كوپشىلىككە "رەكەتير" ءفيلمى ارقىلى تانىس اكتەر مۇرات بيسەمبين تاياۋ ۋاقىتتا ارىقتاۋىنىڭ قۇپياسىن اشپاقشى. ونەرپاز جەلىگە ءوزىنىڭ ەكى سۋرەتىن سالدى. بىرىندە ونىڭ سالماعى 158 كەلى دە، ال ەكىنشىسىندە 95 كەلى تارتاتىن كەزى تۇسىرىلگەن. "مەنىڭ ترانسفورماسيام. سول جاقتا 158 كەلى، وڭ جاقتا 95 كەلى. ءوز كەزىندە كوپ ەڭبەك ەتتىم. تاياۋ ارادا قالاعان ادامدارعا كەڭەس ايتۋدى جوسپارلاپ وتىرمىن"، - دەپ جازدى اكتەر. سونىمەن قاتار، اكتەردىڭ ايتۋىنشا، مۇنداي ناتيجەگە ول ەكى جىل ىشىندە قول جەتكىزىپتى. ول سالاۋاتتى ءومىر سالتىن ۇستانۋعا قاتىستى قازاق جانە ورىس تىلدەرىندە اقىل-كەڭەستەردى دايىنداپ جاتقانىن مالىمدەدى. ونىڭ ايتۋىنشا، قازاق تىلىندە سويلەيتىندەر ءۇشىن مۇنداي مالىمەت وتە از. "مەنىڭشە، قازاق تىلىندە دەنساۋلىقتى كۇتۋگە بايلانىستى مالىمەتتەر وتە از. بۇل دۇرىس ەمەس"، - دەدى اكتەر. "ال كونسۋلتاسيالارعا كەلەتىن بولساق، ولاردى ءبىر جۇيەگە كەلتىرىپ، ولاردى اقىلى ەتكىم كەلەدى، ءبىراق بۇل كەڭەستەر قىمبات بولمايدى، - دەيدى اكتەر. - ايتپەسە بۇل جۇمىستار كوپ ۋاقىتتى تالاپ ەتەدى. ونىڭ تولەم جولدارىن ويلاستىرۋ كەرەك. كليەنتتەر ءۇشىن ىڭعايلى بولاتىن جولدارىن قاراستىرامىن".