شىبىن
مەيرامحانادا تاماقتانىپ وتىرعاندا سورپاعا شىبىن ءتۇسىپ كەتسە كىم قايتەر ەدى؟
نەمىس «سورپا وتە ىستىق بولعاندىقتان شىبىن ءولىپ قالعان-اۋ» دەپ، ويلايدى دا، شىبىندى شىعارىپ تاستاپ، سورپانى ىشە بەرەدى.
فرانسۋز شىبىندى تارەلكە شەتىنە شىعارىپ مىجيدى دا، سورپانى ىشەدى.
جۇڭگو شىبىندى جۇتا سالادى.
اعىلشىن رەنىشىن جاسىرماي، بۇلقان-تالقان اشۋلانىپ، مەيرامحانادان شىعىپ كەتەدى.
ورىس شىبىندى بايقامايدى.
امەريكاندىق بولسا داياشىنى، اسپازدى، ەسەپشىنى شاقىرىپ، شاتاق شىعارادى.
يرلانديالىق شىبىندى الاقانىنا سالىپ، ۇشىرىپ جىبەرۋگە تىرىسادى.
جاپون توڭىرەگىن كوزبەن شولىپ شىعادى دا، «شىبىندى ماعان عانا سالعان ەكەن عوي» دەپ، ىشتەي قاتتى قىنجىلادى.
كارىس تارەلكەسىنە شىبىننىڭ ءتۇسىپ كەتكەنىن جاپوننان كورىپ، وعان كوزىن الارتادى.
باسى قوسىلسا
ەكى نەمىس قوسىلسا ءۇش ەرەجە، ءتورت زاڭ تۋادى. ەكى ەۆرەي قوسىلسا ءۇش يدەيا، ءتورت ساياسي پارتيا تۋادى. ەكى جاپون قوسىلسا ءۇش بانك، ءتورت كومپانيا دۇنيەگە كەلەدى. ەكى امەريكاندىق قوسىلسا ءۇش سوعىس بولىپ، شىندىق تورتكە بولىنەدى.
جاھاندانۋ
— جاھاندانۋ دەگەنىمىز نە؟
—پاريجدە اعىلشىن قىزى مەن مىسىرلىق جىگىت نەمىس اۆتوكولىگىمەن كەتىپ بارا جاتىپ، فرانسۋز مىنگەن جاپون موتوسيكلىنە سوعىلۋىنىڭ ناتيجەسىندە ورىن العان جول وقيعاسى.
شىعارما
ءبىر ءمۇعالىم وقۋشىلارعا ءپىلدى وبەكت رەتىندە الىپ، شىعارما جازۋعا تاپسىرما بەرىپتى. فرانسۋز بالاسى: «ءپىلدىڭ ماحابباتى» دەگەن تاقىرىپتا ەسسە جازىپتى. نەمىس بالاسى ءپىلدىڭ مىنەز-قۇلقى جونىندە عىلىمي ماقالا جازىپ اكەلەدى. ءۇندى بالاسى ءپىلدىڭ دىنگە قاتىسى تۋرالى رەفەرات دايىندايدى. ەۆرەي بولسا «ءپىل جانە انتييەۆرەيزم» دەگەن تاقىرىپتا ديسسەرتاسيا جازىپ اكەلەدى. ال جاپون بالاسى جازعان شىعارمانىڭ تاقىرىبى: «ءپىل جانە جاپوندىق كاسىپكەرلىك».
تاستالاتىن زات
امەريكاندىق، جاپون، يراكتىق ءۇش كىسى تەڭىزدە ساياحاتتاۋدى ۇيعارىپتى. ءبىر كەزدە كەمە سۋعا باتا باستاپتى. كەمەنىڭ ىشىندە كوپ دۇنيە بولعاندىقتان، ۇشەۋى ارتىق زاتتاردى سۋعا لاقتىرۋعا كەلىسىپتى. الدىمەن، امەريكاندىق ءوزىنىڭ اۆتوكولىگىن تەڭىزگە لاقتىرىپتى. سودان سوڭ جاپون فوتواپپاراتىن تاستاپتى. ەڭ سوڭىندا يراكتىق امەريكاندىقتى سۋعا لاقتىرعان ەكەن.
سۋ جاندىگىنىڭ ورنىنا
بىردە امەريكاندىق جاپونعا بىلاي دەپتى:
— سۋ جاندىكتەرىن تاماققا پايدالانۋ دۇرىس ەمەس.
— نەگە؟
— ويتكەنى ولاردىڭ سەزىمتالدىعى جوعارى ءارى سونداي سۇيكىمدى تىرشىلىك يەلەرىن قۇرمەتتەۋدىڭ ورنىنا جەپ قويۋ دەگەن سۇمدىق قوي!
— وندا بۇدان بىلاي امەريكاندىقتاردى تاماق قىلايىق.
ۋاقىت
بىردە دۇنيەجۇزىلىك انشىلەر بايقاۋى ءوتىپتى. بايقاۋ باستالاردان ءبىر ساعات بۇرىن نەمىس پەن جاپون كەلەدى. ءۇش مينۋت بۇرىن ەۆرەي كەلەدى. ءبىر مينۋت قالعاندا اعىلشىن كەلەدى. ءدال باستالعان شاعىندا امەريكاندىق جەتىپتى. بەس مينۋتتان كەيىن فرانسۋز، ون بەس مينۋتتان سوڭ يتاليان، جارتى ساعات وتكەندە يسپان كەلەدى. پورتۋگالدىقتىڭ قاشان كەلەتىنىن ەشكىم بىلمەيدى.
كوك جيراف
ءبىر باي: «ماعان كوك ءتۇستى جيرافتى كورسەتكەن كىسىگە بار قاپ التىن بەرەمىن» دەپ، جار سالىپتى. ونى ەستىگەن اعىلشىن «كوك جيراف بار ما، جوق پا» دەگەن تاقىرىپ توڭىرەگىندە حالىقارالىق دوڭگەلەك ۇستەل جاساپ، تالقىعا سالىپتى. نەمىس كىتاپحاناعا بارىپ، عىلىمي ەڭبەكتەردەن كوك جيراف تۋرالى دەرەك ىزدەيدى. امەريكاندىق بولسا جەر ءجۇزىنىڭ تۇكپىر-تۇكپىرىنە اسكەرلەرىن جىبەرىپ، كوك جيرافتى ىزدەپتى. ال جاپون تەحنولوگيالىق زەرتتەۋ جۇرگىزىپ، اقىرى كوك جيرافتى جاساپ شىعارىپتى.
جاپون تىلىنەن اۋدارعان: شارافات جىلقىبايەۆا
