قىزىلوردادا جاعا ۇستاتارلىق جاعداي. قالاداعى №43 قازاق ورتا مەكتەبىنىڭ دەنە شىنىقتىرۋ ءپانى ءمۇعالىمى 2012-جىلدان بەرى وقۋشى قىزدارعا قىرعيداي ءتيىپ، انايى ارەكەتتەر جاساپ كەلىپتى.

مۇنى پروكۋرورلار ايتىپ وتىر. ەڭ سوراقىسى، 7-سىنىپتا وقيتىن قىزدار بىرنەشە جىل بويى قورقىنىشتىڭ قۇشاعىندا ءومىر ءسۇرىپ كەلگەن. ال ءمۇعالىمنىڭ جىمىسقى ارەكەتى جۋىردا عانا اشكەرە بولدى. ءقازىر ونىڭ ۇستىنەن قىلمىستىق كودەكستىڭ “جاس بالالاردى ازعىنداۋ” فاكتىسى بويىنشا ءىس قوزعالىپ، ول سوتتا قارالىپ جاتىر.

اتا-انالاردىڭ شاعىمىنا ساي قاماۋعا الىنعان ءمۇعالىمنىڭ ماسەلەسى وبلىستىق كامەلەتكە تولماعاندار ءىسى جونىندەگى اۋدانارالىق سوتتا قارالىپ جاتىر. پروسەسس جابىق ەسىك جاعدايىندا ءوتىپ جاتقاندىقتان وعان قاتىسۋ مۇمكىن بولمادى. ال كۇدىكتىمەن جۇزبە-جۇز كەزدەسكەن اتا-انالار بولسا، سوتتان اشۋلى شىقتى.

“ءمۇعالىم بولىپ، ىشىنە كىرىپ الىپ، قىزداردىڭ ءومىرىن ويرانداعان. جالعىز مەنىڭ نەمەرەم ەمەس. جاۋىپ وتىر، قالتاسى قالىڭ، ءبىز كەدەيمىز، ءبىزدىڭ شامامىز كەلمەيدى، “سەندەر سوقىرسىڭدار” دەدى بىزگە ديرەكتور”، – دەيدى جابىرلەنۋشىنىڭ اجەسى.

ال مۇعالىمنەن ءجابىر كوردىك دەپ وتىرعان وقۋشى قىزدار بۇگىندە ۇرەيمەن ءومىر ءسۇرىپ جاتىر.

“شالبارىن شەشىپ ۇياتسىز شەتىن كورسەتە باستادى. ۇياتسىز شەتىن ۇستاپ تۇرىپ، وڭ قولىن ەسىكتەن شىعاردى دا، قولىڭدى بەر دەدى. مەن قورقىپ، ارتقا قاراي شەگىنگەن كەزدە. ايبول ەسىمدى جاڭادان كەلگەن ءمۇعالىم كىرىپ قالدى. ءولىمنىڭ ءوزى از شىعار وعان. سەبەبى ول بىرنەشە قىزدى سولاي قورلاعان”، – دەيدى جابىرلەنۋشى.

وقۋ جىلىنىڭ باسىندا بولعان بۇل وقيعانى 14 جاستاعى قىزدىڭ اناسى كەش ەستىگەن. وندادا اتالمىش مەكتەپتىڭ مۇعالىمدەرى باسشىلارىنىڭ ۇستىنەن قۇقىق قورعاۋ ورگاندارىنا شاعىم تۇسىرگەن كورىنەدى. سوندا قىزىنا جاساعان ايۋاندىق ارەكەت باياندالعان ەكەن. ءتارتىپ ساقشىلارىنىڭ اۋزىنان ەستىگەندە “جۇرەگىم سىزدادى”، – دەيدى گۇلزات.

ەندى “دەنە شىنىقتىرۋ ءپانىنىڭ ءمۇعالىمى عانا ەمەس، قىزىمنىڭ بولاشاعىنا بەيجاي قاراعاندار تۇگەل جازالانسىن”، – دەيدى ول.

ەگەر مۇعالىمدەر جازىپ، ەكى ميليسيا كەلمەسە، مەن بىلمەيمىن، قىزىمنىڭ الداعى ءومىرى نە بولاتىنىن دا

“ديرەكتور وسىندا وتىرا بەرەدى ما، سول ورىنعا لايىق پا؟ بۇل ءبىلىم وشاعى پەداگوگتار، مۇعالىمدەر، بىلمەيمىن ءبارى ءومىرىن ەشقانداي ويلاماعان. ماعان ەگەر مۇعالىمدەر جازىپ، ەكى ميليسيا كەلمەسە، مەن بىلمەيمىن، قىزىمنىڭ الداعى ءومىرى نە بولاتىنىن دا قۇداي بىلەدى. ادىلدىك قايدا، سوندا سەندەر مەنىڭ قىزىمدى جىلاتىپ قويدىڭدار، اناسىڭدار”، – دەيدى جابىرلەنۋشىنىڭ اناسى گۇلزات ءالجانوۆا.

اتالمىش مەكتەپتىڭ ديرەكتورى شۋ شىققان بويدا قىزمەتكەرىنىڭ ارىز جازىپ، جۇمىستان ءوز ەركىمەن كەتكەندىگىن ايتتى. ازىرگە قالالىق ءبىلىم ءبولىمى دە ءۇنسىز. ولار سوت ۇكىمى شىققاننان كەيىن عانا ءمان-جايدى تۇسىندىرمەك نيەتتە. تەك بىلەتىنىمىز، ءبىلىم ورداسىنىڭ باسشىسىنا قاتاڭ سوگىس جاريالاپ ۇلگەرىپتى. ال قىلمىستىق ءىستىڭ بارىسىمەن پروكۋرورلار ءبولىستى.

“№43 ورتا مەكتەپتىڭ دەنە تاربيەسىنىڭ ءمۇعالىمى 2012-2013 جىلدارى وسى مەكتەپتىڭ 7-سىنىپ وقۋشىسى، ياعني 14 جاسقا تولماعان ا.ش دەگەن ازاماتقا قاتىستى ينتەلەكتۋالدىق سيپاتتا جانە كۇش قولدانۋسىز ازعىندىق ارەكەتتەرىن جاساعان. سونىمەن قاتار بۇل دەنە تاربيەسى ءمۇعالىمى وسى ءىس ارەكەتتەرىن 2014 جىلى دا وسى مەكتەپتىڭ 7-سىنىپ وقۋشىسى ا.ءا-عا قاتىستى جاساعان دەرەكتەرى انىقتالدى”، – دەيدى قىزىلوردا وبلىستىق پروكۋراتۋراسىنىڭ باسقارما پروكۋرورى اسحات ءابليازوۆ.

ەندى بۇل ءىستىڭ سوڭعى نۇكتەسىن سوت قويادى. ال ءمۇعالىمنىڭ كىناسى دالەلدەنسە، كەم دەگەندە 7 جىلىن تۇرمەدە وتكىزىپ، 20 جىلعا دەيىن پەداگوگتىق قىزمەتىمەن قوش ايتىسۋى مۇمكىن. پروكۋراتۋرانىڭ مالىمەتىنشە، بۇل بيىلدىڭ ءۇش ايىندا تىركەلىپ وتىرعان ءتورتىنشى فاكتى، ال بىلتىر 11 ءجاسوسپىرىم وسىعان ۇقساس جايتتىڭ قۇربانى بولعان.