پرەزيدەنتتىڭ جيەن نەمەرەسى ايسۇلتان نازاربايەۆ ءوزىنىڭ بوستاندىققا شىققانىن مالىمدەدى دەپ حابارلايدى Qamshy.kz اقپارات اگەنتتىگى. بۇل تۋرالى ول ءوزىنىڭ فەيسبۋك پاراقشاسىنا جازدى. 

"مەن ۇزاق ۇزىلىستەن كەيىنگى العاشقى جازبام ارقىلى العىس ايتقىم كەلەدى. رەسەي فەدەراسياسىنىڭ باس پروكۋراتۋراسىنا، رف سىم-گە، رف ىىم-گە رف فەدەرالدىق قاۋىپسىزدىك قىزمەتىنە العىسىم شەكسىز. ءقازىر مەن تولىقتاي ازاتپىن. سونداي-اق قانداي جاعداي بولماسىن مەنىڭ الەۋمەتتىك جەلىدەگى دوستارىم بولىپ قالعاندارىڭىز ءۇشىن العىس ايتامىن. مەنىڭ ايتارىم كوپ"، دەپ جازدى ەلباسىنىڭ جيەن نەمەرەسى. 

ايسۇلتان نازاربايەۆ قايدا جوعالىپ كەتتى دەگەن سۇراق كوپشىلىكتى كوپتەن بەرى مازالاپ جۇرگەن بولاتىن. ەسكە سالساق، داۋدىڭ باسى ۇقك-نىڭ بۇرىنعى ءتوراعاسى النۇر مۇسايەۆتىڭ جازباسىنان باستالدى. ءقازىر مۇسايەۆ شەت ەلدە تۇرىپ جاتىر. ول ايسۇلتان نازاربايەۆتىڭ تۇرمەدە ەكەنىن جازعان بولاتىن. ءتىپتى وعان ءقاۋىپ ءتونىپ تۇرعانىن دا ايتقان. كەيىن اتالمىش جازبا قىزۋ تالقىعا ءتۇستى. 

ەسكە سالساق، 2017 جىلدىڭ قاڭتار ايىندا ايسۇلتان نازاربايەۆ شۋلى مالىمدەمە جاساعان بولاتىن. ول يمانعالي تاسماعامبەتوۆتى، ادىلبەك جاقسىبەكوۆ، بولات وتەمۇراتوۆتى "حالىق جاۋى" دەپ اتاپ ايدى اسپانعا ءبىر-اق شىعاردى.

كەيىن 2017 جىلدىڭ اقپانىندا قازاقستان فۋتبول فەدەراسياسىنىڭ پرەزيدەنتى بولىپ تاعايىندالدى. سوسىن ول ءوزىنىڭ ەسىرتكى قولدانعانىن، الايدا بارلىق ماسەلە شەشىمىن تاپقانىن، وزگەرگەنىن ايتىپ، اعىنان جارىلدى. سونداي-اق  ەلباسىنىڭ جيەن نەمەرەسى فۋتبول فەدەراسياسىنا بار-جوعى 8 اي ءتوراعالىق ەتىپ، ءوز ەركىمەن ورىنىن بوساتتى. 

سودان بەرى ايسۇلتان نازاربايەۆتان ەش حابار جوق. ول ءوزىنىڭ فەيسبۋك پاراقشاسىنا دا ەشقانداي جازبا قالدىرماعان. سوڭعى رەت 23 ماۋسىمدا استانا مارافونىنا قۋانا-قۋانا قاتىساتىنىن ايتىپ، ۇيىمداستىرۋشىلارعا العىس بىلدىرگەن. 

ال ءقازىر ونىڭ نە ءۇشىن قاماۋدا بولعانى تۋرالى ناقتى اقپارات جوق.