تۇركيا پرەزيدەنتى رەجەپ تايىپ ەردوعان قازاقستانعا مەملەكەتتىڭ ساپارىنىڭ اياسىندا تۇركىستانداعى ءىرى مادەني-اعارتۋشىلىق نىسانداردىڭ اشىلۋىنا قاتىسادى.

ۇستىمىزدەگى جىلدىڭ 17-ساۋىرىندە تۇركىستان قالاسىندا قوجا احمەت ياسساۋي اتىنداعى كەشەندى مەشىتتىڭ سالتاناتتى اشىلۋى بولادى. قۇلشىلىق ورداسى تۇگەلدەي تۇرىك ەلىنىڭ ءدىن ىستەرى مينيسترلىگىنىڭ قارجىلاي قولداۋىمەن سالىنعان. قۇرىلىس جۇمىستارى 2009-جىلدىڭ 16-قازان كۇنى باستالعان بولاتىن.

قۇرىلىس جۇمىستارىنا جالپى مولشەرى 10 ملن اقش دوللارى جۇمسالعان. مەشىتتە ءبىر ۋاقىتتا 3 000-عا جۋىق ادام قۇلشىلىق جاساي الادى. قوس ەل اراسىنداعى باۋىرلاستىقتى نىعايتىپ، ەكى ەل مادەنيەتىن بىرىكتىرە ورىلگەن مەشىت قابىرعالارىنان قازاق ەلىنىڭ ءداستۇرلى ساۋلەت ونەرى ايقىن كورىنگەن. مەشىت قاسىندا كىتاپحانا جانە زاماناۋي اسحانا زالدارى قاراستىرىلعان. سونداي-اق، ازانشىلار مەن يمامدارعا ارنالعان بولمەلەر، ءدارىسحانالار دا بار.

“ءوزىنىڭ تۇركيا پرەزيدەنتى رەتىندەگى العاشقى ساپارىنىڭ اياسىندا رەجەپ ەردوعان استانا مەن تۇركىستانعا بارادى”، – دەدى قازاقستاننىڭ تۇركياداعى ەلشىسى جانسەيىت تۇيمەبايەۆ.

ءسويتىپ، استانادا ەكى ەل كوشباسشىلارىنىڭ قاتىسۋىمەن جوعارى دەڭگەيلى ستراتەگيالىق ىنتىماقتاستىق كەڭەسىنىڭ ءىى وتىرىسى وتەدى.

“تۇركىستاندا تۇركيا پرەزيدەنتى ءىرى مادەني-اعارتۋشىلىق نىسانداردى، سونىڭ ىشىندە 15-كە جۋىق جىلدا ىرگەتاسى قالانعان مەشىتتىڭ اشىلۋىنا قاتىسادى”، – دەدى ەلشى.

سونىمەن قاتار، م.ح. ياسساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ نىساندارىن اشۋ جوسپارلانۋدا.

“جالپى العاندا الداعى ساپار جانە قازاقستان مەن تۇركيا ىنتىماقتاستىعىنىڭ بارلىق سانامالانعان مىسالدارى، كۇمانسىز، ەكى اعايىن مەملەكەت پەن حالىقتىڭ يگىلىگىنە قىزمەت ەتەدى. ەكىجاقتى قارىم-قاتىناستار قازىرگى تاڭدا ستراتەگيالىق بيىكتىككە كوتەرىلىپ قانا قويماي، سونىمەن بىرگە ءبىزدىڭ رەسپۋبليكانىڭ باسقا مەملەكەتتەرمەن بايلانىستارىنىڭ ىشىندە ۇلگىلى ورىن الاتىندىعىنا دەگەن العىشارتتارعا يە”، – دەپ ءتۇيدى تۇيمەبايەۆ.

ەسكە سالا كەتەيىك، 16 ءساۋىر كۇنى تۇركيا پرەزيدەنتى رەجەپ ەردوعاننىڭ قازاقستانعا مەملەكەتتىك ساپارى كۇتىلۋدە.