قاراعاندى وبلىسى ءىىد كريمينالدىق پوليسيا باسقارماسى مەن قالالىق اۋماقتىق ىشكى ىستەر ورگانى قىزمەتكەرلەرىنىڭ جەدەل-ىزدەستىرۋ شارالارى بارىسىندا كامەلەتتىك جاسقا تولماعان بالالارعا ازعىندىق ارەكەتتەر جاساعان كۇدىكتى ۇستالدى.

بۇل تۋرالى قاراعاندى وبلىسىنىڭ ءىىد باسپا ءسوز قىزمەتى حابارلادى.

قاراعاندىنىڭ ميحايلوۆ اۋدانىنان 32 جاستاعى ەشقايدا جۇمىس ىستەمەيتىن قالا تۇرعىنى ۇستالىپ، قالا اۋماعىندا كامەلەتتىك جاسقا تولماعاندارعا قاتىستى ازعىندىق ارەكەتتەر جاساعانىن مويىندادى.

قازىرگى ۋاقىتتا ۇستالعان ازامات ۋاقىتشا وقشاۋلاۋ يزولياتورىنا قامالىپ، سوتقا دەيىنگى تەرگەپ-تەكسەرۋ امالدارى جۇرگىزىلۋدە دەپ حابارلايدى قازاقپارات.

سونداي-اق، قاراعاندىدا ءالى دە بىرنەشە پەدوفيلدەر ءجۇرۋى مۇمكىن. سەبەبى وزدەرىنە ازعىندىق ارەكەت كورسەتكەن ەر ادامدى بالالار ءارتۇرلى سيپاتتاپ بەرگەن ەدى.

الدىندا حابارلانعانداي الەۋمەتتىك جەلىدە قاراعاندىلىق جاس قىزدارعا ازعىندىق ارەكەتتەر جاساپ، ىزدەۋدە جۇرگەن ەر ادامداردىڭ فوتوروبتى پايدا بولعانىن ايتقانبىز.

ەسكە سالا كەتسەك، 9 ءساۋىر كۇنى ەر ادام كىشكەنتاي قىزعا تۇرعىن ءۇي پودەزدىندە ازعىندىق ارەكەتتەر كورسەتكەن، ال 15 ءساۋىر كۇنى تاعى ءۇش وقۋشى قىزعا تيىسكەنىبەلگىلى بولدى. ەكەۋى قاشىپ قۇتىلعانىمەن، ءۇشىنشى وقۋشىنى پەدوفيل جەكە شىعارىپ الىپ، ءوزىن قاناعاتتاندىرۋ ءساتىن تۇسىرۋگە ماجبۇرلەگەن.