شىعىس تۇركىستاننان ۇشاق ارقىلى  ىستامبۇلعا كەلگەن  ۇيعىر تۇرىكتەرىنىڭ «ەڭبەك يمميگرانتى» اتىن جامىلىپ، سيرياداعى يشيم  سودىرلارى ساپىنا قوسىلماق بولعاندىعى اشكەرەلەندى. بۇل تۋرالى تۇركياداعى www.jurnalhaber.com باسىلىمىندا تولگا شاردان ەسىمدى ءجۋرناليستتىڭ «ۇيعىرلارعا تۇزاق» اتتى ماقالاسىندا جازعان.

تۇركيا قۇقىق قورعاۋ قىزمەتكەرلەرى قاڭتار ايىنان بەرى جۇرگىزىلگەن ارنايى وپەراسياسى بارىسىندا سيرياعا زاڭسىز وتپەك بولعان 400 ۇيعىر ازاماتىن قۇرىقتاعان.

تۇركيالىق جۋرناليست تولگا شارداننىڭ «MİLLİYET» گازەتىندە جاريالانعان ماقالاسىندا، «شىعىس تۇركىستاندىق ۇيعىر  ازاماتتارىن ارنايى  سوعىس تاكتيكالارىنا ماشىقتاندىرىپ، تۇركيا تەرريتورياسى  ارقىلى سيرياداعى سودىرلار قاتارىنا  جونەلتۋدى ۇيىمداستىرىپ كەلگەن ازاماتتار قۇرىقتالدى»، دەپ جازادى.

جيھادشىلاردى ۇيىمداستىرۋشىلار 400-گە جۋىق ۇيعىر-تۇرىكتەرىن شەكارادان زاڭسىز وتكىزۋ بارىسىندا قولعا تۇسكەن.

جيھادشىلارعا قاتىستى مەملەكەت ىشىندە ءتۇرلى جانجالدار ورشىگەندىكتەن، «جيھادشىلارمەن»كۇرەستىڭ جاڭا فورمالارى قولعا الىنا باستاعان. قاڭتار ايىنان بەرى جۇرگىزىلىپ كەلگەن وپەراسيا بارىسىندا ەۋروپانىڭ بىرنەشە مەملەكەتتەرىنەن جانە ورتالىق-شىعىس ازيا ەلدەرىنەن سيرياعا اتتانۋشىلار تۇركيا رەسپۋبليكاسىنىڭ تەرريتورياسى ارقىلا وتەتىنى ءمالىم بولعان. جيھادتى ۇيىمداستىرۋشىلاردىڭ سوڭعى «سولداتتارى» شىعىس تۇركىستاندىق ۇيعىرلار بولعاندىعى انىقتالعان.

بىلتىرعى جىلى جۇڭگو حالىق رەسپۋبليكاسىنىڭ شىڭجاڭ ۇيعىر اۆتونومياسىنان كەلگەن ۇيعىر ازاماتتارى تۇرىك جەرى ارقىلى سيرياداعى يشيم ساپىنا اتتانعاندىعى بەلگىلى. ولار تۇركياداعى تۋىستارىمىزعا قوناققا كەلدىك، شاعىن بيزنەسپەن نەمەسە تۋريستىك ماقساتتا دەگەن سىلتاۋلارمەن تۇركيا اۋماعىنا وتكەن. الايدا نەگىزگى ماقساتتارى يشيم سودىرلارىنىڭ قاراسىن كوبەيتۋ.

ارنايى ورگاندار جۇرگىزگەن وپەراسيالار قورىتىندىسىندا كورسەتىلگەن مالىمەتتەرگە سۇيەنسەك، قاڭتار ايىنان ءساۋىر ايىنىڭ سوڭىنا دەيىن ىستامبۇل، حاتاي جانە كيليس وبلىستارىندا   شەكارادان زاڭسىز وتپەك بولعان 20-دان استام ءدىني ۇستانىمى بولەك توپتار قۇرىقتالعان.

تۇرىك تىلەنەن اۋدارعان نۇرگەلدى ءابدىعاني ۇلى