تولەسوۆانىڭ سوزىنشە، ولاردى بوساتۋ تۋرالى شەشىمدى تۇرمە اكىمشىلىگى 5 مامىردا جۇرگىزىلگەن مەديسينالىق تەكسەرۋدەن سوڭ قابىلداعان.

— بەيبارىستىڭ قان قىسىمى جوعارى بولعان ەكەن. مەنىڭ دە دەنساۋلىعىمنىڭ السىرەگەنى انىقتالدى. مۇنان سوڭ تۇرمە اكىمشىلىگى ءبىزدى بوساتاتىندارىن حابارلادى. سالماق تاستادىم. ءبىراق ءقازىر ءحالىم جاقسى، - دەدى ول.

تولەسوۆانىڭ اناسى جانار جاندوسوۆانىڭ ايتۋىنشا، 5 مامىردا كەشكى ساعات 19.30-دا ءاسيا تۇرمەدەن تەلەفون شالىپ، وزدەرىن بوساتىپ جاتقانىن ايتقان. ەكى بەلسەندىنى ۇيگە تۇرمە قىزمەتكەرلەرى اكەلگەن.

— ءاسيا مەن بەيبارىسقا كەسىلگەن 15 تاۋلىك جازا مەرزىمى 6 مامىردا 9.00-دە اياقتالۋى كەرەك ەدى. تۇرمە اكىمشىلىگى ەرتەڭ جۇرت جينالادى دەپ قورىقسا كەرەك. ەكەۋى دە سەرگەك وتىر، جاعدايلارى جاقسى، - دەدى ول.

21 ساۋىردە الماتىدا مارافون كەزىندە "شىندىقتان قاشىپ قۇتىلمايسىڭ" دەگەن جازۋى بار باننەر ىلگەنى ءۇشىن ەكى بەلسەندىنى - 34 جاستاعى ءاسيا تولەسوۆا مەن 20 جاستاعى بەيبارىس تولىمبەكوۆتى سوت 15 تاۋلىككە قاماعان ەدى.

ءساۋىر ايىنىڭ اياعىندا الەمنىڭ تۇكپىر-تۇكپىرىندە وقىپ جاتقان قازاقستان ستۋدەنتتەرى چەحيا، فرانسيا، ۇلىبريتانيا مەن ۆەنگرياداعى قازاقستان ەلشىلىكتەرى الدىندا قامالعان بەلسەندىلەردى قولداۋ اكسياسىن وتكىزدى. مۇنداي قولداۋ شارالارى كانادا، يتاليادا، رەسەي، اقش-دا ءوتتى.

حالىقارالىق قۇقىق قورعاۋ ۇيىمدارى - Freedom House، Amnesty International جانە بۇۇ-نىڭ ادام قۇقىعى بويىنشا ورتالىق ازياداعى كەڭسەسى قازاقستان بيلىگىن ءاسيا تولەسوۆا مەن بەيبارىس تولىمبەكوۆتى بوساتۋعا شاقىرعان.

ۇسىنعان: اسەل بولات قىزى