اتالى ءسوز ايتپاساڭ، دانالىعىڭ قادىرسىز. باتالى ءسوز ايتپاساڭ، دارالىعىڭ قادىرسىز.   مەيىرلەنىپ ايتپاساڭ، اكەلىگىڭ قادىرسىز. پەيىلدەنىپ ايتپاساڭ، جاكەلىگىڭ قادىرسىز.   ەمىرەنتىپ ايتپاساڭ، ەنەلىگىڭ قادىرسىز. ەلجىرەتىپ ايتپاساڭ، تورەلىگىڭ قادىرسىز.   ءسۇيىندىرىپ ايتپاساڭ، شەشەندىگىڭ قادىرسىز. كۇيىندىرىپ ايتپاساڭ، كوسەمدىگىڭ قادىرسىز.   بادىرايتىپ ايتپاساڭ باتىرلىعىڭ قادىرسىز. اقيقاتىن ايتپاساڭ، اقىندىعىڭ قادىرسىز.   دالەلىمەن ايتپاساڭ، عالىمدىعىڭ قادىرسىز. مانەرىمەن ايتپاساڭ، حانىمدىعىڭ قادىرسىز.   بىلدىر - بىلدىر ايتپاساڭ، بالالىعىڭ قادىرسىز. قىزىعىنا باتپاساڭ، انالىعىڭ قادىرسىز.   ادىلدىگىن ايتپاساڭ، ادالدىعىڭ قادىرسىز. ار - ۇياتتان اتتاساڭ، ادامدىعىڭ قادىرسىز.    

  بىردە انانى ماقتايسىڭ، بىردە تۇرىپ داتتايسىڭ، بال تامىزىپ تىلىڭنەن، ىشىڭە ۋ ساقتايسىڭ.   بىردە كۇلىپ الدايسىڭ، بىردە جىلاپ قارعايسىڭ، الجاستىرىپ ادامدى، ابجىلانداي اربايسىڭ.   بىردە سايراپ شىندىقتى، بىردە سايلاپ سۇمدىقتى، قۋ تۇلكىدەي قۇبىلىپ، قايدان تاپتىڭ قۋلىقتى ؟   بىردە اناۋمەن شابىسىپ، بىردە تاتۋ تابىسىپ، كۇنىڭ ءوتىپ كەلەدى-اۋ، عۇمىر بويى الىسىپ.   ەكى كوزىڭ الاقتاپ، ەكى ەزۋىڭ جالاقتاپ، جەر تۇبىنەن جەتەسىڭ، جەمتىك كورسەڭ دالاقتاپ.   كورە قالساڭ قاراسىن، سالىپ ۇرىپ باراسىڭ، ديۋدى دا دۇعالاپ، ءناپاقاڭدى الاسىڭ.   سايقالدى دا الدايسىڭ، سايتاندى دا اربايسىڭ، قۇنىقتىرعان قۋ ءناپسى، بۇيتەبەرسەڭ  تۇبىندە، وڭبايسىڭ-اۋ،  وڭبايسىڭ !    

  قاپەرگە الىپ ساسپاعان، قايىرلى قادام باسپاعان، انانى كوردىك تاسباۋىر، قاعىنان جەرىپ تاستاعان.   قىرشاڭقى مالداي قاشاعان، قىلىعىن تاۋىپ تاسادان، اكەنى كوردىك وپاسىز، وتباسىن ويران جاساعان.   بەرەسىڭ قالاي باعاسىن، توزدىرىپ تۋعان اناسىن، بالانى كوردىك شيكىوكپە، اكەنىڭ العان جاعاسىن.   زامانا قالاي الجاسقان، جاماندىق قايدان جارماسقان ؟ اتانى كوردىك ار كەتىپ، كەلنىمەن كۇندە سالعاسقان.   قىرعيداي ءتيىپ قىرقىسقان، قىرمىزى بەتتى جىرتىسقان، ەنەنى كوردىك كەرتاقىس، تارامىستايىن تىرتىسقان.   اڭدىسىپ ىشتەي ارباسقان، انت سۋ ءىشىپ الداسقان، پەندەنى كوردىك تۇراقسىز، ادالدىق ارىن شاڭ باسقان.   كولگىرسىپ كوزگە ماقتاعان، كوپىرمە سوزبەن وتتاعان! دوستىدا كوردىك ەكىجۇز، ەسەبىن ىشكە ساقتاعان.   اس بەرسە قۇيىپ پەيىلسىز، ىسىڭە كەلسە بەيىمسىز، تۋعاندى كوردىك تۋىسقا، تۋباستان تۋعان مەيىرسىز.   بارىندە كورگەن مىنا باس، بىرەگە مۇمكۇن ۇناماس. سىزدەرگە قايدام، ماعان شىن. ايتپاسام ارىم شىداماس!    

  جەرىڭدى قورعاماساڭ نامىس. ەرىڭدى قولداماساڭ نامىس. جان الىپ - جان بەرىسكەن جاعالاستا، جاۋىڭدى قورعالاساڭ نامىس.   وتاندى سۇيمەگەنىڭ نامىس. وتانعا كۇيمەگەنىڭ نامىس. ازعىنداپ اقىلىڭنان اقىماعىم، رۋحىڭنان كۇيرەگەنىڭ نامىس.   ءتىلىڭدى بىلمەگەنىڭ نامىس. دىنىڭمەن جۇرمەگەنىڭ نامىس. ۇلقتار ۇلى بولساڭ، ۇلتىڭدى كوزىڭە ىلمەگەنىڭ نامىس.   ەلىڭە ەرمەگەنىڭ نامىس. پەيىلىڭدى بەرمەگەنىڭ نامىس. تورعايداي توز -توز بولىپ ۇياسى جوق، وتانعا  كەلمەگەنىڭ نامىس    

  بەرەرىم بەرىپ حالىققا، تاڭبامدى باسىپ تاريحقا، جەم بولىپ كەتسەم ارمان جوق، تەڭىزگە باتىپ بالىققا.   ەسەمدى قوسىپ ەلىمە، ەڭبەگىم ءسىڭىپ جەرىمە، كىرىپتە كەتسەم ارمان جوق، قاراڭعى قاپاس كورىمە.     ايتارىمدى ايتىپ قازاققا، اينالىپ ءىرى عاجاپقا، ءتۇسىپ تە كەتسەم ارمان جوق، اقىرەت كۇنى توزاققا.   مايداندا بەرىك نىق تۇرىپ، نايىنساپتاردى ىقتىرىپ، ادالدىعىمدى ارمان جوق، جۇرتىما كەتسەم ۇقتىرىپ.

ش. قالي ۇلى 02.04.2015