وتكەن اپتادا تۋبەركۋلەز پروبلەمالارى ۇلتتىق ورتالىعىندا «بۇقارالىق اقپارات قۇرالدارىندا تۋبەركۋلەز تاقىرىبىنىڭ جازىلۋى» دەگەن اتپەن جۋرناليستەرگە ارنالعان ترەنينگ ءوتتى.
بۇل شارانىڭ نەگىزگى ماقساتى ايقىن. ول، ارينە، جۋرناليستەر قاۋىمىنا تۋبەركۋلەز تاقىرىبىندا دۇرىس جازۋدى، وسى سالاعا قاتىستى قولدانىلاتىن تەرميندەردى ورىندى پايدالانۋدى ۇيرەتەدى. جانە ناۋقاس ادامداردىڭ كوڭىلىنە كەلەتىن سوزدەردى قولدانۋدان اباي بولۋعا شاقىرادى. سەبەبى، ءبارىمىز جاقسى بىلەمىز، اۋرۋ مازاسىن العان جاننىڭ كوڭىل-كۇيى تەز وزگەرىپ وتىرادى. مىنە، سوندىقتان، ءدال تۋبەركۋلەز تاقىرىبىن ساۋاتتى جازا ءبىلۋ اسا ماڭىزدى. وكىنىشكە قاراي، ەلىمىزدە سالالىق جۋرناليستيكا، ونىڭ ىشىندە مەديسينالىق جۋرناليستيكاعا ماماندانعاندار سانى تىم از. 4 ساعاتقا سوزىلعان ترەنينگ بارىسىندا وسىنداي اۋقىمدى ماسەلەلەر ءسوز بولدى.
سونىمەن قاتار، تۋبەركۋلەز پروبلەمالارى ۇلتتىق ورتالىعىنىڭ ديرەكتورى تىلەۋحان ابدىلدايەۆ جىل ساناپ تۋبەركۋلەزگە شالدىعاتىندار سانى ازايىپ كەلەتىنىن ايتتى. الداعى ۋاقىتتا دا تۋبەركۋلەزگە قارسى كۇرەس جالعاسا بەرمەك. سەبەبى، بۇل اۋرۋدىڭ دەڭگەيىن نەعۇرلىم تومەندەتۋگە ءبارىمىز مۇددەلىمىز.
ترەنينگ اياسىندا حالىقتى تۋبەركۋلەز تۋرالى اقپاراتتاندىرۋ، جۋرناليستەردى بۇل تاقىرىپتى اسا جاۋاپكەرشىلىكپەن جانە قىراعىلىقپەن جازۋ ماسەلەسىن قاتىسۋشىلار ۇزاق تالقىلادى. تەك قانا جۋرناليستەر ەمەس ستۋدەنتتەر، دەنساۋلىق ساقتاۋ ۇيىمدارىنىڭ ماماندارى ءتۇرلى تاقىرىپتا ءدارىس تىڭداپ، پىكىر الماستى. جۋرناليستەر تۋبەركۋلەز تاقىرىبىنا ماتەريال جاساعان كەزدە بىرنەشە قيىندىقپەن كەزدەسەدى ەكەن. ولار:
- ستاتيستيكالىق اقپاراتتىڭ ازدىعى؛
- نەگىزگى كەيىپكەردى تابۋ قيىندىعى؛
- تاقىرىپقا قاتىستى تەرميندەردى دۇرىس تۇسىنبەۋ.
ترەنينگ كەزىندە تۋبەركۋلەز تۋرالى گازەت-جۋرنال بەتتەرىندە جارىق كورگەن، تەلەارنادان كورسەتىلگەن ماتەريالداردا ستاتيستيكالىق دەرەكتەردىڭ قاتە بەرىلەتىنى، كوپ جاعدايدا ءجۋرناليستىڭ سەنساسيا قۋىپ، وسى اۋرۋدىڭ زاردابىن ارقالاپ جۇرگەندەردىڭ كوڭىلىنە كەلەتىن سوزدەردى قولداناتىنى انىقتالدى.
بۇدان سوڭ جۋرناليستەر مەن وزگە دە قاتىسۋشىلار بۇرىن ب ا ق بەتىندە جارىق كورگەن تۋبەركۋلەزگە قاتىستى ماتەريالدارعا رەداكتورلىق تالداۋ جاسادى.
ترەنينگ سوڭىندا تۋبديسپانسەردە ۇزاق جىلدار بويى ەمدەلگەن ادامدارمەن سۇحبات جۇرگىزىلدى. جۋرناليستەر وزدەرىن قىزىقتىرعان سۇراققا تولىق ءارى ناقتى جاۋاپ تاپتى. جيىن سوڭىندا قاتىسۋشىلار ءوزارا پىكىر الماسىپ، الداعى ۋاقىتتا وسىنداي پايدالى ترەنينگتەر وتكىزىلىپ تۇرسا دەگەن تىلەكپەن تاراستى.
تۋبەركۋلەز پروبلەمالارى ۇلتتىق ورتالىعىنىڭ باسپا ءسوز ورتالىعى
