قازاقستاننىڭ سولتۇستىك، شىعىس جانە ورتالىق وڭىرلەرىندە اۋارايىنىڭ كۇرت جىلىنۋىنان الاپات تاسقىن ءجۇرىپ، بىرنەشە اۋىل توپان سۋدىڭ استىندا قالدى.

ازىرگە رەسمي مەكەمەلەر تاسقىن سۋدان زارداپ شەككەندەر (قازا بولعان) تۋرالى ناقتى اقپارات تاراتپاعان. الايدا، كەيبىر دەرەككوزدەرى مەن الەۋمەتتىك جەلىلەردە قىزىلساراي اۋىلىنىڭ ەكى تۇرعىنىن (مەكتەپ وقۋشىلارى) سەل اعىزىپ كەتەنى تۋرالى ايتىلۋدا.

قاراعاندى وبلىسى تۇرعىندارىنىڭ ايتۋىنشا، مۇنداي الاپات سۋ تاسقىنى بۇرىن-سوڭدى بولماعان. سۋ تاسقىنىنان زارداپ شەككەن 6000-عا جۋىق ادامدى وڭىرلىك تجد قىزمەتكەرلەرى  ءقاۋىپسىز ايماققا كوشىرگەن.

توسىن كەلگەن تاسقىننىڭ سالدارىنان، اسىرەسە، قارقارالى، اباي، جاڭارقا، شەت، بۇقار جىراۋ اۋداندارى تولىقتاي سۋ استىندا قالعان.

وبلىستىق توتەنشە جاعدايلار دەپارتامەنتىنىڭ رەسمي مالىمدەمەسىندە وڭىردەگى  1700-دەن اسا تۇرعىن ۇيلەر مەن 35 اۋىلدىق وكرۋگتى سۋ شايىپ كەتكەن. سونداي-اق، 340-تان استام مال باسى قىرىلىپ قالعان.

مەتەورولوگتاردىڭ ايتۋىنشا، قاراعاندى وبلىسىنداعى قىستان قالعان جيناق قار مەن قوسىمشا سۋ مولشەرى ادەتتەگىدەن ەكى-ۇشە ەسە كوپ بولعان. ال وتكەن سەنبىدە اۋا تەمپەراتۋراسى بىردەن +23 °C گرادۋسقا دەيىن كوتەرىلگەن. سالدارىنان قاتقان مۇزدار مەن جيناق قار ەرىپ، ارتى سەلگە ۇلاسقان.

قىستىڭ كوبەسى سوگىلىپ، ءسال كۇن جىلىنسا بولدى قازاقستاندىق تجم قىزمەتكەرلەرى اسپاننان تۇسكەندەي ابدىراپ قالاتىنى قالىپتى جاعدايعا اينالىپ كەتتى. كۇننىڭ كۇرت جىلىنۋى ەلىمىزدىڭ ءبىرقاتار ايماقتارىنا اپاتتى جاعداي اكەلەتىنى ايان. وسىنداي اپاتتى جاعدايلاردا حالىقتى قۇتقارۋعا ارنالعان تەحنيكالاردىڭ، جۇيەلەردىڭ، اپاتتى جاعدايعا دايىن بولماي شىعاتىنى كوڭىل الاڭداتاتىنى تاعى راس. تابيعاتتىڭ توسىن مىنەزى تەنتەكتىك تانىتقاندا، حالىقتىڭ دا، تجم-نىڭ دا قانداي كۇيدە قالاتىنىن جىل سايىنعى سىرداريا تاسقىنى مەن ءبىر عانا قىزىلاعاش قىرعىنى كورسەتىپ بەرىپ وتىر. تاجىربيەسى ايتارلىقتاي مول ق ر توتەنشە جاعدايلار مينيسترلىگى جىل سايىن ورىن الاتىن سۋ تاسقىندارىنا ءالى دە بولسا ساباق الماي وتىر. ونىڭ ايقىن مىسالى، قاراعاندى وبلىسىنداعى سەل تاسقىنى. سونىمەن قاتار، وڭىردەگى سۋ جينايتىن نىساندار مەن كوپىرلەردىڭ جاعدايى دا ءماز ەمەس بولىپ شىقتى. وڭىرلەردە گيدروتەحنيكالىق بوگەتتەر مەن وزەن سۋلارىنان كەلەتىن ءقاۋىپتىڭ الدى الىنباعان. تجد قىزمەتكەرلەرى تەك سەل تاسقىنى بولعاننان كەيىن عانا ارەكەتكە كوشكەن.

©نۇرگەلدى ءابدىعاني ۇلى