ەلباسىنىڭ «بولاشاققا  باعدار: رۋحاني جاڭعىرۋ» باعدارلامالىق ماقالاسى اياسىندا «تەڭىزشيەۆرويل» بىرلەسكەن كومپانياسىنىڭ شيرەك عاسىرلىق مەرەيتويىنا ارنالعان فوتوكورمە جاساقتالدى. 

فوتوكورمە وبلىستىق ش.سارييەۆ اتىنداعى كوركەمسۋرەت جانە قولدانبالى-ساندىك ونەر مۋزەيىندە اشىلدى. وعان تەڭىز كەنىشىن العاش اشۋشىلار، سالا ارداگەرلەرى، كاسىپورىن قىزمەتكەرلەرى، زيالى قاۋىم وكىلدەرى قاتىستى. ماقسات – سەرىكتەستىكتىڭ تىنىس-تىرشىلىگىنەن سىر شەرتۋ. وسىعان دەيىنگى جانە قازىرگى اتقارىلىپ جاتقان جۇمىستاردى حالىق اراسىندا ناسيحاتتاۋ.

الدىمەن «قارا التىن» يگىلىگىن ءدۇيىم ەلگە جەتكىزگەن كاسىپورىن تۋرالى دەرەكتى فيلم كورسەتىلدى. وندا «تەڭىزشيەۆرويلدىڭ» قىزىق پەن قيىندىققا تولى سارا جولى ادەمى كورىنىس تاپقان. ال، فوتوكورمەنىڭ شىمىلدىعىن كاسىپورىننىڭ باس ديرەكتورى تەد ەچيسون قۇتتىقتاۋ سوزىمەن اشتى.

– ءبىز 1993 جىلدان بەرى بىلىكتى مامانداردىڭ ارقاسىندا جەمىستى ەڭبەك پەن تولايىم تابىستارعا قول جەتكىزىپ كەلەمىز. جەتىستىكتىڭ نەگىزگى سىرى وسىندا دەپ ويلايمىن. ەگەر ادام ءوز جۇمىسىن شىنايى سۇيىسپەنشىلىكپەن جاساماسا، ودان ەشتەڭە شىقپايدى. مىنە، اينالاسىنا كاسىبي شەبەرلەر شوعىرلانعان «تەڭىزشيەۆرويل» بۇگىن بۇكىل الەم كوز تىككەن الىپ كومپانياعا اينالىپ وتىر، – دەدى ول.

وسىدان كەيىن اتالعان مەكەمەنىڭ ۇكىمەتپەن جانە جۇرتشىلىقپەن بايلانىس جونىندەگى باس مەنەدجەرى رزابەك ارتىعالييەۆ پەن مۋزەي باسشىسى تولەگەن ورىنباسار ۇلى كورمە جۇمىسىنا ساتتىلىك تىلەدى. قابىرعاعا ىلىنگەن ءار سۋرەت كومپانيانىڭ ءتۇرلى كەزەڭىن قامتيدى. سونداي-اق، «كەلەشەك كەڭەيۋ» جوباسى دا بەينەلەنگەن. بارلىعى – 36 سۋرەت.

جينالعاندارعا ءوندىرىسى وركەندەپ، كوكجيەگى كەڭەيىپ، مۇناي-گاز نارىعىندا ناعىز كوشباسشىعا اينالعان كومپانيانىڭ كەشەدەن بۇگىنگە دەيىن اتقارعان جۇمىستارى ەگجەي-تەگجەيلى باياندالعان كىتاپ جيناعى ۇلەستىرىلدى. وندا ءار جىلدىڭ وزىنە ءتان ەرەكشەلىگى  تالدانىپ، سارالانىپ جازىلعان.