2018 جىلدىڭ 2 ناۋرىزىندا "اسىل ارنا" تەلەارناسىنىڭ ديرەكتورى مۇحامەدجان تازابەك تۇڭعىش قىزى ايشانى ۇزاتتى. ۇزاتۋ تويعا قازاقتىڭ بەلدى ايتىسكەر-اقىندارى، ءانشى-جىرشىلارى، قوعام بەلسەندىلەرى جينالدى.

تويدىڭ كۋاسى بولعان ءار ازامات جەلىدەگى پاراقشاسىندا سۋرەتتەرمەن ءارى ۆيدەولارمەن ءبولىسىپ جاتتى. ال "توي قالاي ءوتتى، مۇحامەدجان تازابەك قىزىن قالاي شىعارىپ سالدى؟" دەگەن ساۋالعا "شابدالى" ءفيلمىنىڭ رەجيسسەرى جاندوس قۇسايىننىڭ جازباسى جاۋاپ بولار دەگەن ويمەن Qamshy.kz اقپارات اگەنتتىگى اتالمىش جازبانى وقىرمان نازارىنا ۇسىنادى. جازبا مازمۇنى تومەندەگىدەي:

2 ناۋرىز ەڭبەك سىڭىرگەن قايراتكەر، اقىن مۇxامەدجان تازابەكتىڭ تۇڭعىشىنىڭ ۇزاتۋ تويى ءوتتى. توي - ۇلتتىق  ديپلوماتيانىڭ كورىنىس بەرەر ءساتى عوي. ءسۇيسىنۋ مەن سىن، كۇلۋ مەن جىلاۋ، قۋانۋ مەن جابىرقاۋ قاتار جۇرەدى. 
جالپى، تويعا كەلگەن جۇرتتىڭ باستى ەكى سىنى بار: "قىزى قانداي ەكەن؟” جانە "اكە-شەشەسى قالاي شىعارىپ سالار ەكەن؟".
كەشە قىز ۇزاتۋعا كەلگەن كوپتىڭ كوزىندە وسى سۇراق تۇردى. ال مۇxامەدجان اعا ايشانىڭ اماناتىن كۇيەۋ بالاعا تاپسىرار تۇستا ءسوز الدى. "قىزىمدى قالاي ءوسىردىم، قانداي تاربيە بەردىم؟ بۇل تۋرالى ايتا بەرۋگە بولار ەدى، ءبىراق ونىڭ جاۋابىن ىزدەگەن ادام قىزىمنىڭ بويىنان كورەدى. ءبىز شامامىز كەلگەنشە جاقسى كيىم كيىپ، تازا تاعام جەگىزىپ، قازاقى قىلىپ وسىرۋگە تىرىستىق. ال بۇدان بىلايعى ءومىرى ەندى كۇيەۋ بالانىڭ قولىندا" دەدى ول. سوسىن قاسىنداعى قوڭىر ساندىقتى اشىپ، ونداعى قىز جاساۋىنىڭ باستى-باستى دەگەندەرىن ءوزى كورسەتىپ، ونىڭ ماڭىزىن ءتۇسىندىردى. الدىمەن قۇران كىتاپتى شىعاردى. 
"بۇل قاسيەتتى قۇران. كەز كەلگەن وتباسىنىڭ تورىندە تۇرۋى كەرەك دەپ سانايمىز. مۇنىڭ ىشىندە ادامنىڭ ەكى دۇنيەدەگى باقىتقا جەتۋ جولى جازىلعان. بۇل كەشەگى ابايدىڭ، شاكارىمنىڭ، ءياسساۋيدىڭ باقىت تۋراسىنداعى سۇراقتارىنا جاۋاپ بەرگەن ىزگى كىتاپ. بۇل جاقسىلىققا جەتەلەيتىن نۇر. ەندەشە، ەكى بالاما وسى كىتاپتى سىيلايمىن" دەدى. سوسىن xاديستەر جيناعىن الدى.

"اللانىڭ ارداقتى پايعامبارىنىڭ ءومىرى - ادامزاتقا ۇلگى. قۇراندا ادام بالاسىنىڭ باقىتقا جەتۋى تۋرالى جازىلسا، مىنا ساxيx بۋxءاريدىڭ xاديستەر جيناعى سول باقىتقا جەتۋ جولدارىن ۇيرەتەدى. بۇل كىتاپ - ادام بالاسىنىڭ تەمىرقازىعى ىسپەتتى. ايىرىلماي ۇستاسا ءتۇبى شۋاقتى كۇندەرگە، باقىتتى ساتتەرگە تولى عۇمىر كەشەدى. جاس وتباسىعا سىيلاعىمىز كەلگەن جاساۋدىڭ باسىنداعى ەكىنشى كىتاپ وسى”. مۇxامەدجان اعا ەندى ساندىقتان ابايدىڭ ولەڭدەر جيناعىن الىپ كورسەتتى.
"ءبىز قازاقپىز. ءوز ۇلتىمىزدان شىققان نەبىر عۇلامالار بار. اباي - سونىڭ بىرىگەيى. ونىڭ وسى ءبىر ولەڭدەر توپتاماسىن ۇنەمى وقىپ ءجۇرسىن دەپ سىيلاپ وتىرمىز. قاي وتباسىدا قازاقىلىق سالتانات قۇرسا، سول وتباسىدا كەڭدىك پەن پاراساتتى قارىم-قاتىناس ورنايدى". 
وتىرعان جۇرت سىلتىدەي تىنىپ اكەنىڭ سوزدەرىنە ۇيىپ تىڭدادى.
"ءتورتىنشى كىتاپ - ەلباسىنىڭ ەڭبەگى جازىلعان كىتاپ. بۇل شىعارمانى دا جاس وتباسىنىڭ جاساۋىنىڭ باسى ەتىپ بەرىپ وتىرمىز. سەبەبى، قانداي قوعام باسشىسىن ءقادىر تۇتىپ، وعان باعىنسا، سول قوعامدا بەرەكە ورنايدى. ءبىزدىڭ باسشىمىز - نۇرسۇلتان ءابىش ۇلى نازاربايەۆ. ونىڭ وسىنشا جىلدار بويى مەملەكەت، ۇلت ءۇشىن ىستەگەن قىزمەتىن ءبىلىپ، وسكەلەڭ ۇرپاققا سىڭىرە ءجۇرۋىمىز كەرەك".

مۇxامەدجان ورازباي ۇلى قوڭىر ساندىقتان بەسىنشى كىتاپتى شىعاردى دا جىميىپ سويلەدى: "ايشا - اقىننىڭ قىزى. مەنىڭ وسىنشا جىل ەل الدىندا ءجۇرۋىم، xالىقتىڭ سۇيىسپەنشىلىگىنە بولەنۋىم، سوناۋ قونايەۆ اتامىزدان باستاپ، بۇگىنگى كۇنگە دەيىنگى ەل اعالارىنان العان باتا-تىلەكتەردىڭ بارىندە اقىندىعىمنىڭ ۇلەسى بار. حالىق مەنىڭ ايتىسكەرلىگىمدى ءقادىر تۇتتى، الاقانىندا ايالادى. ەندەشە، مىناۋ مەنىڭ جيىرما بەس جىل بويعى ءتۇرلى ساxنادا ايتقان ولەڭ شۋماقتارىم. وسىنى وقي جۇرىڭدەر. مۇندا سەندەردىڭ اكەلەرىڭ جايلى، ونىڭ قوعامداعى قانداي دا ءبىر قۇبىلىستارعا قاتىستى پىكىرى، كوزقاراسى بار".
قوڭىر ساندىقتاعى تاعى ءبىر زات ەت تاباق ەكەن. اقىن ادام ونى كورسەتىپ بىلاي دەدى، "قوناق كۇتۋ قازاقتىڭ جاقسى قاسيەتىنىڭ ءبىرى. قوناقجايلىققا ايتىپ ۇيرەتپەيدى، كورسەتىپ ۇيرەتەدى. قوناعىن سىيلاعان ادام جامان بولمايدى. ايشا ۇيدە بولعاندا قوناق كۇتۋدەن كەندە بولعان جوقپىز دەپ ويلايمىن. سوندىقتان الداعى بولاشاقتا سەندەردىڭ دە ۇيلەرىڭنەن قوناق ۇزىلمەسىن دەپ وسىنى سىيلاپ وتىرمىز"، دەدى ول، ۇلتتىق ويۋمەن ورنەكتەلگەن ەت تاباقتى كوتەرىپ تۇرىپ. ەڭ سوڭىندا التىن ينە مەن جىبەك ءجىپتى شىعاردى. ونىڭ دا سيمۆوليكالىق ءمانى بار ەكەن. "ايەل ادام بارعان جەرىندە ىسمەر بولۋى كەرەك. ول الدىمەن ءۇي شارۋاسىن دوڭگەلەتىپ، كوڭىرسىتىپ كۇلشەنىڭ ءيىسىن شىعارىپ، اس-اۋقاتىن دايىنداپ، كورپە-توسەگىن كوكتەپ وتىرعانى ءجون. 
كۇيەۋىنىڭ شالبارىنىڭ قىرى پىشاقتاي، جەيدەسىنىڭ جاعاسى اپپاق قارداي بولىپ، كۇتىمى كورىنىپ تۇرسا، ول وتباسىدا گارمونيا بار دەگەن ءسوز. ينە-جىپ كەلىنشەكتىڭ ىسكە بەكەمدىگىمەن قاتار، ۇيدەگى ۇيلەسىمنىڭ دە ءجىبىن تارقاتپاي ۇستاۋىنىڭ كورىنىسى" دەپ اياقتادى ءسوزىن الاشتىڭ ارداقتى اقىنى.
بۇل دۇنيەلەر جاساۋدان گورى اكەنىڭ اماناتى ءارى ءومىر بويى قاستەرلەپ وتەتىن قۇندى جادىگەرى ىسپەتتى كورىندى وزىمە. جالپى، كەشە كورگەنىم كورىكتى تويدىڭ ناعىز مىسالىنا جارار شارا بولدى. 
قىز ۇزاتۋ - اكە-شەشەنىڭ ەمتيxانى سەكىلدى عوي ءوزى. مۇxامەدجان اعانىڭ ءداستۇردى جاڭعىرتقان، قازاقى ديپلوماتياعا باي دۋمانى ءبىرازعا دەيىن كوپتىڭ كوڭىلىنەن وشپەيتىن شىعار. باستىسى، كوپتىڭ تىلەگى مەن اكەنىڭ اسىل سوزدەرى ەكى جاستىڭ جادىندا جاتتالىپ، الداعى ومىرلەرىنە باعدار بولسا ەكەن.

ۇسىنعان: گۇلىم جاقان