ىشكى ىستەر ءمينيسترى ەرلان تۇرعىمبايەۆ الماتىلىق الماس سادىقوۆتىڭ ساۋالىنا جاۋاپ بەردى. ول قازاقستاندىقتار كۇندەلىكتى تۇرمىستا "شىندىقتان قاشا المايسىڭ" دەگەن تىركەستى پايدالانا الا ما؟" دەپ سۇراعان. ىشكى ىستەر مينيسترلىگى ۇزاق ويلانىپ، ءۇش اپتادان كەيىن جاۋاپ قايتاردى دەپ حابارلايدى Qamshy.kz اقپارات اگەنتتىگى Hola News سايتىنا سىلتەمە جاساپ.
الماس سادىقوۆ ءمينيستردىڭ اتىنا ءبىر اي بۇرىن حات جولداپ، كەلەسى ساۋالدارعا جاۋاپ بەرۋىن سۇراعان.
"شىندىقتان قاشا المايسىڭ" دەگەن جازۋى بار فۋتبولكا نەمەسە باسقا دا زاتتاردى پايدالانۋعا بولا ما؟
"شىندىقتان قاشا المايسىڭ" دەگەن جازۋدى جەكە مۇلىكتە پايدالانۋعا، ءۇي تەرەزەسىنە ىلۋگە، اۆتوكولىككە، نوۋتبۋكتارعا جازىپ قويۋعا بولا ما؟
وسى جازبا كورسەتىلگەن زاتتاردى باسپادان جانە كادەسىي دايىندايتىن كومپانيالاردان تاپسىرىسپەن جاساتۋعا بولا ما؟
قۇقىق قورعاۋ ورگاندارىنىڭ قىزمەتكەرلەرىنىڭ "شىندىقتان قاشا المايسىڭ" دەگەن جازۋى بار فۋتبولكا كيىپ جۇرگەن تۇرعىنداردى ۇستاۋى قانشالىقتى زاڭدى؟
"شىندىقتان قاشا المايسىڭ" دەگەن تىركەستى پايدالانعان قازاقستان ازاماتتارى زاڭ بۇزعان بولىپ ەسەپتەلە مە؟
«قۇرمەتتى ەرلان زامانبەك ۇلى! ماعان جانە مەن سياقتى مىڭداعان قازاقستان ازاماتتارىنا "شىندىقتان قاشا المايسىڭ" دەگەن تىركەستى پايدالانۋ قۇقىعى مەن جاۋاپكەرشىلىگىن ءتۇسىندىرىپ بەرۋىڭىزدى سۇرايمىن. قانداي دا ءبىر شەكتەۋلەر بولسا، اكىمشىلىك نەمەسە قىلمىستىق كودەكستىڭ قانداي باپتارى بۇزىلاتىنىن ايقىنداپ وتسەڭىز»، - دەپ جازدى سادىقوۆ.
الماس سادىقوۆ "eGov پلاتفورماسىندا ونىڭ حاتى 547450 ءنومىرى بويىنشا تىركەلدى" دەگەن حابارلاما العان.
22 كۇن وتكەننەن كەيىن مينيستر الماتىلىقتىڭ سۇرانىسىنا جاۋاپ قايتاردى. ونىڭ جولداعان ساۋالدارى "ۆەدومستۆانىڭ قۇزىرەتىنە كىرمەيدى" دەپ جازىلعان.
«قۇرمەتتى الماس! «قازاقستان رەسپۋبليكاسىنىڭ ىشكى ىستەر ورگاندارى تۋرالى» زاڭىنا سايكەس، ىشكى ىستەر ورگاندارىنىڭ مىندەتى قوعامدىق ءتارتىپتى قورعاۋ بولىپ تابىلادى. سونىمەن قاتار، ءسىز جولداعان ساۋالدارعا جاۋاپ بەرۋ ىشكى ىستەر ورگاندارىنىڭ قۇزىرەتىندە ەمەس. سونىمەن بىرگە زاڭدار مەن ونىڭ جەكە ەرەجەلەرىنىڭ ءتۇسىندىرىلۋى ونىڭ رەسمي تۇسىندىرىلۋىنە جاتپايدى. اتالعان قۇزىرەتتى ورىنداۋ ءۇشىن ىشكى ىستەر ورگاندارى زاڭدى قاتاڭ ساقتايدى جانە ونى قولدانۋ تارتىبىندە ءوز پوزيسياسىن بىلدىرەدى. الايدا قايشىلىقتارعا تولى ماسەلەلەردە ءوز سيپاتىن بەرۋگە مىندەتتى ەمەس»، - دەلىنگەن تۇرعىمبايەۆتىڭ جاۋابىندا.
مينيستر الماس سادىقوۆتىڭ ساۋالىنا ماردىمدى جاۋاپ قايتارماسا دا، ول قويىلعان سۇراقتارعا ناقتى جاۋاپ كۇتەتىن جازىپ، تۇرعىمبايەۆقا قايتا حات جولدادى.
ۇسىنعان: مارجان سابەت
پىكىر قالدىرۋ