پرەزيدەنتتەرگە قانداي اس ازىرلەنەدى، بولماسا، ولاردىڭ اسپازشىلارى كىم دەگەن ساۋال كوپشىلىكتى قىزىقتىرارى ءسوزسىز.
14 ساۋىردە تۇساۋكەسەرى وتكەن “استانانىڭ اق داستارقانى” اتتى جاڭا فوتوالبوم كىتابى وسى سۇراقتارعا جاۋاپ بەرۋگە تىرىسىپتى.
“استانانىڭ اق داستارقانى” اتتى كىتاپ اقوردانىڭ مارتەبەلى اسحاناسى تۋرالى كوپ دەرەك بەرەتىن تۋىندى دەپ حابارلايدى BNews.kz.
كىتاپ قازاق، ورىس جانە اعىلشىن تىلدەرىندە جارىققا شىعىپ وتىر.
اۆتورلار مەملەكەت باسشىلارى ءوزىمىز ويلاعانداي “الەمدە جوق تاماقتارمەن” ەمەس، قاراپايىم، قولجەتىمدى ازىق-تۇلىكتەن دايارلاناتىن جانە رەسەپتىسىن بىلسەڭىز، ءوزىڭىز دە دايىنداي الاتىن تاماق تۇرلەرىن تۇتىناتىندىعىن ايتۋدا.
“بۇل كىتاپقا كوپ ەڭبەك سىڭىردىك. اقورداداعى بۇكىل اسپازشىلاردىڭ، جالپى اسحاناداعى بارلىق قىزمەتكەردىڭ تەرى توگىلدى. كىتاپتا جازىپ شىققان تاعام تۇرلەرىن وسى ۋاقىتقا دەيىنگى ەڭبەگىمىزدىڭ ەسەبى رەتىندە ۇسىنىپ وتىرمىز دەسەك بولادى. كىتاپقا جازعان تاعام تۇرلەرى ەڭ تاڭداۋلى، ياعني، مەملەكەت باسشىلارى دەڭگەيىندەگى قوناقتارعا ازىرلەنەتىن تاعامدار. جالپى، اقوردانىڭ اسحاناسىندا جاسالاتىن تاعامداردىڭ اراسىندا وتە جوعارى شەبەرلىكتى قاجەت ەتەتىن تاعامدار بار. ياعني، ونداي اس تۇرلەرىن ءپىسىرۋ ءۇشىن بەلگىلى ءبىر تەحنولوگيالاردى، ادىس-تاسىلدەردى پايدالانۋ كەرەك. ءبىراق، تاعامداردىڭ 70 پايىزىن وڭاي پىسىرۋگە بولادى”، – دەيدى كىتاپ اۆتورلارىنىڭ ءبىرى، پرەزيدەنت ءىسىنىڭ باسقارماسى “قاراتوتكەل” رمك ديرەكتورىنىڭ ورىنباسارى ارتەم كانسيەۆ.
كىتاپ بەس تاراۋدان تۇرادى جانە قالاداعى “مەلومان” ساۋدا جەلىسىنىڭ دۇكەندەرىندە ساتىلادى.
ءبىرىنشى تاراۋىندا حالقىمىزدىڭ عاسىرلاردان بەرى كەلە جاتقان اس دايىنداۋ ءداستۇرى، ەكىنشى تاراۋىندا ءارتۇرلى ەلدەردىڭ، ۇلى ساياساتكەرلەردىڭ “اسحاناسى”، ءۇشىنشى تاراۋدا جوعارى لاۋازىمدى قوناقتارعا اس دايارلاۋداعى قازاقستاننىڭ تاجىريبەسى، ءتورتىنشى تاراۋدا پرەزيدەنتتەردىڭ جاقسى كورەتىن استارى تۋرالى ايتىلا كەلە، قورىتىندى بولىمدە اقوردا اسپازشىلارىنىڭ سۇحباتى بەرىلگەن.
كىتاپتىڭ سوڭىندا اقوردانىڭ رەسەپتەرىن دە وقي الاسىز.
ايتا كەتەرلىگى، اقوردانىڭ اسپازشىلارى ۇنەمى شەت ەلدەرگە بارىپ تاجىريبە الماسىپ، شەبەرلىكتەرىن جەتىلدىرىپ وتىرادى. بىلتىر شەت مەملەكەتتەردەن وقۋدان وتكەن اسپازشىلارى 50-دەن استام جاڭا اس ءتۇرىن ويلاپ تاپسا، 2014 جىلى اقوردانى اسحاناسى 110 رەسمي قابىلداۋ وتكىزگەن ەكەن.
