني 3،5 مىڭنان استام پوشتا بولىمشەلەرىمەن، 22 749 قىزمەتكەرمەن قامتىپ وتىر. ەل ايماقتارىندا ەڭ جاڭا تەحنولوگيالارمەن جابدىقتالعان 5 سيفرلىق كەڭسەلەر ناتيجەلى جۇمىستار اتقارۋدا.

ەلىمىزدەگى «قازپوشتا» اق-نىڭ باستى مىندەتى تۇتىنۋشىلارعا پوشتا، لوگيستيكا، قارجىلىق جانە اگەنتتىك قىزمەتتەردى جىلدام جانە سەنىمدى الۋعا مۇمكىندىك بەرەتىن ءتيىمدى ەكوجۇيە نەگىزىندە زاماناۋي سيفرلىق قوعامنىڭ دامۋىنا سەرپىن بەرۋ بولىپ تابىلادى.

جيىن بارىسىندا دۇنيەجۇزىلىك پوشتا وداعى قۇرامىنداعى ەلدەردەن كەلگەن قاتىسۋشى ماماندار تىلشىلەرگە ءوز پىكىرلەرىن بىلدىرگەن بولاتىن.

«بۇگىنگى تاڭدا الەمدىك ەكونوميكانىڭ وزىندىك دامۋ ءۇردىسى بار. قازىردە الەمدىك ەكونوميكا سيفرلىق تەحنولوگيا نەگىزىندە داميدى. قازاقستان تمد ەلدەرىنەن وسى باعىتتا دامۋدا كوشباسشى ەكەندىگىن ەسكەرە وتىرىپ،  قازاقستاندا دپو-نىڭ تاراپىنان العاشقى سەمينار وتكىزىلۋدە. ءبىز بارشامىز قازاقستاندى وداققا مۇشە ەل رەتىندە تانىپ، ونداعى پوشتا سالاسىنىڭ قانداي قارقىنمەن دامىپ وتىرعانىن بىلەمىز. بايقاعانىمىزداي ەلدە كۇننەن كۇنگە پوشتانىڭ بەدەلى ارتىپ، كەرەمەت ىستەر اتقارىلىپ وتىر. بۇل دەگەنىمىز تمد ەلدەرى پوشتالارى ءۇشىن دە پايدالى ءۇردىس، جاقسى تاجىريبە دەپ ايتا الامىن. ءتىپتى ەلدەگى پوشتا قىزمەتى بانك سالاسىنىڭ كەي قىزمەتتەرىن اتقارادى. اسىرەسە قازپوشتا قارجىلىق قىزمەتتەردى دامىتۋ بولىگىندە وزىق تا كرەاتيۆتى شەشىمدەرىمەن ۇزدىكتەر قاتارىندا. الداعى ۋاقىتتا ءالى دە اۋىز تولتىرارلىق جاڭالىقتارىمەن بولىسەتىنىنە سەنەمىن. ەلدىڭ بولاشاعىن وسىرەتىن قازاقستان جاستارىنا ساتتىلىك تىلەيمىن»، – دەپ ءوز ويىمەن ءبولىستى ازەربايجان رەسپۋبليكاسىنىڭ كولىك، كوممۋنيكاسيالار جانە جوعارى تەحنولوگيالار مينيسترلىگى پوشتا سەكتورىنىڭ باسشىسى ناۆرۋز مامەدوۆ.

وتكىزىلگەن سەمينار ارقاسىندا قازاقستاننىڭ پوشتا سالاسىنداعى جەتىستىكتەرى مەن قولدانىلىپ وتىرعان تەحنولوگيالارى شەتەلدىك ساراپشىلاردىڭ كوڭىلدەرىنەن شىعىپ، جوعارى باعالاندى. شىندىعىندا تاجىريبە الماسۋ ارقىلى سيفرلىق تەحنولوگيالاردىڭ مۇمكىندىگىن، دارەجەسىن كورسەتىپ، باسقا دا شەت مەملەكەتتەردىڭ سيفرلىق داعدىسىمەن تانىسىپ، جەتىستىكتەرىن بەيىمدەپ قولدانۋعا بولاتىنىن انىق كورسەتتى.