اقش ورتالىق بارلاۋ باسقارماسىنىڭ (سرۋ) بۇرىنعى وفيسەرى، 78 جاستاعى نورمان حودجەس 1959 بەن 1972 جىلدار ارالىعىندا امەريكا ۇكىمەتىنىڭ بۇيرىعى بويىنشا 37 ادامدى ءوز قولىمەن ولتىرگەنىن مالىمدەدى. حودجەس اتاقتى اكتريسا مەريلين مونرونىڭ ولىمىنە دە ءوزى سەبەپشى بولعانىن مويىنداعان. بۇل تۋرالى worldnewsdailyreport.com سايتىنا سىلتەمە جاساي وتىرىپ، REGNUM اقپاراتتىق اگەنتتىگى حابارلادى. قارت وفيسەر جۋىردا ۆيردجينيا شتاتىنداعى شاعىن گوسپيتالعا جاتقىزىلعان. قانشاما جىل جاسىرىپ كەلگەن سىرىن سول جەردە جايىپ سالىپتى. حودجەستىڭ ايتۋىنشا، ول مايورا دجەيمس «دجيممي» حەيۆورتتىڭ امىرىمەن «مەملەكەتتىڭ قاۋىپسىزدىگىنە ءقاۋىپ توندىرەتىن» ادامداردى ءولتىرىپ وتىرعان. نورمان حودجەس كاسىبي كىسى ولتىرۋشىلەر «بەستىگىنىڭ» ءبىر مۇشەسى بولعان كورىنەدى. ولار كوزقاراستارى اقش مۇددەسىنە قايشى كەلەتىن ساياسي بەلسەندىلەردى، جۋرناليستەر مەن عالىمداردى، كاسىپوداق كوشباسشىلارى مەن سۋرەتشىلەردى جولدان ىسىرعان. مەريلين مونرو – حودجەستىڭ قولىنان ولگەن جالعىز ايەل. وفيسەر بۇل ىسىنە وكىنبەيتىنىن ايتقان. ويتكەنى مونرونىڭ كەننەدي مەن فيدەلەم كاسترودان بولەك تاعى بىرنەشە ىقپالدى ادامداردىڭ كوڭىلدەسى بولعانىن دالەلدەيتىن دەرەكتەر كوپ بولىپتى-مىس. سونداي-اق، ءسرۋ-دىڭ بۇرىنعى قىزمەتكەرى اكتريسانىڭ «كوممۋنيستەرگە ستراتەگيالىق اقپاراتتى جەتكىزۋ» ىقتيمالدىعى جوعارى بولعانىن دا ايتىپتى. 1962 جىلى 5 تامىزدا حودجەس اتىشۋلى ءولىمدى جۇزەگە اسىرعان: اكتريسانىڭ بولمەسىنە كىرىپ، تىنىشتاندىراتىن ەكپە جاسايدى. ەكپە قۇرامىنداعى نەمبۋتال (باربيتۋرات) مونرونىڭ ولىمىنە سەبەپشى بولسا كەرەك. ءقازىر قارت وفيسەردىڭ ءسوزىن راستايتىن ەشكىم جوق. مايور حەيۆورت تا، «بەستىكتىڭ» وزگە مۇشەلەرى دە كوز جۇمعان. ءبىراق حودجەستىڭ ءسوزى ءفبر-دىڭ نازارىن اۋدارماي قويمادى: ءولىم اۋزىندا جاتقان قاريانىڭ قولىنا كىسەن سالىنىپ، زەرتتەۋ جۇرگىزىلە باستادى.

"تۇركىستان"