وقۋ جىلىنىڭ اياقتالۋىمەن بىرگە وقۋشىلاردىڭ جازعى دەمالىسىن ءتيىمدى ۇيىمداستىرۋ ماسەلەسى دە العا شىعادى. ەلىمىزدە بالالاردىڭ جازعى دەمالىس ۋاقىتىن ءتيىمدى ۇيىم­داستىرۋ ماقساتىندا مەكتەپتەر جانىنان لاگەرلەر اشىلىپ، جەرگىلىكتى اتقارۋشى بيلىك وكىلدەرى جاقىن ماڭداعى دەمالىس ورىندارىنان بالالارعا جولداما دا ۇسىنىپ جاتادى. الايدا، بۇل باستامالار ەلىمىزدەگى بارلىق بالالاردى قامتيدى دەپ ايتۋ قيىن. مىنەكەي وقۋشىلار دا، اتا-انالاردا، ءتىپتى مۇعالىمدەر دە اسىعا كۇتكەن بيىلعى جازعى دەمالىسقا جەتتىك دەسەك بولادى. جىل بويى ۋاقىتىنىڭ كوبى پارتادا وتىرىپ وقىپ-جازۋعا كەتكەن وقۋشى، دەمالىسىن اسىعا كۇتەدى. بۇل – تابيعي نارسە. بالالاردىڭ جازعى تىنىعۋ لاگەرلەرى ءار ءتۇرلى بولعانمەن ولاردىڭ ماقساتى مەن مىندەتتەرى بىردەي: بالالاردى تىنىقتىرۋ، قىزىقتىرۋ، دەنساۋلىعىن نىعايتۋ، ءبىلىمىن كەڭەيتۋ، تاربيەلەۋ. وسى ماقسات، مىندەتتەردى ورىنداۋ ءۇشىن ءتۇرلى جۇمىستاردى ۇيىمداستىرادى. ول جۇمىستاردىڭ نەگىزى بولىپ ءارقاشان ءتۇرلى ويىندار قالا بەرەدى. بيىل وڭتۇستىك قازاقستانداعى 24 جازعى ساۋىقتىرۋ لاگەرىندە 50 مىڭعا جۋىق بالا دەمالماق دەيدى، بۇگىنگى بريفينگتە وبلىستىق ءبىلىم، جاستار ساياساتى جانە تىلدەردى دامىتۋ باسقارماسىنىڭ باسشىسى ا.ەلشييەۆا. سونداي-اق، 6500 بالا وزگە وڭىرلەر مەن شەت ەلدەردەگى لاگەرلەرگە بارادى. وڭىردە جازعى لاگەرلەر ماۋسىم ايىنىڭ بەسىنەن باستاپ جۇمىسىن باستايدى. وسى دەمالىس ورىندارىنا وبلىستان الەۋمەتتىك تۇرمىسى تومەن، جەتىم جانە جارتىلاي جەتىم ون مىڭعا جۋىق ءبۇلدىرشىن جاز ايىندا لاگەرلەرگە تەگىن جىبەرلەدى. سونىمەن قاتار، قالا ىشىندەگى وقۋشىلار سارايىنىڭ جانىنداعى «بالداۋرەن» لاگەرى 600 بالانى تەگىن قابىلدايدى. وندا كەلگەن بالالار ءتۇرلى ۇيىرمەلەرگە قاتىسىپ، تاريحي ورىندارعا ساياحات جاسايدى.