كەشە ەرمۇرات باپي باستاعان قوعام بەلسەندىلەرى فرانسيادا باس قوستى دەپ جازادى Qamshy.kz اقپارات اگەنتتىگى. اتالمىش جيىنعا بۇرىنعى پرەمەر-مينيستر اكەجان قاجىگەلدين مەن اتىراۋ وبلىسىنىڭ ەكس-اكىمى بەرگەي رىسقالييەۆ قاتىسقان. 

اكەجان قاجەگەلدين ءسوز باسىندا بۇرىن لاۋازىمدى قىزمەتتە جۇرگەندەردىڭ كوبىسى شەت ەلدە قاشىپ جۇرگەنىن ايتتى. سونداي-اق ول بەرگەي رىسقالييەۆ تۋرالى دا ايتىپ بەردى.

"بەرگەيدىڭ تاعدىرى دا، ءومىرى دە باسقاشا. مەنەن بەرگەي تۋرالى ۇلىبريتانيانىڭ ساياسي باسشىلىعىنىڭ وكىلدەرى سۇراستىرعان بولاتىن. ولارعا بەرگەيدى كوپتەن بەرى تانيتىنىمدى ايتتىم. سول كەزدە ول اسلان ءمۋسيننىڭ قاسىندا جۇرگەن قۇرىلىسشى جاس جىگىت ەدى. ول نازاربايەۆتىڭ تۋىسقانى عانا ەمەس. نازاربايەۆقا مىقتى، قولىنان ءىس كەلەتىن جىگىتتەر كەرەك بولدى. قالىپتى جاعداي بويىنشا بەرگەيدى قاسىنا الدى. نە سەبەپتى نازاربايەۆ بەرگەيدى قۋعىندادى؟ نە سەبەپتى حراپۋنوۆ كەتىپ قالدى؟ نەلىكتەن اراعا 10 جىل سالىپ بارىپ قىلمىستىق ءىس قوزعالدى؟ بىرەۋلەردىڭ ىقپال ەتكەنى انىق. بەرگەي رىسقالييەۆ ءوز بەتىنشە شەتەلگە كەتىپ قالدى. ول نۇرسۇلتان نازاربايەۆقا ءقاۋىپتى ەمەس ەدى. ءبىراق بەرگەي جاس جاعىنان الىپ قاراعاندا داريعا ءۇشىن ءقاۋىپتى بولدى. مەن كەزىندە عالىمجان جاقيانوۆپەن پاريجدە كەزدەسىپ قالدىم. سول كەزدە "سەن جانە ءابليازوۆ شاتاسىپ جۇرسىڭدەر. سەندەردىڭ قارسىلاستارىڭ مەن ەمەس. ءتىپتى نۇرسۇلتان نازاربايەۆ تا ەمەس. سەندەردىڭ باستى قارسىلارىڭ – داريعا نازاربايەۆا" دەپ ايتقان بولاتىنمىن. سەبەبى ولار بەرگەيدى قۋعىنداۋ ارقىلى، داريعاعا جول اشىپ بەرۋدە. بەرگەي تۋرالى 2 ساراپشىنىڭ قورىتىندىسىن وقىدىم. بىرەۋى – اتاقتى عالىم. ال ەكىنشىسىن بۇرىنعى فبر ديرەكتورى جازعان. مۇنداي قۇجاتپەن بەرگەي ەمىن – ەركىن جۇرە الادى. ول جۇمىس ىستەيدى، دەمالادى. سونداي-اق جازىقسىز كۇيىپ كەتكەن ءوز كومانداسىنا قول ۇشىن سوزىپ، ارنايى ادۆوكات جالدادى. ەندى بەرگەي قازاقستاننىڭ ساياسي ومىرىنە ارالاسپاق. ەۋرووداقتىڭ بىردە-بىر ساياسي ينستيتۋتىندا بەرگەيگە قاتىستى ەشقانداي ماسەلە جوق ەكەنىن ناقتى ايتا الامىن. ونى ءقازىر ءتۇرلى شارالارعا شاقىرادى"، - دەيدى اكەجان قاجىگەلدين.

"ال مەن قازاقستاننىڭ ساياساتىنا بۇرىننان ارالاسىپ ءجۇرمىن. سول كەزدە بەلگىلى ءبىر وزگەرىس جاساعىم كەلدى. الايدا بۇل مۇمكىن ەمەس ەدى. ەگەر مەن ەلدە قالاتىن بولسام، كەم دەگەندە 15 جىلعا سوتتالار ەدىم. تۇك ىستەي الماس ەدىم. بىر-ەكى شىندىقتى ايتارمىن. ءبىراق تەمىر  توردىڭ ار جاعىندا وتىرىپ تۇك بىتىرمەيتىنىمدى ءتۇسىندىم. ءبىراق سىرتتان قانداي-دا ءبىر ارەكەت جاساي الاتىنىمدى ءبىلدىم"، - دەيدى بەرگەي رىسقالييەۆ.  

دايىنداعان: اسەل بولات قىزى