ۇلتتىق قوردىڭ ەسەبىنەن وتاندىق ءاۆتووندىرىستى قولداۋ ماقساتىنا بولىنگەن 20 ملرد تەڭگەنىڭ 15 ميللياردى قازاقستاندا جينالعان 55 كولىك ماركاسىنىڭ نەسيەسىنە بەرىلەتىن بولادى.

بۇل تۋرالى “قازاقستان دامۋ بانكىنىڭ” باسقارما ءتوراعاسى بولات جامىشيەۆ مالىمدەدى.

20 ساۋىردەن باستاپ وتاندىق اۆتوكولىكتى نەسيە ارقىلى الۋدىڭ ءتيىمدى پايىزدىق مولشەرلەمەسى 7،5%-دى قۇرايتىن بولادى.

رەسپۋبليكا ەكونوميكاسىن مودەرنيزاسيالاۋ جونىندەگى مەملەكەتتىك كوميسسيا بەكىتكەن بانكتەر تىزىمىنە قازاقستاننىڭ حالىق بانكى (4 ملرد تەڭگە)، ەۋرازيالىق بانك (3 ملرد تەڭگە)، سبەربانك قازاقستان (2 ملرد تەڭگە)، بانك سەنتركرەديت (2 ملرد تەڭگە)، اتف بانك (2 ملرد تەڭگە) جانە ForteBank (2 ملرد تەڭگە) ەندى.

ال جەڭىلدەتىلگەن نەسيەمەن بەرىلەتىن كولىكتەرگە كەلەسى 55 ماركالار كىردى: Chevrolet Aveo؛ Chevrolet Captiva؛ Chevrolet Cruze؛ Chevrolet Malibu؛ Chevrolet Orlando؛ Chevrolet Tracker؛ KIA Carens؛ KIA Ceed؛ KIA Cerato؛ KIA Cadenza؛ KIA Optima؛ KIA Picanto؛ KIA Rio؛ KIA Carnival؛ KIA Sorento؛ KIA Soul؛ KIA Sportage؛ LADA 21214؛ Škoda Octavia؛ Škoda Rapid؛ Škoda Superb؛ Škoda Yeti؛ Hyundai Tucson؛ Hyundai Elantra؛ Hyundai Sonata؛ Hyundai SantaFe؛ Hyundai i-30؛ SsangYong Kyron؛ SsangYong New Actyon؛ SsangYong Actyon Sports؛ SsangYong Rexton؛ SsangYong Nomad؛ SsangYong C150؛ SsangYong Tivoli؛ JAC A20؛ JAC J4؛ JAC J5؛ JAC S3؛ JAC S5؛ JAC J6؛ JAC M5؛ Peugeot 408؛ Peugeot 301؛ Peugeot 508؛ Peugeot 3008؛ Peugeot 2008؛ Peugeot Partner VP Tepee؛ Geely CK؛ Geely GC 6؛ Geely MK-CROSS؛ Geely SC-7؛ Geely GC-7؛ Geely Emgrand E7؛ Geely Emgrand GX-7؛ ZAZ Chance.

قازاقستاندىق اۆتوبيزنەس اسسوسياسياسىنىڭ پرەزيدەنتى اندرەي لاۆرەنتيەۆتىڭ ايتۋىنشا، قازىرگى ۋاقىتتا ەڭ ارزان اۆتونەسيەنىڭ مولشەرلەمەسى 18%.

“ءقازىر قازاقستاندىق نارىقتا 10 كولىكتىڭ التاۋى نەسيە ارقىلى ساتىلادى. بۇل رەتتە اتالعان مەملەكەتتىك باعدارلاما بىرنەشە باعىت بويىنشا ءوز پايداسىن تيگىزە الادى. وتاندىق ءاۆتووندىرىس تە داميدى، تۇتىنۋشى دا ۇتادى. ءتيىمدى پايىزدىق مولشەرلەمەسى 7،5%، بارلىق ساقتاندىرۋ تولەمدەرى ەسكەرىلگەن نەسيەمەن جاڭا كولىك الۋعا بولادى”، – دەيدى ول.

جەكە تۇلعالاردى نەسيەلەندىرۋ كەلەسى تالاپتار ارقىلى جۇرەدى:

نومينال سىياقى مولشەرلەمەسى 4%-دان اسپاۋى قاجەت، جىلدىق ءتيىمدى مولشەرلەمەسى 7،5%-دان اسپاۋى قاجەت (بۇعان كاسكو بويىنشا ساقتاندىرۋ جانە اۆتوكولىكتى كەپىلگە راسىمدەۋ بويىنشا شىعىندار دا كىرەدى)، نەسيەنىڭ بەرىلەتىن مەرزىمى 5 جىلدان اسپاۋى قاجەت، نەسيە ۆاليۋتاسى — تەڭگە، ءبىر كولىكتىڭ باعاسى 5،6 ملن تەڭگەدەن اسپاۋى كەرەك. سونداي-اق، مىندەتتى العاشقى جارنا ساتىلاتىن كولىكتىڭ 20%-نان اسپاۋى قاجەت.

قالعان 5 ملرد تەڭگە قدب-نىڭ ەنشىلەس كومپانياسى “قدب-ليزينگ” ارقىلى ليزينگكە ارنايى باعىتتاعى اۆتوكولىك پەن اۆتوتەحنيكا الاتىن (اۋىل شارۋاشىلىعى تەحنيكسىنان باسقا) زاڭدى تۇلعالار مەن جەكە كاسىپكەرلەردى قارجىلاندىرۋعا باعىتتالادى.

ونىڭ تالاپتارى كەلەسىدەي:

ليزينگ مەرزىمى 3 جىلدان 5 جىلعا دەيىن، نومينال سىياقى مولشەرلەمەسى 4%-دان اسپاۋى قاجەت، قارجىلاندىرۋ ۆاليۋتاسى — تەڭگە، ليزينگ بويىنشا العاشقى جارنا الىناتىن تەحنيكا قۇنىنىڭ 30%-ى، نەگىزگى قارىزدى تولەۋ بويىنشا جەڭىلدىك مەرزىمى — 6 اي، قوسىمشا شىعىندار (ساقتاندىرۋ، قىزمەت كورسەتۋ جانە اگەنتتىك قىزمەتى) ليزينالۋشىنىڭ ەسەبىنەن.

اتالعان مەملەكەتتىك باعدارلاما “نۇرلى جول” پرەزيدەنت باستاماسىنىڭ اياسىندا جۇزەگە اسىرىلادى.