الەۋمەتتىك جەلى قولدانۋشىلاردىڭ ءبىرى "كومادا جاتقان ادامدار قانداي سەزىمدە بولادى جانە ولاردىڭ جاقىندارى قانداي تىلسىم جايتتى بايقادى" دەگەن سۇراققا جاۋاپ ىزدەدى. بۇل سۇراقتى كورگەن جەلى قولدانۋشىلارى وزدەرىنىڭ جۇرەك تەبىرەنتەرلىك وقيعالارىمەن ءبولىستى. اتالمىش وقيعالاردى Qamshy.kz اقپارات اگەنتتىگى وقىرمان نازارىنا ۇسىنادى. 

انامنىڭ داۋسىن ەستىدىم

— مەن ءبىر اپتا بويى كومادا جاتتىم. ءبىراق ماعان ءبىر اپتا مەن ءۇشىن ءبىر كۇندەي وتە شىقتى. كومادا جاتقان كەزدە مەن انامنىڭ داۋسىن ەستىپ، ونىمەن سويلەستىم. انام مەنىڭ بالالىق شاعىم تۋرالى، قانداي بۇزىقتىق جاساعانىمدى ايتىپ بەردى. انامنىڭ ءاربىر ءسوزى مەنىڭ جادىمدا جاتتالىپ قالدى. 

اناممەن قوشتاسىپ ۇلگەردىم

— انامنىڭ قالاي قايتىس بولعانىن سۇرايتىندار كوپ. انام 6 جىل بويى قاتەرلى ىسىكپەن كۇرەستى. ءبىر كۇنى تاڭعى 08:00-دە اكەم حابارلاستى. ول انامنىڭ قاتەرلى ىسىكپەن كۇرەسۋگە شاماسى جەتپەيتىنىن ايتتى. مەن 40 مينۋتتا جەتۋ كەرەك بولعان اۋرۋحاناعا 20 مينۋتتا قالاي جەتكەنىمدى بىلمەيمىن. ۇلگەردىم... ءبارىمىز اناممەن قوشتاسىپ ۇلگەردىك. انامنىڭ قاسىندا كەشكى 20:00-گە دەيىن وتىردىم. قيمادىم... 9 جىل بۇرىن بولعان وقيعا بولسا دا ءالى كۇنگە دەيىن جۇرەگىم اۋىرادى. 

♦ناركوزدان كەيىنگى ءومىردىڭ تىلسىم سىرلارى (جۋرناليستىك زەرتتەۋ)

كومادا جاتقان اكەم جىلاپ جىبەردى

— اكەم 2،5 جىل بويى قاتەرلى ىسىكپەن كۇرەستى. ءومىرىنىڭ سوڭىندا اكەم سويلەۋگە شاماسى كەلمەدى، ءتىپتى كوزىن اشا المادى. مەن ونىڭ قولىن قىسىپ ۇستاپ، قاتتى جاقسى كورەتىنىمدى ايتتىم. العاشىندا اكەم مەنى ەستىمەيدى دەپ ويلاعان ەدىم. الايدا مەن قالاي جاقسى كورەتىنىمدى ايتقان سوڭ اكەم جىلاپ جىبەردى. مەنى ەستىگەنىن تۇسىنگەن سوڭ اكەممەن قوشتاسىپ ۇلگەردىم. 

جاقسى پەرزەنت بولا الماعانىم ءۇشىن قاتتى وكىنەمىن

— انام 2007 جىلى و دۇنيەلىك بولدى. ولەر الدىندا بىرنەشە كۇن كومادا جاتتى. مەن ونىڭ قايتا ورالمايتىنىن سول كەزدە سەزگەن ەدىم. ول كومادا جاتقان كەزدە مەن كۇنى بويى اناممەن سويلەسەتىنمىن. وعان الەمدەگى ەڭ جاقسى انا بولعانىن ايتا بەردىم. سوڭعى دەمى تاۋسىلعانشا انامنىڭ قاسىندا بولدىم. ول مەنى ەستىدى دەپ ۇمىتتەنەمىن. قاتتى وكىنەمىن... سەبەبى مەن تىرىسىندە ءقادىرىن بىلمەدىم، جاقسى پەرزەنت بولا المادىم.

اۋدارعان: اسەل بولات قىزى