ۇلتتىق ەكزيت-پولل مالىمەتىنشە، ۋكرايناداعى پرەزيدەنت سايلاۋىنىڭ ەكىنشى اينالىمىندا ۆلاديمير زەلەنسكيي جەڭىسكە جەتتى.

"زەلەنسكييدە – 73،2 پايىز، پوروشەنكودا – 25،3 پايىز داۋىس جينالدى"، - دەپ مالىمدەدى يلكا كۋچەرييەۆ اتىنداعى "دەموكراتيالىق ينسياتيۆالار" قورىنىڭ ديرەكتورى يرينا بەكەشكينا بريفينگ بارىسىندا.

"112 ۋكراينا" تەلەارناسىندا جاريالانعان ەكزيت-پولل كورسەتكىشىنە سۇيەنسەك، زەلەنسكييدى ەلدىڭ شىعىس بولىگىنىڭ 88 پايىزى، پوروشەنكونى 12 پايىزى قولداعان. ال باتىستا زەلەنسكيي 56،4، پوروشەنكو 43،6 پايىز داۋىس جيناپتى. ۋكراينانىڭ ورتالىق ايماقتارىنىڭ حالقى 72،3 پايىز داۋىسىن زەلەنسكييگە بەرسە، پوروشەنكونىڭ قانجىعاسىندا 27،7 پايىز داۋىس. ەلدىڭ وڭتۇستىك وڭىرىنەن زەلەنسكيي 86 پايىز داۋىستى، ال پوروشەنكو 14 پايىز داۋىستى العان.

زەلەنسكيي ەكزيت-پولل كورسەتكىشتەرى تۋرالى ءسوز سويلەپ، ۋكراينا حالقىنىڭ سەنىمىن اقتاۋعا ۋادە بەردى.

"قۇرمەتتى، ۋكراينالىقتار! كەلەسى ايدا مەن پرەزيدەنت پوستىن بوساتامىن. ۋكراينالىقتاردىڭ باسىم بولىگى وسىلاي شەشىم قابىلداسا، مەن ونى تۇسىنۋگە تىرىسامىن"، - دەدى ءوز كەزەگىندە پەتر پوروشەنكو.

سايلاۋدىڭ ەكىنشى تۋرى جەكسەنبى كۇنى ءوتتى. وعان ۋكراينانىڭ قازىرگى پرەزيدەنتى پەتر پوروشەنكو مەن ءبىرىنشى تۋردىڭ كوشباسشىسى ۆولوديمير زەلەنسكيي قاتىستى.

ۋكراينانىڭ ءىىم مەن وسك مەكەمەلەرىنىڭ ايتۋىنشا، ازىرگە داۋىس ناتيجەسىنە اسەر ەتەرلىكتەي زاڭ بۇزۋشىلىقتار ورىن الماعان.

ۇسىنعان: ادىلەت مادەنيەت