بالالاردىڭ دەمالىسىن ۇيىمداستىرۋ قاشاندا ماڭىزدى ماسەلەنىڭ ءبىرى بولىپ سانالادى. جىل سايىن دەمالىس ۋاقىتىنداعى بالالار مەن جاسوسپىرىمدەردىڭ تولىق دەمالۋلارىنا، تانىپ ءبىلۋ، شىعارماشىلىق جانە قوعامشىلدىق بەلسەندىلىگىن ارتتىرۋعا، بالالاردىڭ ءوزىن - ءوزى ۇيىمداستىرۋ قابىلەتتەرىن دامۋعا، عىلىمي، تەحنيكالىق، كوركەم شىعارماشىلىق، سپورت، ساياحات پەن ولكەتانۋ جانە باسقا دا تانىمدىق قىزمەت تۇرلەرىندەگى ءبىلىم مەن ىسكەرلىكتەرىن ارتتىرۋعا جاعداي جاساۋ ماقساتىندا وقۋشىلار ءۇشىن جازعى ساۋىقتىرۋ اۋىسىمدارى اشىلادى. جازعى كانيكۋل بالالاردىڭ جىلدىق بوس ۋاقىتىنىڭ ايتارلىقتاي بولىگىن الادى. ول مەكتەپتەگى ساباقتان گورى بالانىڭ ەركىندىككە، ءوزى ءۇشىن قىزىقتى ىستەردى جاساۋ جانە ءوز مۇددەلەرىنىڭ ەركىن دامۋى ءۇشىن قاجەتتىلىكتەرىن جۇزەگە اسىراتىن كەزەڭ. سوندىقتان جاز-بالالاردىڭ شىعارماشىلىق الەۋەتىن دامىتۋعا، ولاردىڭ جەكە باسىنا ءتان بايلانىستارىن جەتىلدىرۋ، الەۋمەتتىك جانە مادەني ءبىلىم بەرۋ قۇندىلىقتارىنا ارالاسۋ، الەۋمەتتىك بايلانىستار جۇيەسىنە قوسىلۋ، ءوز جوسپارلارىن ءىس جۇزىنە اسىرۋ، جەكە باس مۇددەلەرىن قاناعاتتاندىرۋ، ويىن-ساۋىق، بويىندا جينالىپ قالعان شيەلەنىستەن ارىلۋ، جۇمسالعان كۇشىنىڭ ورنىن تولتىرۋ، دەنساۋلىعىن نىعايتۋ كەزەڭى. جاز بالالارعا ءوزىنىڭ سان ءتۇرلى تالانتىن اشىپ كورسەتۋگە مۇمكىندىك بەرەدى.بۇل كەزەڭدى جەكە باسىنىڭ جاقسى جاقتارىن اشىپ كورسەتۋگە جاعداي جاساۋعا، بالالار اراسىندا رۋحاني جانە ەموسيالىق قۇندىلىقتارىن الماسۋعا، جەكە باسىنىڭ مۇددەلەرىن جۇزەگە اسىرۋ ءۇشىن پايدالانۋ كەرەك. جازعى ماۋسىمدا ماقتارال اۋدانى اكىمىنىڭ باستاماسىمەن «تولاعاي» جانە «ەركەجان» اتتى ەكى ساۋىقتىرۋ لاگەرلەرى اشىلادى. جۇمىسىن 6 ماۋسىم كۇنى باستايتىن بۇل لاگەردە ماۋسىمىنا بەس مىڭعا جۋىق بالانى دەمالدىرۋ جوسپارلانۋدا. جازعى بالالاردى ساۋىقتىرۋ لاگەرلەرىنە الەۋمەتتىك از قامتاماسىز ەتىلگەن جانە كوپ بالالى وتباسى بالالارى مەن جەتىم، جارتىلاي جەتىم بالالاردى قامتۋ ماقساتىندا جالپىعا مىندەتتى ءبىلىم بەرۋ قورىنان بيۋدجەتتەن 15 ملن. بولىنسە، ءبىلىم بەرۋ قىزمەتكەرلەرىنىڭ كاسىبوداعىنان 15 ميلليون، اۋدان بيۋدجەتىنەن قوسىمشا 20 ميلليون تەڭگە كولەمىندە قارجى قارالدى. اتالعان لاگەرلەر 7 ماۋسىمنان تۇرادى. ءاربىر ماۋسىم 10 كۇندى قۇرايدى. مۇندا اۋدانىمىزداعى 4-10-شى سىنىپ ارالىعىنداعى وقۋشىلار دەمالماق. جاسوسپىرىمدەرگە تاڭعى جاتتىعۋ، ءتۇرلى ساۋىقتىرۋ ويىندارى مەن قول ونەر ۇيىرمەلەرى، مادەني جانە سپورتتىق باعدارلامالار وتكىزىلىپ، ءتورت مەزگىل تاماق بەرىلەدى. مۇنداعى «تولاعاي» لاگەرى 250، «ەركەجان» لاگەرى ءبىر ماۋسىمدا 100 بالا قابىلداي الادى.