«اقتوبە» ساتىلادى. باستاپقى قۇنى 100 ملن تەڭگە. ويىنشىلارىنىڭ الدىندا قارىزعا بەلشەسىنەن باتقان فۋتبول كلۋبىن جەرگىلىكتى بيلىك وسىلايشا  تەندەرگە شىعارىپ وتىر. «ەگەر ەشكىم قىزىعۋشىلىق تانىتپاسا،  ەل چەمپيوناتىنىڭ بەس دۇركىن جەڭىمپازى  كوز الدىمىزدا  بانكروت بولىپ، قۇردىمعا كەتۋى عاجاپ ەمەس دەپ مىڭداعان جانكۇيەر الاڭداۋلى.  اقتوبەنىڭ فۋتبولىن شاتقاياقتاتقان كىمدەر؟  ەڭسەسىن ەندى تىكتەپ كەلە جاتقان كلۋبتىڭ توپجارۋىنا نە كەدەرگى؟ بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنا سىلتەمە جاساي وتىرىپ حابارلايدى.
 
«اقتوبەنىڭ» ساتىلاتىنى تۋرالى رەسمي اقپارات قارجى مينيسترلىگىنىڭ سايتىنا شىققالى جانكۇيەرلەردە مازا جوق. ونسىز دا ماسەلەسى كۇن تارتىبىنەن تۇسپەي تۇرعان كلۋبتى سەنىمگەرلىك باسقارۋعا بەرسە، بولاشاعى نە بولماق دەگەن ساۋال سان ادامنىڭ كوكەيىندە تۇر. سولاردىڭ ءبىرى - بەرەكەت شايماعامبەتوۆ. جاس جىگىت جانكۇيەرلەردىڭ «13 سەكتور» توبىنىڭ بەلدى مۇشەسى. 

«قوجايىننىڭ تابىلۋ-تابىلماۋىن ۋاقىت كورسەتە جاتار. ءبىراق، مەنىڭ ويىمشا، وعان سەنىم از. ەگەر العان جاعدايدا ول جاقسى بولادى. ويتكەنى، ءبىر قالتادان شىعادى دا ونىڭ بارلىعى. سۇراۋى بولادى. جەكەمەنشىك بىرەۋ ساتىپ الاتىن بولسا، اشىقتىق پايدا بولادى. بيۋدجەتتەن بولىنگەن اقشا قالاي جۇمسالىپ جاتىر، قايدا كەتىپ جاتىر دەگەندەي» - دەيدى جانكۇيەر بەرەكەت شايماعامبەتوۆ.

شەنەۋنىكتەر جانكۇيەرلەردىڭ الاڭداۋىنا نەگىز جوق دەپ سابىرعا شاقىرعانىمەن، كلۋبقا ەشكىم قىزىعۋشىلىق تانىتپاسا، بانكروت بولا ما، بولماي ما ول تۋرالى ناقتى ەشتەڭە دەمەدى. ەڭ باستىسى، كلۋبتى سەنىمگەرلىك باسقارۋعا بەرۋ تۋرالى ۇسىنىسقا وبلىس اكىمى بەردىبەك ساپاربايەۆتىڭ ەش قاتىسى جوق ەكەنىن ەسكەرتەمىز دەۋمەن بولدى. 

«جەلىدە بىزدە قاپتاپ شىعىپ جاتقان  وبلىس اكىمىنىڭ تاراپىنان وسىنداي -وسىنداي بولۋ  كەرەك، سول كىسىنىڭ شەشىمى دەگەن لاقاپ  اقپاراتتىڭ  ءبارى دۇرىس ەمەس.  بۇل جەردەگى  جەكەشەلەندىرۋدىڭ ءبارى ۇكىمەتتىڭ  شەشىمىمەن جاسالىپ، ەرەجەگە قوسىلىپ، ءبىز سول ۇكىمەتتىڭ تاپسىرماسىن ورىنداۋ ءۇشىن جاسالىپ جاتقان شارۋالار» - دەيدى وبلىستىق قارجى باسقارماسىنىڭ باسشىسى گۇلناز سيسەنوۆا.  

ەندى تالاپتارعا كەلسەك. جاڭا قوجايىن 7 جىلدان كەيىن عانا  كلۋبتى تولىقتاي ءوز باسقارۋىنا الا الادى. ودان بولەك تەندەر شارتتارىنىڭ ءبىرى -  جاڭا قوجايىن اقتوبە قالاسى مەن اۋداندارداعى بالالار فۋتبولىن دامىتۋى دا قاجەت. ەڭ باستىسى - سەنىمگەرلىك باسقارۋ مەرزىمىندە باسقارۋشىنى تاعايىنداۋ مەن ورنىنان بوساتۋ اقتوبە وبلىسىنىڭ قارجى باسقارماسىمەن اقىلداسا ىسكە اسۋى ءتيىس. قازىرگى تاڭدا قوردالانىپ قالعان قارىزىنا قاراپ، كلۋبقا «قۇدا تۇسەتىندەر» بولار ما ەكەن دەگەن سۇراق تۋىندايدى. ال كلۋبتىڭ ەكس-ديرەكتورى، باسى داۋعا قالعان  دميتريي ۆاسيليەۆ بولسا، كەز كەلگەن ادامنىڭ تەندەرلىك بايقاۋعا قاتىسىپ، وپ-وڭاي جەڭىمپاز اتاناتىنىنا كۇمانمەن قاراپ وتىر.

«مەن زاڭگەر رەتىندە كلۋبتى سەنىمگەرلىك باسقارۋعا بەرۋ كۇماندىلەۋ دەپ سانايمىن. ءارى زاڭسىز. نەگە؟ ويتكەنى،  زاڭعا سايكەس، جەكەشەلەندىرۋدىڭ ەكى جولى بار - ساۋدالاۋ، ءيا، بولماسا تىكەلەي ساتۋ. 94-باپتىڭ ەكىنشى تارماعىندا مەملەكەتتىك مۇلىكتى ساتۋعا تىكەلەي الىپ كەلمەيتىن، ءبىراق  ونىڭ كەيىننەن ساتىلۋىن كوزدەيتىن ىس-ارەكەتتەر  جەكەشەلەندىرۋدىڭ  تۇرلەرى رەتىندە ەمەس، ونىڭ الدىن الا جۇرگىزىلەتىن ساتىلارى رەتىندە قاراستىرىلادى دەلىنگەن» - دەيدى «اقتوبە» فك-نىڭ بۇرىنعى ديرەكتورى دميتريي ۆاسيليەۆ.

ءقازىر كلۋبقا كىمدەر قىزىعۋشىلىق تانىتىپ وتىرعانى  جۇمباق. ەڭ باستىسى، ۇمىتكەرلەر العاشقى جارنا رەتىندە 15 ملن تەڭگە تولەۋى ءتيىس. تەندەر قورىتىندىسى 9-قازاندا بەلگىلى بولادى. 

اقتوبەنىڭ ساپىندا بولىپ، وسى الاڭدا دوپ تەپكەن 5 ويىنشىعا 213 ملن تەڭگە جالاقىنى ارتىق تولەدىك دەگەن قارجى باسقارماسى ولاردىڭ ۇستىنەن سوتقا شاعىمدانعان بولاتىن. الايدا، نەگە ەكەنى بەلگىسىز سوڭعى ساتتە تالاپ ارىزدى قايتىپ الىپتى.
«تالاپ ارىزدار قايتىپ الىندى. سەبەبى، ءقازىر ايتىپ تۇرمىن عوي،  كەلىسسوزدەر جۇرگىزىلەدى ءاربىر سپورتشىمەن جانە دە قازاقستان فۋتبول فەدەراسياسىمەن كەلىسسوزدەر جۇرگىزىلىپ، وڭ شەشىمىن تابادى» - دەيدى وبلىستىق دەنە شىنىقتىرۋ جانە سپورت باسقارماسىنىڭ باسشىسى مەيرامبەك ماحامبەتوۆ.
وسىلايشا، وبلىس سپورتىنا جاۋاپتى ماماندار كلۋبتىڭ قارىزى بويىنشا ماسەلەنى شەشىپ جاتىرمىز دەپ سەندىردى. ال 2018 جىلعا بىردە-بىر بەرەشەگى جوق ەكەن. بۇعان دەيىن جينالىپ قالعان قارىزداردىڭ ءبارى  سول كەزدە زاڭناماعا ساي جاسالماعان ارەكەتتەردىڭ كەسىرى دەپ وتىر. ال ونىڭ سۇراۋى كىمنەن بولماق، ول ساۋال سول كۇيى باسى اشىق قالدى.