ۇلتتىق كىتاپحانادا اسەت بەيسەۋوۆتىڭ 80 جىل­دىق مەرەيتويىنا  وراي  «جۇرەگى ءان دەپ سوعاتىن» اتتى كىتاپتىڭ تۇساۋكەسەر ءراسىمى ءوتتى. اسەم انمەن ارلەنگەن ىزگى شاراعا ەسىمى ەلىمىزگە بەلگىلى مادەنيەت جانە ونەر قايراتكەرلەرى، اقىننىڭ تۋعان-تۋىستارى مەن ونەرسۇيەر قاۋىم قاتىستى. تاعىلىمعا تولى شارانى قازاقستاننىڭ ەڭبەك سىڭىرگەن قايراتكەرى، «الماتى اقشامى» گازەتىنىڭ باس رەداكتورى قالي سارسەنباي جۇرگىزدى.

قارىمدى قالامگەر تۇرسىنبەك ەشەن­قۇلوۆ قۇراستىرىپ، دايىنداعان  «جۇرەگى ءان دەپ سوعا­تىن»  كىتابى كومپوزيتور، قازاق­ستاننىڭ حالىق ءارتىسى، ليريكالىق اندەرىمەن ءار ادامنىڭ جۇرەگىنە سازدى اۋەننىڭ تۇنىق بۇلاعى بولىپ قۇيىلعان اسەت بەيسەۋوۆ تۋرالى. كىتاپتا ءا.بەيسەۋوۆتىڭ زامانداس­تارى، اعا-ىنىلەرى، اپكە-قارىنداس­تارىنىڭ ەستەلىكتەرى، قازاق راديوسى­نىڭ «التىن قورىندا» ساقتالعان اندەرىنىڭ ءتىزىمى توپتاس­تى­رىلعان. كومپوزيتورعا ارنالعان كىتاپ «اRNA-B» باسپاسىنان جارىققا شىققان. 

ىزگى شارانى جۇرگىزگەن قالي سارسەنباي كىتاپتىڭ قۇندىلىعى مەن ەرەكشەلىگىنە توقتالىپ ءوتتى.

– وقىرمانعا جول تارتقان بۇل كىتاپ الماتى قالاسى­نىڭ اكىمى باۋىرجان بايبەكتىڭ تىكەلەي تاپسىرماسىمەن، مادەنيەت باسقارماسىنىڭ قولداۋىمەن جارىققا شىقتى. كىتاپتى قۇراستىرعان، اسەت بەيسەۋوۆپەن بىرگە عۇمىر كەشكەن، جاستىق شاعىن بىرگە وتكىزگەن قازاقتىڭ قارىمدى قالامگەرى تۇرسىنبەك ەشەنقۇلوۆقا العىس ايتامىز. دوستىڭ دا دوسى بار. «ءبىر دوس بار قيا بەتكەيگە دەيىن، ءبىر دوس بار قيامەتكە دەيىن» دەيدى قازاقتا. حالقىمىزدا تالانتتى ادامدار از ەمەس. اسەت بەيسەۋوۆتىڭ اندەرى، ارينە، ۇمىتىل­مايدى، حالىق ايتادى، قازاق امان بولسا، جاساي بەرەدى. الايدا، تالانتتى تۇلعانىڭ ومىردە ءبىر جوقتاۋشىسى بولۋى كەرەك. وسى ورايدا، تۇرسىنبەك ەشەنقۇلوۆتىڭ تىرنەكتەپ ءجۇرىپ، ىرگەلى ءىس تىندىرعانىن اتاپ وتكەنىمىز ابزال. اسەت بەيسەۋوۆتىڭ ءار ءانىنىڭ ءوزى ءبىر سپەكتاكل دەۋگە بولادى. ءان­دەرىنىڭ بارلىعى تاڭدامالى. بۇل كىتاپتا اسەت بەيسەۋوۆتىڭ ءبولمىس-بىتىمى، بەينەسى سومدالعان، ادامگەرشىلىك اسىل قاسيەتتەرى ايتىلعان. كىتاپتا اسەت بەيسەۋوۆتىڭ قازاق راديو­سىنىڭ «التىن قورىندا» ساقتالعان 320-دان استام اندەرىنىڭ ءتىزىمى بەرىلگەن. بۇل وتە قۇندى مالىمەت بولىپ تابىلادى. بۇل كىتاپتىڭ قۇندىلىعى مەن ەرەكشەلىگى ەكەنى ءسوزسىز، – دەدى  قالي سارسەنباي.

ىزگى شارادا ءسوز العان مادەنيەت جانە ونەر قايرات­كەرلەرى اسەت بەيسەۋوۆتىڭ قازاق ونەرىن وركەندەتۋدەگى ورنىن، كىتاپتىڭ رۋحاني ماڭىزدىلىعىن ايرىقشا اتاپ ءوتتى.