بۇگىن الماتىدا ورتەنگەن "ادەم" بازارىنىڭ ساۋداگەرلەرى ميتينگكە شىقتى. بۇل تۋرالى "ازاتتىق" سايتى حابارلايدى.

كەشە تولىقتاي جانىپ كەتكەن "ادەم" ساۋدا ورتالىعىنىڭ بۇرىنعى ساۋداگەرلەرى مەن بۋتيك ارەنداتورلارى (جالعا الۋشىلار) نارازىلىق اكسياسىن ۇيىمداستىرعان. 200-گە تارتا ادام ءبىر اۋىزدان "نازاربايەۆ، قۇتقار ءبىزدى!" دەپ ۇران سالىپ، ترانسپورت قوزعالاتىن الماتىنىڭ سولتۇستىك اينالما جولىن جاۋاپ تاستاعان. نارازىلىق اكسياسى بولعان جەرگە كەلگەن قۇقىق قورعاۋ ورگاندارى قىزمەتكەرلەرى ەرەۋىلشىلەردى جولدىڭ شەتىنە شىعارىپ، ترانسپورت جولىن اشقان. قازىرگى ۋاقىتتا، ىزاعا بۋلىققان  كاسىپكەرلەر مەن ساۋداگەرلەر جولدى قايتا جاۋىپ تاستاماۋى ءۇشىن، پوليسيا ولاردى كۇزەتۋدە.

"ورتتەن كەيىن ءبىز ەشكىمگە كەرەكسىز بولىپ قالدىق"،-دەيدى اشىنعان ساۋداگەرلەر. ال قاراپايىم ساۋداگەرلەردىڭ بارلىق تاۋارلارى ورتەنىپ كەتكەن. ولاردىڭ ايتۋىنشا، ءورت كەزىندە جەتىسۋ اۋدانىنىڭ اكىمى عانا كەلىپ، ساۋداگەرلەرمەن بىرگە بولعان. ال الماتى قالاسىنىڭ اكىمى مۇلدە اياق باسپاعان.

ەستەرىڭىزگە سالا كەتەيىك، 26 ءساۋىر كۇنى بۇرىنعى "باراحولكا" بازارىنىڭ باس جاعىندا ورنالاسقان "ادەم" ساۋدا ورتالىعىنان ءورت شىعىپ، ءورت ءسوندىرۋ قىزمەتكەرلەرى قىپ-قىزىل ءورتتى  تەك 27 ءساۋىر كۇنى تاڭعا جۋىق توقتاتقان. كەيىن انىقتالعانداي، "ادەمدەگى" ءورت 25 مىڭ شارشى مەتردى جالماپ كەتكەن.

نۇرزات توعجان