قازاق ءاۋ باستان «كوش كيەسى» دەگەن ۇعىمعا بيىكتەن قاراعان. ارعىنى ايتپاعاندا، وسى تاۋەلسىزدىكتەن بەرى قازاق كوشىنە قارسى شىققانداردىڭ وڭعانى جوق! نە كوشى-قون كوميتەتىنىڭ بۇرىنعى ءتوراعاسى قابىلسايات ابىشيەۆتىڭ كەبىن كيىپ كەلەڭسىز كۇيگە تۇسەدى، نە اقىرىن باسقا قىزمەتكە اۋىسىپ «قۇتىلادى». ەستەرىڭىزدە بولسا، كۇنى كەشە عانا «قامشى» پورتالىندا تالقىلانىپ جاتقان «كوشى-قون ماسەلەسى» تۋرالى «كوشى-قون زاڭى تۋرالى كەزەكتى تالقى: ەلباسى تاپسىردى، دەپۋتاتتار قولدادى، ۇكىمەت نەگە قارسى؟» اتتى اۋىت مۇقيبەكتىڭ ماقالاسى جارىق كورگەن بولاتىن. وندا پرەزيدەنت تاپسىرماسىن ۇكىمەتتە جاسالىپ، ماجىلىستە تالقىلانىپ جاتقان "حالىقتىڭ كوشى-قونى تۋرالى" زاڭ جوباسىنا دەپۋتاتتار تاراپىنان ايتىلعان وڭ ۇسىنىستارعا داۋلەت ارعىندىقوۆتىڭ تىس-تىرناعىمەن قارسى شىققانى ايتىلعان بولاتىن..
مىنە، ارادا ەكى كۇن وتكەندە، قازاق كوشىنىڭ كولىكتى بولۋىنا قۇلىق تانىتپاعان سول شەنەۋنىك قازمەتىنەن بوسادى. ارعىندىقوۆتىڭ الماسۋى دا مەملەكەتتىك ءتىلدى بىلمەي مەملەكەتتىك قىزمەت اتقارۋدىڭ «قيىندىعىن»، قازاق ءتىلىن بىلمەي «قازاق كوشىنىڭ» تىزگىنىن ۇستاۋدىڭ مۇمكىن ەمەستىگىن بىلدىرسە كەرەك.
داۋلەت ارعىندىقوۆتىڭ ورنىنا ءبىرجان بيدايبەك ۇلى نۇرىمبەتوۆ تاعايىندالدى. بۇل تۋرالى «قامشى» پورتالى حابارلايدى. ەندىگى ءۇمىت جاڭا باسشى – ءبىرجان بيدايبەكۇلىندا. نۇرىمبەتوۆ مىرزا ەلباسى ءوزى باستاعان، ناتيجەسى قازاق تاريحىنا التىن ارىپپەن جازىلاتىن «قازاق كوشىنىڭ» ءبىر بۇيداسىن ۇستادى. ىسكە ءسات!!! ءبىرجان مىرزانىڭ قىزمەتى «ارعىندىقوۆتىڭ اقىرى» ەمەس، «الاشتىڭ باتىرى» دەگەن اتقا لايىق بولعاي...
نۇرگەلدى ءابدىعاني ۇلى
