وڭتۇستىكتەگى 63 مىڭنان استام كوپبالالى اناعا قۇرمەت كورسەتىلدى. بۇل تۋرالى اكىمدىكتىڭ باسپا ءسوز قىزمەتى حابارلايدى.
— مەملەكەت باسشىسى ايەلدەردىڭ قوعامدا الاتىن ورنىن باعامداپ، «ايەل قۋانىشى – ءۇيدىڭ، وتباسىنىڭ، وتاننىڭ مەرەيى» دەگەن بولاتىن. بۇگىندە نازىك جاندى ارۋلار قوعامنىڭ ءتۇرلى سالالارىندا جەمىستى جۇمىس جاساۋدا، — دەدى ءوزىنىڭ قۇتتىقتاۋ سوزىندە اسقار يسابەك ۇلى. — قازاق ايەلدى وتباسىنىڭ ىرىسى، ۇيىتقىسى دەپ ۇعىنعان. حالقىمىزدىڭ تاتۋلىعىن، اعايىننىڭ بىرلىگىن، شاڭىراقتىڭ بەرەكەسىن ۇستاۋشى دا انا. ومىرگە ۇرپاق اكەلىپ، تىرشىلىككە تىرەك بولعان قاجىر-قايراتتارى ءۇشىن ءبىز ارداقتى انا مەن اسىل جارعا، اياۋلى نازىك جاندارعا ءاردايىم قۇرمەتپەن قارايمىز. كوكتەمنىڭ جۇپار ءيىسى مەن شۋاعىن الا كەلگەن مەرەكە بارشاڭىزعا باقىت سىيلاسىن. دەندەرىڭىزگە ساۋلىق، وتباسىلارىڭىزعا اماندىق تىلەيمىز!
2014 جىلعى ستاتيستيكالىق دەرەكتەر بويىنشا وبلىستا حالىق سانى 2 ملن. 780 مىڭ ادامدى قۇراسا، ونىڭ 1 ملن. 400 مىڭدايى ايەلدەر ەكەن.
سولاردىڭ ىشىندە مادەنيەت سالاسىندا ەڭبەك ەتەتىندەردىڭ جارتىسىنان استامىن، ۇلاعاتتى ۇستازداردىڭ — 75، ال مەديسينا ماماندارىنىڭ 87 پايىزىن نازىك جاندىلار قۇرايدى. شاعىن جانە ورتا كاسىپكەرلىك سالاسىندا دا كاسىپتىڭ كوزىن تاپقان ارۋلار دا جەتەرلىك.
سونىمەن قاتار وڭىردە 152358 كوپ بالالى ايەل بولسا، 30046 انا — «التىن القا» يەگەرى، 38824 انا «كۇمىس القا» العان. ال 8174 ايەل ءبىرىنشى جانە ەكىنشى دارەجەلى «انا داڭقى» وردەنىنىڭ يەگەرى اتانىپ وتىر. 75314 انانىڭ 4 جاستان 18-گە دەيىنگى بالا تاربيەلەپ وتىر. دەرەككوز: وقو اكىمى اپپاراتىنىڭ باسپا ءسوز قىزمەتى
