«ۇلار شىڭ» بالاباقشاسىنىڭ «سۇڭقار» توبىنىڭ بۇلدىرشىندەرى اراسىندا قىز بايقاۋى ءوتتى. كونكۋرسقا 9 سايىسكەر قاتىسىپ، 7 تۋر بويىنشا باقتارىن سىنادى. «ۇلار شىڭ ارۋى 2015» بايقاۋىندا بۇلدىرشىندە ءبىرىنشى ءوزىن – ءوزى تانىستىرسا، «زەردەلىنىڭ ويى وزىق» كەزەڭىندە سۇراقتارعا جاۋاپ بەردى. «شەبەر قولدار» سايىسىندا كىشكەنتاي ارۋلار قاعازدان ويۋ ويىپ، ونى قۇراستىرىپ، كوپشىلىكتىڭ نازارىنا ۇسىندى. ءان ايتىپ، بي بيلەپ، تاقپاق ايتقان بۇلدىرشىندەرىمىز «ءوز ونەرى» تۋرىنان سۇرىنبەي ءوتتى. «قول ونەر» سايىسىندا انالارىمەن بىرگە جاساعان ۇلتتىق ناقىشتاعى كيىز ءۇي، سىرماق ويىپ ارۋلارىمىز ىسكەرلىگىن، شەبەرلىگىن كورسەتە ءبىلدى. بۇلدىرشىندەر «قوناقجايلىلىق اتا ءداستۇرىمىز» كەزەڭىندە ۇيدەن جاساپ كەلگەن اس مازىرلەرىن كورسەتىپ، ونىڭ دايىندالۋ ءتاسىلىن ءتۇسىندىرىپ بەردى. ساحنا مادەنيەتىنە ماشىقتانعان قىزدارىمىز ءسان ۇلگىلەرىن كورسەتىپ، «قىزدارعا اسەمدىك جاراسىندا» سايىسىندا ولار ءوز اسەمدىكتەرىمەن، تارتىمدىقتارىمەن، سۇلۋلىقتارىمەن ەل نازارىن وزىنە باۋراپ الدى. بايقاۋدا قاتىسۋشى قىزداردان بولەك «توماشا»، «توتى»، «بۇلبۇل»، «لاشىن»، «سۇڭقار» توبىنىڭ سابيلەرى ءان ايتىپ، بي بيلەپ، مەرەكەلىك كونسەرتتىڭ جوعارى دەڭگەيدە وتۋىنە اتسالىستى. كونكۋرس بولعان سوڭ، ونىڭ جەڭىمپازدارى انىقتالۋى ءتيىس. «ۇلار شىڭ ارۋى» بايقاۋىنىڭ ناتيجەسى بويىنشا باس جۇلدەنى زەرە جاپپاروۆا، ءبىرىنشى ورىندى ارۋجان ءابىلقاسىم، ەكىنشى ورىندى داريا داۋرەن قىزى، ءۇشىنشى ورىندى ارۋانا قادىرحان جەڭىپ السا، ميلانا زايسيەۆا – «ونەرلى قىز»، ۇلزيا عالىمجان –«كورەرمەن كوزايىمى»، كاماليا پەرنەباي – «شەبەر قىز»، نازمينا حابيبۋللا قىزى – «مىڭ بۇرالعان ءبيشى»، ارينا سيدەلنيكوۆا – «كورىكتى قىز» نوميناسيالارىنىڭ يەگەرى اتاندى. بارلىق كىشكەنتاي ارۋلارىمىزعا ديپلومدار مەن سىيلىقتار تابىس ەتتى.

«لەنگەر جارشىسى»