«پروگرەسس» پوليتەحنيكالىق كوللەدجىنىڭ ءبىلىم الۋشىلارى «الماتى قولونەر پالاتاسى» قوعامدىق قورىنىڭ قولداۋىمەن قالالىق قولونەر جارمەڭكەسىنە قاتىستى. جارمەڭكەدە مۇمكىندىگى شەكتەۋلى كوللەدج ءتالىم الۋشىلارى ءوز بۇيىمدارىن ۇسىندى: قولدان جاسالعان سابىن جانە تىگىن ونىمدەرى (بالالاردىڭ ۇلتتىق كيىمدەرى، توسەك-ورىن جابدىقتارى، سۇلگىلەر جانە ت.ب.).

نۋحرا سەيتجاپباروۆا، قولدان سابىن جاساۋ بويىنشا ءتالىم الۋشى: «مەن 3 توپتاعى مۇگەدەكپىن، ەستۋ جانە سويلەۋ مۇمكىندىگىنەن ايىرىلعانمىن، ءبىراق كوللەدجدە ءبىلىم الۋ ارقاسىندا مەن جانىما جاقىن ماماندىقتى يگەردىم. مەن قولدان سابىن جاسايمىن جانە مەن ءۇشىن بۇل تەك قولونەر عانا ەمەس، سونداي-اق بۇل - شىعارماشىلىق. «پروگرەسس» كوللەدجىنىڭ  ءبىلىم الۋشىسى اسحات اقكۋناشيەۆپەن تاندەمدە جۇمىس ىستەي وتىرىپ، ءبىز ءپىشىنى، ءتۇسى جانە فاكتۋراسى بويىنشا بىرەگەي بۇيىمدار جاساپ شىعارامىز. وسىلاي  ەڭبەك ەتىپ، ءبىر-بىرىمىزدى ءتۇسىنىپ، قولداۋدى ۇيرەندىك، ناتيجەسىندە وتباسىن قۇرىپ، وسى جارمەڭكەدە بۇگىن ۇسىنىلىپ وتىرعان بىرلەسكەن شىعارماشىلىقتى جالعاستىرۋدامىز».

شىرىن مارالبەكوۆا، تىگىن بۇيىمدارىن تىگۋ بويىنشا ءتالىم الۋشى: «مەن ناشار ەستيمىن، ءبىراق بۇل تىگىنشىلىكتى ۇيرەنۋگە كەدەرگى كەلتىرمەدى، مەن قوعامعا پايدا اكەلەتىنىمە  جانە وتباسىنىڭ جالپى تابىسىنا ۇلەس قوسا الاتىنىما وتە قۋانىشتىمىن. ءار ءتۇرلى ءىس-شارالارعا بەلسەندى قاتىسۋعا تىرىسامىن، ارينە، ءوز بۇيىمدارىمدى ءارتۇرلى جارمەڭكەلەردە كورگىم كەلەدى، سەبەبى مەنىڭ جۇمىستارىم اينالاداعىلار ءۇشىن قىزىقتى ەكەنىن بايقايمىن جانە بۇيىمدارىمدى ساتىپ العان كەزدە قۋانامىن».

ميگەروۆا ەلەنا، تىگىن بۇيىمدارىن تىگۋ بويىنشا ءتالىم الۋشى: «كەلەڭسىز جاعدايعا تاپ بولىپ، سالدارىنان 30 جاسىمدا اياعىمدى كەسۋگە ماجبۇرلىك تۋىندادى، مەن مۇگەدەك اتاندىم. بۇرىن مەن ساۋدا جۇمىس ىستەگەنمىن، ءقازىر مۇنداي كاسىپ مەن ءۇشىن ەمەس. «پروگرەسس» كوللەدجى ارقىلى ۇيدە وتىرىپ جۇمىس ىستەي الاتىن ماماندىق بويىنشا ءبىلىم الۋ مۇمكىندىگى پايدا بولدى. ءقازىر مەن كۋرستى ءساتتى اياقتاۋدامىن جانە العاشقى تاپسىرىستار دا بار. مۇگەدەكتەر پروبلەمالارىنا نەمقۇرايلى قارامايتىن جانە كومەك كورسەتەتىن بارلىق ادامدارعا ۇلكەن راحمەت ايتقىم كەلەدى، وقىتۋشىلارعا دا العىسىمىزدى بىلدىرەمىز».

«پروگرەسس» كوللەدجى الماتى وبلىسىنىڭ ىلە اۋدانىنداعى وتەگەن باتىر اۋىلىندا جۇمىس ىستەيدى جانە ستۋدەنتتەردى ءارتۇرلى ماماندىقتارعا وقىتادى، سونىمەن قاتار كوللەدج 18 جاستان اسقان ەرەسەك ادامدارعا، سونىڭ ىشىندە ەرەكشە قاجەتتىلىكتەرى بار ادامدارعا سۇرانىسقا يە كاسىپتەر بويىنشا ماماندىق الۋعا مۇمكىندىك بەرەدى.

«پروگرەسس» كوللەدجىنىڭ ديرەكتورى جاننا تەلپەكبايەۆانىڭ ايتۋىنشا، ەرەكشە قاجەتتىلىگى بار جانداردى وقىتۋدىڭ ماڭىزدى ەرەكشەلىگى بار - ءمۇعالىم مۇنداي ستۋدەنتتەرگە ەكى ەسە سۇيىسپەنشىلىكپەن قاراۋى كەرەك جانە شىنايى بولۋى شارت. سونداي-اق، كوللەدج ءوز تۇلەكتەرىنە بولاشاقتا جۇمىسقا ورنالاسۋعا نەمەسە ءوز ءىسىن ۇيىمداستىرۋعا كومەكتەسۋدى ماڭىزدى سانايدى.

جاننا تەلپەكبايەۆا، «پروگرەسس» كوللەدجىنىڭ ديرەكتورى: «الدىمەن ءبىز ولاردى ۇلكەن كاسىپورىندارعا، تىگىن فابريكالارىنا ورنالاستىردىق، ءبىراق جۇمىس قارقىنى، جوسپارى، بارلىق جاعداي ولارعا تەرىس اسەر ەتتى، تيىسىنشە ولار الاڭدادى، ۋايىمدادى جانە ەشتەڭە شىقپاعان سوڭ، ولار وزدەرى جۇمىستان ءوز ەركىمەن كەتە باستادى. سول شاقتا ءبىز اۋىلىمىزداعى، الماتىداعى كيىم-كەشەك جوندەۋدىڭ شەبەرحانالارى بار ساۋدا ورتالىقتارىن ارالىپ كوردىك، ولار سوندا جۇمىسقا ورنالاسىپ جاتتى. ءوز ءىسىن اشقىسى كەلەتىندەرگە ءبىز ۇيدە ءوز بيزنەسىن دامىتۋعا كومەكتەسەمىز. ءار ادامعا جەكە قاراۋ ورىندى، ءالسىز ەمەس، ادامنىڭ باسىم قاسيەتتەرىنە زەر سالىپ، ولاردى دامىتۋ كەرەك. ءبىز «فيليپ مورريس قازاقستان» كومپانياسىنا وتە ريزامىز، ولارمەن بىرگە ءبىز كوپتەگەن جىلدار بويى ەرەكشە قاجەتتىلىكتەرى بار ادامدارعا ءوز ومىرلەرىن جاقسارتۋعا كومەكتەسەتىن جانە ولاردىڭ ءوسۋى مەن دامۋى ءۇشىن جاڭا مۇمكىندىكتەر سىيلايتىن وسى جوبانى تابىستى جۇزەگە اسىرۋدامىز».