شىمكەنتتە ينكليۋزيۆتى ءبىلىم جۇيەسىنىڭ ناتيجەسىندە مۇمكىندىگى شەكتەۋلى مىڭنان اسا بالا ءبىلىم الۋدا. سونىڭ ءبىر مىسالى — №39 مەكتەپ جانىنان اشىلعان ءبىر عانا لوگوپەدتتىك پۋنكتە تىلىندە مۇكىستىگى بار 59 بالا سويلەۋ قابىلەتىن ارتتىرىپ ءجۇر. دەنساۋلىعىندا احاۋى بار بالالار ءۇشىن مۇندا ارنايى 12 كلاسس جۇمىس ىستەيدى.
سونداي بالالاردىڭ ءبىرى — دارىن سەيىلحاننىڭ تۋماسىنان تىلىندە مۇكىستىك بار. ون جاسار بالانىڭ مەكتەپ جانىنان اشىلعان لوگوپەدتىك ورتالىققا كەلگەلى بەرى سويلەۋ قابىلەتى ءبىرشاما جاقساردى دەيدى مۇعالىمدەرى. وڭ ناتيجە بارىن سەزىنگەن ونىڭ اتا-اناسى اپتاسىنا ءۇش رەت اكەلىپ، مەكتەپ باعدارلاماسىنا سايكەس ءبىلىم الۋىن قولداپتى.
№ 39 مەكتەپ جانىنان اشىلعان لوگوپەدتىك پۋنكتە 103 بالا ءدارىس الادى. ولارعا دەفەكتولوگ، پسيحولوگ، لوگوپەد قىزمەت ەتەدى. ءار بالانىڭ دياگنوزىنا جانە جاس ەرەكشەلىگىنە بايلانىستى توپتىق ساباقتارمەن قاتار مۇعالىمدەر جەكە تۇردە دە ءبىلىم بەرۋدە. ءدارىس بارىسىندا پاندەگى ءبىر تاقىرىپتىڭ ءوزى كەمىندە تورت-بەس رەت قايتالانىپ وتىرادى. بۇل — ينكليۋزيۆتى ءبىلىم جۇيەسىندەگى ەڭ باستى ەرەكشەلىك. شىمكەنت قالاسى بويىنشا مەكتەپ جانىنان اشىلعان مۇنداي 37 لوگوپەدتىك پۋنكت جۇمىس ىستەيدى. مۇندا ءجۇرۋ مەن سويلەۋ كەمىستىگى بار بالالار ارنايى جولداما ارقىلى كەلەدى. دەگەنمەن، جىلدان جىلعا مۇمكىندىگى شەكتەۋلى بالالاردىڭ سانى ارتۋىنا بايلانىستى قالاداعى كەيبىر شاعىن اۋداندار لوگوپەدتتىك پۋنكتىڭ قىزمەتىنە ءزارۋ.
ىنتىماق مادييەۆ، شىمكەنت قالالىق ءبىلىم ءبولىمىنىڭ باسشىسى: «ءبىز بۇل ماسەلە بويىنشا ءالى دە زەردەلەۋ جۇمىستارىن جۇرگىزىپ جاتىرمىز. سوعان بايلانىستى تىلىندە مۇكىسى بار بالالار قاي جەردە كوپ شوعىرلانسا، سول جەردە وسىنداي ورتالىقتار اشامىز.»
وسىلايشا ءبىلىم سالاسىنىڭ ماماندارى جىلدىڭ سوڭىنا دەيىن لوگوپەدتىك پۋنكتەردىڭ قاتارىن كوبەيتەمىز دەپ وتىر.
