سەمەيدە مۋزارت، جانار دۇعالوۆا، ءالي وقاپوۆ سىندى قازاق ەسترادا جۇلدىزدارى قاتىسقان كونسەرت شوۋ ەمەس، شۋعا ۇلاستى.

انشىلەر ءبىر رەت قوياتىن كونسەرتتەرىن ءۇش رەت تەگىن وتكىزۋىنە تۋرا كەلگەن. سەبەبى 450 ورىنعا ارنالعان قالالىق مادەنيەت سارايىنا حالىق سىيماي دالادا قالدى.

سىرتتاعى كۇتە-كۇتە توزىمدەرى تاۋسىلعان كورەرمەن ەسىكتى قيراتىپ، ءتارتىپ ساقشىلارىنا قارسى شىقتى. ىشكە سىيماعان جۇرتتىڭ سانى سارايعا كىرگەن حالىقتان 4-5 ەسە كوپ.

ونەر جۇلدىزدارىن ءوز كوزدەرىمەن كورگىسى كەلگەندەر 3-4 ساعات دالادا توسۋمەن بولدى. اقىرى توزىمدەرى تاۋسىلعان كورەرمەن ەسىكتى قيراتىپ، ىشكە كىرۋگە ارەكەت ەتكەن.

حالىقتى سابىرعا شاقىرۋعا شاماسى جەتپەگەن ءتارتىپ ساقشىلارى ەسىكتىڭ الدىڭعى قاتارىنداعى حالىققا گاز بالون دا قولداندى، جاپا-تارماعاي ەسىك جاقتاۋىنا جۇگىرگەندەر اراسىندا تالىپ، قۇلاپ، جىعىلعاندار دا بولدى.

قاۋىپسىزدىكتى كۇشەيتۋ ءۇشىن ۇلتتىق گۆارديا جاساعى مەن قوسىمشا ساربازدار دا شاقىرتىلدى. اقىرىندا قالا اكىمىنىڭ ءوزى كەلىپ، جينالعانداردى سابىرعا شاقىردى.

“ساعات بەس بولماي كەلدىك. ادام كوپ. ارەڭ كىردىك، كىرە المادىق. ەسىكتىڭ ءبارىن سىندىرىپ، شاشتارىن جۇلىپ، ادامدار تالىپ جاتتى. ۇلكەن كىسىلەر، بالالار بار. ءبىزدى كىرگىزبەيتىن بولسا نە ءۇشىن تەگىن شاقىردى؟”، – دەيدى  قالا تۇرعىنى رىسالدى قاسىمحانوۆا.