«سلاۆيان بازارى» بايقاۋىنىڭ جۇلدەگەرى، مەملەكەتتىك «دارىن» سىيلىعىنىڭ يەگەرى، جاس ءانشى امىرەنىڭ تانىمالدىلىعى كۇننەن كۇنگە ارتۋدا. Qamshy.kz اقپارات اگەنتتىگىنىڭ ءتىلشىسى جاس انشىمەن بولعان سۇحباتتى وقىرمان نازارىنا ۇسىنادى. 

— ەرنار سادىربايەۆقا «امىرە» اتاۋى ساتتىلىك اكەلدى مە؟

— ازان شاقىرىپ قويعان ەسىمىم – ەرنار. اتىمدى انام قويعان. يا، وسى لاقاپ اتتى قويعالى ءبىراز وزگەرىستەر ورىن الدى.  ءبىراق جەتىستىككە جەتىپ جاتسام، ول كوپ جىلعى ەڭبەكتىڭ جەمىسى. ماعان ساتتىلىك اتا-انام مەن ۇستازدارىمنىڭ، قولداۋشىلارىم مەن پروديۋسەرىمنىڭ ارقاسىندا كەلدى.

— «امىرە» لاقاپ اتىن ۇسىنعان كىم؟

— مەنى 2016 جىلدىڭ قاراشا ايىندا «DAR RECORDS» مۋزىكالىق كومپانياسى بىرلەسىپ جۇمىس جاساۋعا شاقىردى. سونداعى باسشىلار ماعان ساحناعا «امىرە» بولىپ شىعۋعا ۇسىنىس ءبىلدىردى. العاشىندا كەلىسۋگە قينالدىم، ويتكەنى بۇل ەسىمدى جاتىرقادىم. كەيىن ماعان باسشىلار بۇل ەسىمنىڭ ماڭىزدىلىعىن ءتۇسىندىردى. امىرە قاشاۋبايەۆتىڭ ءومىربايانى مەن شىعارماشىلىعىن تولىق زەرتتەي كەلە بۇل ەسىمدە ءبىر جاۋاپكەرشىلىك بارىن ءتۇسىندىم. ۋاقىت وتە كەلە ۇيرەنىپ، وسى جاۋاپكەرشىلىكتى الىپ جۇرەتىنىمە دەگەن سەنىمىم كۇشەيدى. ءقازىر مەنى كوبى امىرە دەپ اتايدى.

— مەملەكەتتىك «دارىن» سىيلىعىنىڭ يەگەرى اتاندىڭىز. قانداي كۇيدەسىز؟

— يا، نەبارى 23 جاسىمدا «دارىن» سىيلىعىنا يە بولۋ دا مەن ءۇشىن ءبىر باقىت. بۇل ماراپات ماعان العا قاراي ۇمتىلۋعا كۇش بەردى. كەۋدەمە توسبەلگى عانا ەمەس، ۇلكەن جاۋاپكەرشىلىك ءىلىندى. «دارىن» توسبەلگىسىنە تەك مەنىڭ عانا ەمەس، اتا-انام مەن ۇستازدارىمنىڭ، پروديۋسەرىم مەن جاقىندارىمنىڭ دا سىڭىرگەن ەڭبەگى زور. سونىڭ ىشىندە ۇستازدارىم لاكي كەسوگلۋعا، الەكساندر كالۋگينگە، پروديۋسەرىم جان مۇقانوۆقا ەرەكشە العىس بىلدىرەمىن. توسبەلگى تاققان قانداي باقىت دەپ باياعىدان ارمانداۋشى ەدىم. مىنە، 23 جاسىمدا العاشقى توسبەلگىمدى تاقتىم.

— ءسىز ورىندايتىن ءانىڭىزدىڭ ماتىنىنە ءمان بەرەسىز بە، الدە اۋەنىنە مە؟

—  شىققان تۋىندىنىڭ جامانى جوق. ءبىراق مەن ءوزىمنىڭ ءانىمدى ءالى ىزدەۋدەمىن. بۇرىن كوبىنە اۋەنگە ءمان بەرەتىنمىن. ءقازىر سوزىنە دە قارايمىن. ءاننىڭ اۋەنى دە، ءسوزى دە، ءتىپتى وڭدەۋى دە جاقسى بولۋى كەرەك.  باياعىداي ەمەس، ءقازىر ءاننىڭ ءماتىنىن اركىمگە جازدىرا بەرمەيمىن. ماعان قازاقشا رەترو اندەردى ايتقان ۇنايدى. سولاردى وڭدەپ، جاڭاشا ستيلمەن جارىققا شىعارعىم كەلەدى.

— بيىل وتكەن «سلاۆيان بازارى» بايقاۋى ءسىزدىڭ شىعارماشىلىعىڭىزعا قانداي وزگەرىس اكەلدى؟

«سلاۆيان بازارى» مەنىڭ ءومىرىمدى جاقسى جاعىنان وزگەرتتى. ءبارى باسقاشا بولا باستادى. جۇرتتىڭ ماعان دەگەن كوزقاراسى وزگەردى. «سلاۆيان بازارىنا» دەيىن دە مەن سول امىرە ەدىم، بايقاۋدان كەيىن دە سول امىرەمىن. ءبىراق ءبارى ماعان وزگەشە قاراي باستادى. وعان دەيىن وسىنداي دەڭگەيدە ەلەنبەۋشى ەدىم.

— تىڭدارمان ديماش باعىندىرعان بەلەستەن ءسىزدى دە كورگىسى كەلەدى. ول ءۇشىن ب ا ق كەرەك پە، باپ كەرەك پە؟

— ديماش – قازاق ەلىنە بۇيىرعان ب ا ق. ەلىمىزدىڭ اتىن الەمگە تانىتىپ ءجۇر. سول ءۇشىن العىسىم شەكسىز. «سلاۆيان بازارىنا» دايىندالىپ جۇرگەنىمدە اقىلىن ايتىپ، جول كورسەتتى. ول مەنىڭ ءارى دوسىم، ءارى باۋىرىم. قىتايدا جۇرسە دە «جۇلدىزدى جەكپە-جەك» بايقاۋىندا جەڭىلىپ قالعانىمدا ءوزى حابارلاسىپ، قولداۋىن ايامادى. كەشە عانا وتكەن «توپجارعان» بايقاۋىنان كەيىن ەكەۋمىز استانادا جولىقتىق. بۇل بايقاۋدان ەكىنشى ورىن الدىم. سول ءۇشىن ديماش ماعان «ونداي بايقاۋلارعا قاتىسپا، سەن الەمدىك ساحنالاردا ءان ايتۋعا لايىقسىڭ» دەپ كەڭەسىن ايتىپ جاتىر. تىڭدارماننىڭ ديماشپەن سالىستىرىپ جاتقانى مەنى قۋانتادى. ءبىراق ديماش جالعىز. ول – فەنومەن. ديماش سالعان دارا جولمەن مەن دە اقىرىنداپ كەلە جاتىرمىن. باۋىرىمنىڭ جەتىستىگى ماعان دا بۇيىرسىن. مەن الەمدىك ساحنادا ءان ايتۋعا تولىقتاي دايىنمىن.

 امىرە، ونەرىڭىز ورلەي بەرسىن! الەمدىك ساحنادا قازاق ءانىن شارىقتاتىڭىز!

 اڭگىمەلەسكەن اقەركە ءابىلحان