شىمكەنتتىك بۇلدىرشىندەر ءۇشىن ارنايى ءتىس ەمحاناسى بار. بالدىرعاندار ەندى ءتىسىن ەمدەتۋگە ەرەسەكتەرمەن بىرگە كەزەكتە تۇرماسا دا بولادى. قالادا العاشقى رەت مامانداندىرىلعان بالالار ءتىس ەمحاناسى اشىلىپ وتىر. «بەبي سمايل» اتتى مەديسينالىق مەكەمەنىڭ ەرەكشەلىگى — بالالاردى ويناتا وتىرىپ ەمدەيدى. بۇل ءۇشىن ەمحانانىڭ جابدىقتالۋى، اۋرۋدى ەمدەيتىن قۇرىلعىلاردىڭ بارلىعى ارنايى دايىندالعان.

جاڭادان اشىلعان نىسان ءبىر قاراعاندا ەمحاناعا ەمەس، بالاباقشاعا ۇقسايدى. ويتكەنى مەديسينالىق مەكەمەنىڭ جابدىقتالۋى بالالارعا جاقسى كوڭىل-كۇي سىيلاۋ ءۇشىن ەرەكشە ەتىپ جاسالعان. مۇنداعى ءتۇرلى ويىنشىقتار، قابىرعاعا سالىعان سۋرەتتەر ەرتەگىدەن سىر شەرتەدى. جاسىراتىنى جوق، ەرەسەكتەرگە قاراعاندا بالالاردىڭ ءتىسىن ەمدەۋ قيىن. بۇل تۇستا ءتىس اۋرۋىنىڭ كۇردەلىلىگى ەمەس، بۇلدىرشىندەردىڭ دارىگەرلەردەن قاتتى قورقۋى قيىندىق تۋدىرىپ جاتادى. ەندى مۇنىڭ بارلىعى ارتتا قالدى دەيدى ماماندار.

قالا تۇرعىندارىنىڭ ءبىرى ليۋدميلا ساي كوپ ۋاقىتتان بەرى بالاسىنىڭ ءتىسىن ەمدەتۋ ءۇشىن ارنايى مامانداندىرىلعان ەمحانا ىزدەگەن. ەندى وسى جاڭادان اشىلعان مەديسينالىق مەكەمەدەگى قىزمەت ارقىلى ەكى بىردەي ۇلىنىڭ ءتىسىن ەمدەتپەك. جاس انا مۇنداعى قىزمەتتىڭ ساپاسى دا، باعاسى دا كوڭىلىمنەن شىعادى دەيدى. ەمحانادا ءۇش دارىگەرلىك كابينەت جۇمىس ىستەيدى. مۇندا ون التى جاسقا دەيىن جەتكىنشەكتەردىڭ ءتىسىن ەمدەۋگە بولادى. مەديسينالىق مەكەمەدە زامانۋي ۇلگىدەگى، ەۆروپادان اكەلىنگەن مەديسينالىق قۇرىلعىلار تولىق زالاسىزداندىرىلادى. ەڭ باستىسى — دارىگەرلەر بالالاردىڭ ءتىسىن ەمدەۋ ءۇشىن ءبىرىنشى كەزەكتە پسيحولوگيالىق كومەك كورسەتەدى.

ايتا كەتەتىن جايت، مۇندا دارىگەرلەر بالالارعا ادەتتەگىدەي اق حالاتتا ەمەس، ءتۇرلى-تۇستى كيىمدە قىزمەت كورسەتەدى. ەمحانادا ءتىسىن ەمدەتكەن ءار بالاعا سىيلىق تا بەرىلەدى. نازار اۋدارىڭىزدار! «بەبي سمايل» بالالار ءتىس ەمحاناسىندا ناۋرىزدان باستاپ ءبىر اي بويى تەگىن پروفيلاكتيكالىق تەكسەرۋدەن وتۋگە مۇمكىندىك بار. ەڭ باستىسى — مەديسينالىق مەكەمە دەمالىسسىز جۇمىس ىستەيدى. مەكەنجايى: تەمىرلان تاسجولى، 1 ا/6. «بايان سۇلۋ» ساۋدا ءۇيىنىڭ ماڭىندا.