ءبىر اپتاعا سوزىلعان ءدۇبىرلى دودانىڭ دا سوڭعى سايىسى اياقتالدى. كوكپاردىڭ توپتىق كەزەڭى بويىنشا ۇزدىك شىققان قوس كوماندا – قازاقستان مەن موڭعوليا كوكپارشىلارى فينالدىق كەزدەسۋدە ناعىز مىقتىنى انىقتادى دەپحابارلايدى BAQ.KZ.

ازيانىڭ ازۋلى كوشپەندىلەرىنىڭ ۇرپاقتارى اراسىندا وتكەن كەزدەسۋ تارتىسقا تولى بولدى. قازاقستان قۇراماسىنىڭ كاپيتانى، "كوكپار ويىنىنىڭ ۇلى ويىنشىسى" اتانىپ ۇلگەرگەن جاس بەرەن قۇرمانبەك تۇرعانبەكتىڭ جىگىتتەرى الاڭ قوجايىنى وزدەرى ەكەنىن بۇعان دەيىن دە دالەلدەگەن ەدى، فينالدا دا بارىن سالدى.

ال بۇعان دەيىن ازيا چەمپيوناتىندا اۋدارىسپاق بويىنشا 80+ كەلىدە چەمپيون اتانعان، تەڭگە ءىلۋدىڭ قولا جۇلدەسىن قانجىعاسىنا بايلاپ ۇلگەرگەن جەڭىسبەك سەرىك ۇلىنىڭ كومانداسى دا مىقتىلىعىن تانىتتى.

سونىمەن بايان-ولگييلىك باۋىرلارمەن وتكەن كەزدەسۋدىڭ العاشقى بولىگىندە قوس كوماندا ەسەپتى 2:1-گە جەتكىزدى.

كورەرمەننىڭ، اسىرەسە بۇكىلالەمدىك ەتنوسپورت كونفەدەراسياسىنىڭ ءىى حالىقارالىق فورۋمىنا كەلگەن شەتەلدىك قوناقتاردىڭ قانىن قىزدىرىپ، ناعىز كوشپەندىلىك رۋحتى سەزىندىرگەن ەكىنشى تايمدا ويىنشىلار ەسەپتى 8:3-كە جەتكىزدى. جەڭىس جەرلەستەرىمىزدىڭ تاقىمىندا تۋلادى. قازاقستان قۇراماسى ازيا چەمپيونى اتاندى.

وسىلاي ەلباسىنىڭ تىكەلەي تاپسىرماسىمەن جاريالانعان جاستار جىلى اياسىندا ق ر ۇلتتىق سپورت تۇرلەرى قاۋىمداستىعىنىڭ ۇيىمداستىرۋىمەن وتكەن جاستار اراسىنداعى تۇڭعىش ازيا چەمپيوناتىنىڭ كوكپار بويىنشا جەڭىمپازى قازاقستان قۇراماسى بولدى.