بۇگىن قازاقستان مۇسىلماندارى ءدىني باسقارماسىنىڭ ءتوراعاسى سەرىكباي قاجى وراز جامبىل وبلىسىنا 2 كۇندىك ىس-ساپارمەن باردى دەپ جازادى Qamshy.kz اقپارات اگەنتتىگى قمدب-نىڭ باسپا ءسوز قىزمەتىنە سىلتەمە جاساپ. 

باس ءمۇفتي باستاعان ءدىن قىزمەتكەرلەرى جامبىل وبلىسى اكىمىنىڭ مىندەتىن اتقارۋشى بەكبولات ورىنبەكوۆپەن كەزدەستى.
كەزدەسۋدە ءوڭىردىڭ قازىرگى ءدىني احۋالى، مەشىت-مەدرەسەلەردىڭ جۇمىسى ءسوز بولدى. بەكبولات سەرىكبەك ۇلى وبلىستا 295 مەشىت بار ەكەنىن، وندا 400-دەن استام يمام قىزمەت ەتىپ جاتقانىن جەتكىزدى. 

"قۇرمەتتى سەرىكباي قاجى ساتىبالدى ۇلى! كيەلى تاراز شاھارىنا قوش كەلدىڭىز. ءسىزدىڭ ساپارىڭىز قاسيەتتى اۋليەاتا ەلىنىڭ رۋحاني ومىرىنە رۋحاني سەرپىن بەرەدى دەپ سانايمىن. بۇگىندە وبلىس اكىمىنىڭ تاپسىرماسىمەن وڭىرىمىزدە ءدىني سالادا ىرگەلى جوبالار جۇزەگە اسىپ جاتىر. رەسپۋبليكاعا تانىمال تەولوگ-عالىمداردى ارنايى شاقىرتىپ، ءدىني ساۋاتتى ارتتىرۋ باعىتىندا سەمينار ۇيىمداستىرىپ كەلەمىز. ءدىن قىزمەتكەرلەرىنىڭ دە الەۋمەتتىك جاعدايىنا كوڭىل ءبولىپ كەلەمىز"، - دەدى وبلىس اكىمىنىڭ مىندەتىن اتقارۋشى بەكبولات ورىنبەكوۆ.

ءوز كەزەگىندە باس ءمۇفتي سەرىكباي قاجى وراز يمامداردى ەلەكتروندى اتتەستاسيادان وتكىزۋ جاڭا جۇمىس جوباسى جامبىل وبلىسىنان باستالعانىن باياندادى.

"راسىندا، ەلىمىزدەگى جوعارى جانە ورتا ءبىلىم بەرەتىن ءدىني وقۋ ورىندارىندا يسلام باعىتىندا ءىلىم الۋعا تولىق مۇمكىندىك بار. شەتەلگە بارىپ، سارساڭعا ءتۇسۋدىڭ قاجەتى جوق. مەدرەسەلەرىمىز كوللەدج دەڭگەيىنە كوتەرىلدى. "نۇر مۇباراك" ۋنيۆەرسيتەتىندە ماگيسترلىك، ءتىپتى دوكتورلىق دارەجە الىپ شىعۋعا بولادى. ءقازىر ءبىزدىڭ ۋنيۆەرسيتەتىمىز بەن مەدرەسەلەرىمىزدى جىل سايىن 500-گە جۋىق مامان ءبىتىرىپ شىعادى. دەمەك، ءبىز بار جوعى بىرنەشە جىل ىشىندە 2600 مەشىتىمىزدى ءدىن قىزمەتكەرىمەن تولىق قامتاماسىز ەتەتىن بولامىز"، - دەپ اتاپ ءوتتى باس ءمۇفتي سەرىكباي قاجى وراز.